2 Mga Hade 24 - Marahay na Bareta Biblia

¹ Kan panahon kan paghahade ni Jehoiakim, sinalakay ni Hadeng Nebukadnezzar nin Babilonia an Juda. Tolong taon na nagin sakop ni Nebukadnezzar si Jehoiakim, dangan nagrebelde siya.

² An Kagurangnan nagpadara laban ki Jehoiakim nin mga grupo kan mga taga Babilonia, mga taga Siria, mga taga Moab, asin mga taga Ammon tanganing rumpagon an Juda, siring kan saiyang itinaram sa paagi kan saiyang mga sorogoon na mga propeta.

³ Nangyari ini sa pagboot nin Kagurangnan, tanganing mapara sa saiyang panhiling an banwaan nin Juda huli kan gabos na kasalan na ginibo ni Hadeng Manases,

⁴ asin huli kan paggadan niya sa mga tawong mayo nin kasalan. Huli kaiyan dai pwedeng mapatawad nin Kagurangnan si Manases.

⁵ An iba pang ginibo ni Jehoiakim gabos nasusurat sa An Kasaysayan kan mga Hade nin Juda.

⁶ Nagadan si Jehoiakim asin si Jehoiakin na aki niyang lalaki iyo an nagsalihid saiya bilang hade.

⁷ An hade nin Egipto dai na nanggad naghale sa daga nin Egipto, huli ta sakop na ngunyan kan hade nin Babilonia an gabos na teritoryo na sadiri kan Egipto, magpoon sa Salog nin Eufrates sagkod sa amihan na pagdolonan nin Egipto.

Si Hadeng Jehoiakin nin Juda

⁸ Dyes y otsong taon si Jehoiakin kan siya magin hade nin Juda, asin tolong bulan siyang naghade sa Jerusalem. An saiyang ina iyo si Nehusta na aki ni Elnatan na taga Jerusalem.

⁹ Ginibo niya an maraot sa atubangan kan Kagurangnan huli ta sinunod niya an paarog kan saiyang ama.

¹⁰ Kan panahon na iyan, an hukbo ni Nebukadnezzar na hade nin Babilonia nagmartsa laban sa Jerusalem asin pinalibotan ninda ini.

¹¹ Mantang napapalibotan kan hukbo nin Babilonia an Jerusalem, nag-abot si Nebukadnezzar.

¹² Kaya nagsuko saiya si Hadeng Jehoiakin, an ina niya, an mga aki niyang lalaki, an mga pamayo kan hukbo asin an mga opisyal sa palasyo. Kan ikawalong taon kan paghahade ni Nebukadnezzar, binihag niya si Jehoiakin,

¹³ asin dinara sa Babilonia an gabos na kayamanan sa Templo saka sa palasyo. Siring kan ipinahayag kaidto nin Kagurangnan, pinarasa ni Nebukadnezzar an bulawan na mga kagamitan sa Templo na ipinagibo ni Hadeng Solomon.

¹⁴ Binihag niya an mga taga Jerusalem, an gabos na aking lalaki kan hade, asin an mga ginagalangan na tawo kan banwaan na uminabot sa sampolong ribo gabos an bilang. Binihag man niya an gabos na ekspertong trabahador, pati an mga panday; mayo siya nin itinada kundi an pinakadukhang mga tawo sa Juda.

¹⁵ Dinarang bihag ni Nebukadnezzar pasiring sa Babilonia si Jehoiakin, an ina niya, an saiyang mga agom, an mga opisyal asin an mga ginagalangan na tawo sa Juda.

¹⁶ Dinara niya sa Babilonia an pitong ribong mga soldados asin an sangribong ekspertong trabahador, pati an mga panday na gabos makokosog asin maninigong maglingkod sa hukbo.

¹⁷ Si Mattanias na tiyo ni Jehoiakin iyo an ibinugtak ni Nebukadnezzar na hade nin Juda bilang kasalihid ni Jehoiakin; dangan an ngaran niya rinibayan ni Nebukadnezzar nin Zedekias.

Si Hadeng Zedekias nin Juda

¹⁸ Beynte y unong taon an edad ni Zedekias kan siya magin hade sa Juda, asin onseng taon siyang naghade sa Jerusalem. An saiyang ina iyo si Hamutal na aki ni Jeremias na taga Libna.

¹⁹ Ginibo niya an maraot sa atubangan kan Kagurangnan, huli ta sinunod niya an paarog ni Jehoiakim.

²⁰ An Kagurangnan naanggot sa mga taga Jerusalem saka sa mga taga Juda, kaya isinikwal niya sinda.