2 Mga Hade 23 - Marahay na Bareta Biblia

Hinale ni Josias an Pagsamba sa mga Dios-dios

¹ Dangan tinipon ni Hadeng Josias an gabos na kamagurangan nin Juda saka nin Jerusalem.

² Nagduruman sinda gabos sa Templo kaiba an mga padi, an mga propeta asin an gabos na tawo, mayaman man o dukha. Sa pandangog kan gabos, binasa kan hade an bilog na libro kan tipan na nakua sa laog kan Templo.

³ Nagtindog siya sa kataed kan harigi asin nakipagtipan sa Kagurangnan, na susunodon niya an Kagurangnan, kukuyogon an gabos na togon saka mga pagboot sa bilog niyang puso asin kalag, patin gigibohon an mga kahagadan kan tipan na nasusurat sa libro. Dangan an bilog na banwaan nanuga na ootobon an tipan.

⁴ Dangan pinagbotan kan hade si Hilkias, an halangkaw na padi, an katabang kaining mga padi, asin an mga bantay sa agihan pasiring sa Templo na iluwas sa Templo an mga kagamitan na manongod ki Baal, ki Asera, saka sa mga bitoon. Ipinasulo kan hade an gabos na kagamitan sa luwas kan Jerusalem, sa Kapantayan nin Kidron, asin ipinadara niya sa Betel an mga abo.

⁵ Hinale niya an mga padi na itinalaga kan mga hade nin Juda tanganing magdolot nin mga sakripisyo sa paganong mga altar sa mga syudad nin Juda asin sa palibot kan Jerusalem. Hinale man niya an mga padi na nagdolot nin sakripisyo para ki Baal, para sa aldaw, bulan, mga planeta asin mga bitoon.

⁶ Ipinahale niya sa Templo an tanda kan diosang si Asera. Ipinadara niya ini sa luwas kan syudad, sa kapantayan nin Kidron, asin duman ipinasulo. Dangan ipinabayo niya nin pino an abo saka ipinawarak sa lulubngan kan mga ordinaryong tawo.

⁷ Sa laog kan Templo, ipinagaba niya an mga erokan kan maraot na mga lalaki saka mga babae sa templo. (Digdi naghabol an mga babae nin mga gubing na ginamit sa pagsamba ki Asera.)

⁸ Dinara niya sa Jerusalem an gabos na padi hale sa mga syudad nin Juda, dangan ipinagaba an mga altar na pinagdodolotan ninda nin sakripisyo, magpoon sa Geba sagkod sa Beer-sheba. Ipinagaba man niya an mga altar kan mga trangkahan sa may sa trangkahan na ipinatugdok ni Josue, an gobernador kan syudad, sa parteng wala kan pangenot na trangkahan kan syudad.

⁹ Dai tinugotan an mga padi na idto na maglingkod sa Templo, alagad pwede sindang magkakan kan tinapay na mayo nin lebadura kaiba kan kapwa ninda padi.

¹⁰ Binasang-basang ni Hadeng Josias an Tofet, an paganong lugar na pagsasambahan sa Kapantayan nin Hinnom, tanganing mayo na nin magsakripisyo kan saindang aking lalaki o aking babae bilang dolot ki Molek.

¹¹ Hinale niya an mga kabayo na itinalaga kan mga hade nin Juda manongod sa pagsamba kan aldaw, dangan tinutong niya an mga karwahe na ginamit sa pagsambang ini. (An mga karwaheng ini sinaray sa patyo kan Templo, harani sa trangkahan asin sa erokan ni Natan-melec, na sarong halangkaw na opisyal.)

¹² Ipinagaba niya an mga altar na ginibo kan mga hade nin Juda sa atop kan erokan ni Ahaz, sagkod an mga altar na ibinugtak ni Hadeng Manases sa duwang patyo kan Templo; ipinaronot niya an mga altar dangan ipinatapok sa Kapantayan nin Kidron.

¹³ Binasang-basang niya an mga altar na nasa sirangan nin Jerusalem, sa parteng habagat kan Bukid nin mga Oliba. An mga altar na ini ginibo ni Hadeng Solomon para ki Astarte, an makauuyam na diosa nin Sidon, para ki Kemos, an dios nin Moab, asin para ki Molek, an dios nin Ammon.

¹⁴ Ipinaronot ni Hadeng Josias an mga gapong harigi, ipinapalod an mga tanda kan diosa na si Asera, asin an dating namugtakan kan mga ini pinatambakan niya kan mga tolang nin tawo.

¹⁵ Ipinagaba man niya an lugar na pagsasambahan sa Betel na ginibo ni Hadeng Jeroboam na aking lalaki ni Nebat, na nagpakasala sa Israel. Ipinarumpag niya an altar, ipinapedaso an mga gapo kaini saka ipinabayo nin pino; ipinasulo man niya an ladawan ni Asera.

¹⁶ Dangan nangalag-kalag si Josias asin nahiling niya an nagkapirang lulubngan sa bulod; ipinakalot niya an mga tolang asin ipinatutong sa altar. Sa paaging ini binasang-basang niya an altar, sosog sa itinaram nin Kagurangnan sa paagi kan saiyang propeta. Nakahiling pa si Josias nin sarong lulubngan,

¹⁷ kaya naghapot siya, “Kiisay an lulubngan na iyan?” Nagsimbag an mga taga Betel, “Iyo iyan an lulubngan kan propetang taga Juda na nagpropesiya kan mga bagay na ginibo mo ngunyan sa altar na ini.”

¹⁸ “Dai nindo paghiroon an saiyang mga tolang,” an pagboot ni Josias. Kaya dai ninda hiniro an saiyang mga tolang, sagkod an mga tolang kan propetang taga Samaria.

¹⁹ Sa lambang syudad nin Israel ipinagaba ni Hadeng Josias an gabos na paganong mga lugar na pagsasambahan na ipinatugdok kan mga hade nin Israel na nagpaanggot sa Kagurangnan. Ginibo niya sa mga altar na idto an ginibo niya sa Betel.

²⁰ Ipinagadan niya an paganong mga padi sa ibabaw kan mga altar na pinaglingkodan ninda. Dangan nagtutong siya nin mga tolang nin tawo sa lambang altar. Pakatapos, nagbalik siya sa Jerusalem.

Nagselebrar si Josias kan Paskwa

²¹ Pinagbotan ni Hadeng Josias an mga tawo na selebraron an Paskwa sa pag-omaw sa Kagurangnan na saindang Dios, sosog sa nasusurat sa libro nin tipan.

²² Mayong Paskwang arog kaini an senelebrar kan arin man sa mga hade nin Israel o nin Juda, magpoon kan panahon kan mga hukom na namayo sa Israel.

²³ Alagad kan ikadyes y otsong taon kan paghahade ni Josias, ginibo an pagselebrar kan Paskwa sa Jerusalem.

Iba pang Reporma ni Josias

²⁴ Laen pa kaiyan, hinale ni Josias an mga espiritista, an mga parahula, an mga dios-dios asin mga ladawan, dangan an gabos na makauuyam na bagay na nahiling sa daga nin Juda saka sa Jerusalem tanganing maotob an katogonan na nasusurat sa libro na nanumpongan kan halangkaw na padi na si Hilkias duman sa Templo.

²⁵ Mayo pa nin hade kaidto na arog saiya, na naglingkod sa Kagurangnan sa bilog niyang puso, kalag asin kosog, na nagkuyog kan Katogonan ni Moises. Mayo na man nin nagsunod na hade na arog saiya.

²⁶ Alagad dai nahale an makuring kaanggotan kan Kagurangnan laban sa Juda huli kan ginibo ni Hadeng Manases.

²⁷ Nagtaram an Kagurangnan, “Gigibohon ko sa Juda an ginibo ko sa Israel: Paparaon ko sa sakong panhiling an Juda, saka isisikwal ko an Jerusalem, an syudad na pinili ko, asin an Templo, an sinabi kong lugar na pagsasambahan sako.”

An Kataposan kan Paghahade ni Josias

²⁸ An iba pang ginibo ni Hadeng Josias gabos nasusurat sa An Kasaysayan kan mga Hade nin Juda.

²⁹ Kan panahon niya, pinangenotan ni Neco, na hade nin Egipto, an sarong hukbo pasiring sa Salog nin Eufrates tanganing tabangan an emperador nin Asiria. Hiningowa ni Hadeng Josias na paontokon an hukbo nin Egipto duman sa Megido, alagad nagadan siya sa gera.

³⁰ An saiyang bangkay ibinugtak kan saiyang mga sorogoon sa sarong karwahe dangan dinara sa Jerusalem. Ilinubong ninda siya sa sadiri niyang lulubngan. Pinili kan banwaan nin Juda si Joahaz, na aking lalaki ni Josias, asin linahidan nin lana, saka ginibong hade bilang kasalihid kan saiyang ama.

Si Hadeng Joahaz nin Juda

³¹ Beynte y tres na taon an edad ni Joahaz kan siya magin hade nin Juda, asin tolong bulan siyang naghade sa Jerusalem. An saiyang ina iyo si Hamutal, na aki ni Jeremias na taga Libna.

³² Nagkasala siya sa Kagurangnan huli ta sinunod niya an paarog kan saiyang mga ginikanan.

³³ Natapos an saiyang paghahade kan mabihag siya ni Neco na hade nin Egipto. Ibinilanggo ni Neco si Joahaz sa Ribla, sa daga nin Hamat, dangan pinapagbuhis an Juda nin tres mil kwatro syentos kilos na plata asin treynta y kwatro kilos na bulawan.

³⁴ Si Eliakim, na aking lalaki ni Josias, iyo an ibinugtak ni Neco na hade nin Juda bilang kasalihid ni Josias, dangan an ngaran niya rinibayan ni Neco nin Jehoiakim. Si Joahaz dinara ni Neco sa Egipto, asin duman siya nagadan.

Si Hadeng Jehoiakim nin Juda

³⁵ Pinapagbuhis ni Hadeng Jehoiakim an mga tawo sosog sa saindang kayamanan, tanganing makatipon kan halaga na hinagad saiya ni Hadeng Neco.

³⁶ Beynte y singkong taon an edad ni Jehoiakim kan siya magin hade nin Juda asin onseng taon siyang naghade sa Jerusalem. An saiyang ina iyo si Zebida, na aki ni Pedaias na taga Ruma.

³⁷ Ginibo niya an maraot sa atubangan kan Kagurangnan huli ta sinunod niya an paarog kan saiyang mga ginikanan.