2 Mga Hade 21 - Marahay na Bareta Biblia

Si Hadeng Manases nin Juda

¹ Doseng taon an edad ni Manases kan siya magin hade nin Juda, asin singkwenta y singkong taon siyang naghade sa Jerusalem. An saiyang ina iyo si Hefziba.

² Nagkasala siya sa Kagurangnan huli kan pagsunod niya sa makauuyam na mga gawe kan mga nasyon na pinahale nin Kagurangnan mantang nagdadangadang an banwaan nin Israel.

³ Ipinatugdok niya giraray an paganong mga lugar na pagsasambahan na ginaba kan saiyang ama na si Ezekias. Nagtugdok siya nin mga altar para ki Baal asin naggibo nin mga imahen kan diosang si Asera, arog kan ginibo ni Ahab na hade nin Israel. Nagsamba saka naglingkod siya sa mga bitoon.

⁴ Naggibo siya nin paganong mga altar sa laog kan Templo, an lugar na sinabi nin Kagurangnan na dapat pagsambahan saiya.

⁵ Sa duwang patyo kan Templo, nagpagibo siya nin mga altar para sa pagsamba kan mga bitoon.

⁶ Isinakripisyo niya an saiyang aking lalaki bilang tinutong na atang. Naghula siya asin nagsalamangka. Nakihumapot siya sa mga parahula asin sa mga tawong nakikipag-olay sa mga espiritu. Nagkasala siya nin makuri sa Kagurangnan, na pinaanggot niya nin marahay.

⁷ An imahen kan diosang si Asera na saiyang ginibo, ibinugtak niya sa laog kan Templo, sa lugar na iyo an sinabi nin Kagurangnan kan siya magtaram ki David asin ki Solomon na aki kaini: “Digdi sa Templong ini, asin sa Jerusalem, na pinili ko hale sa gabos na tribu nin Israel, ibubugtak ko an sakong ngaran sagkod pa man.

⁸ Kun otobon nin Israel an gabos kong togon saka mga pagboot na itinao sainda ni Moises, dai ko tutugotan na mapahale pa sinda sa daga na itinao ko sa saindang mga ginikanan.”

⁹ Alagad dai nagkuyog sa Kagurangnan an banwaan nin Juda, asin dinagka sinda ni Manases na magkasala nin orog ki sa mga kasalan na ginibo kan mga nasyon na pinahale nin Kagurangnan mantang nagdadangadang an banwaan nin Israel.

¹⁰ Sa paagi kan mga propeta, nagtaram an Kagurangnan,

¹¹ “Ginibo ni Manases na hade nin Juda an makauuyam na mga bagay na ini, mga bagay na mas maraot ki sa mga ginibo kan mga Cananeo; asin huli kan saiyang mga dios-dios pinapagkasala niya an banwaan nin Juda.

¹² Kaya ako, an Kagurangnan Dios nin Israel, mapadara nin makuring kasakitan sa Jerusalem saka sa Juda tanganing an siisay man na makadangog kaiyan mamomongnan.

¹³ Papadusahan ko an Jerusalem arog kan ginibo ko sa Samaria, arog kan ginibo ko ki Hadeng Ahab nin Israel sagkod an saiyang kapagarakian. Lilinigan ko an Jerusalem arog kan paglinig kan plato bago patiolobon.

¹⁴ Papabayaan ko an kadikit na matadang buhay, asin itatao ko sinda sa saindang mga kaiwal, na masakop sainda saka masamsam kan saindang daga.

¹⁵ Gigibohon ko ini sa sakong banwaan huli ta nagkasala sinda sako asin pinaanggot ninda ako magpoon kan aldaw na naghale sa Egipto an saindang mga ginikanan sagkod ngunyan.”

¹⁶ Laen pa kan ginibo ni Manases na pangengenot sa mga tawo sa pagsamba sa mga dios-dios, na ipinagkasala ninda sa Kagurangnan, kadakul pa siyang ipinagadan na mayo nin kasalan; kaya an mga tinampo sa Jerusalem nagbulos nin dugo.

¹⁷ An iba pang ginibo ni Manases, sagkod an mga kasalan na ginibo niya, gabos nasusurat sa An Kasaysayan kan mga Hade nin Juda.

¹⁸ Nagadan si Manases asin ilinubong sa tatamnan kan saiyang palasyo, an tatamnan ni Uzza. Si Amon na saiyang aking lalaki iyo an nagsalihid saiya bilang hade.

Si Hadeng Amon nin Juda

¹⁹ Beynte y dos na taon an edad ni Amon kan siya magin hade nin Juda, asin duwang taon siyang naghade sa Jerusalem. An saiyang ina iyo si Mesullemet na aki ni Haruz na taga Jotba.

²⁰ Arog kan saiyang ama na si Manases, nagkasala siya sa Kagurangnan;

²¹ inarog niya an mga gibo kan saiyang ama, asin sinamba niya an mga ladawan na sinamba kan saiyang ama.

²² Isinikwal niya an Kagurangnan, an Dios nin saiyang mga ginikanan, asin dai niya kinuyog an mga pagboot nin Kagurangnan.

²³ Pinasaluiban si Amon kan saiyang mga opisyal asin ginadan duman sa palasyo.

²⁴ Alagad ginadan kan mga taga Juda an mga nagpasaluib ki Hadeng Amon, asin si Josias na saiyang aking lalaki iyo an ginibo nindang hade bilang kasalihid niya.

²⁵ An iba pang ginibo ni Amon gabos nasusurat sa An Kasaysayan kan mga Hade nin Juda.

²⁶ Ilinubong siya sa saiyang lulubngan na nasa tatamnan ni Uzza, asin si Josias na aki niyang lalaki iyo an nagsalihid saiya bilang hade.