2 Mga Hade 2 - Marahay na Bareta Biblia

Isinakat sa Langit si Elias

¹ Nag-abot an panahon tanganing kuahon nin Kagurangnan si Elias sa paagi nin aripuros. Naghale sa Gilgal si Elias saka si Eliseo,

² asin sa dalan nagsabi si Elias ki Eliseo, “Magpawalat ka digdi, huli ta pinagbotan ako nin Kagurangnan na magduman sa Betel.” Alagad nagsimbag si Eliseo, “Minasumpa ako huli sa sakong kaimbodan sa buhay na Kagurangnan asin sa saimo, na dai taka babayaan.” Kaya nagpadagos sindang duwa sa Betel.

³ Sarong grupo nin mga propeta na nag-eerok duman an nagdolok ki Eliseo saka naghapot, “Aram mo daw na an saimong kagurangnan kukuahon na nin Kagurangnan ngunyan na aldaw?” “Iyo, aram ko,” an simbag ni Eliseo. “Alagad mag-alo sana kamo.”

⁴ Dangan nagsabi si Elias ki Eliseo, “Magpawalat ka digdi, huli ta pinagbotan ako nin Kagurangnan na magduman sa Jerico.” Alagad nagsimbag si Eliseo, “Minasumpa ako huli sa sakong kaimbodan sa buhay na Kagurangnan asin sa saimo, na dai taka babayaan.” Kaya nagpadagos sinda sa Jerico.

⁵ Sarong grupo nin mga propeta na nag-eerok duman an nagdolok ki Eliseo saka naghapot, “Aram mo daw na an saimong kagurangnan kukuahon na nin Kagurangnan ngunyan na aldaw?” “Iyo, aram ko,” an simbag ni Eliseo, “Alagad mag-alo sana kamo.”

⁶ Dangan nagsabi si Elias ki Eliseo, “Magpawalat ka digdi, huli ta pinagbotan ako nin Kagurangnan na magduman sa Salog nin Jordan.” Alagad nagsimbag si Eliseo, “Minasumpa ako huli sa sakong kaimbodan sa buhay na Kagurangnan asin sa saimo, na dai taka babayaan.” Kaya nagpadagos sinda sa paglakaw,

⁷ asin singkwenta kan mga propeta an nagsunod sainda pasiring sa Jordan. Nag-ontok si Elias saka si Eliseo sa tampi kan salog, asin nagtindog sa horoharayo an singkwentang propeta.

⁸ Dangan hinuba ni Elias an saiyang alikboy, linukot asin ipinakol sa tubig. Nabanga an tubig, asin nag-agi sinda sa mamarang daga pasiring sa ibong kan salog.

⁹ Pakabalyo ninda, nagsabi si Elias ki Eliseo, “Sabihan sako kun ano an boot mong gibohon ko para saimo, bago ako kuahon.” “Nakikimaherak ako saimo na ipamana mo sako an kahirasan kan saimong kapangyarihan na iyo an magibo sako na kasalihid mo,” an simbag ni Eliseo.

¹⁰ Nagsimbag si Elias, “Magabat an hinagad mo, alagad kun mahiling mo ako mantang kinukua ako saimo, makakamtan mo iyan; ta kun dai, dai mo makakamtan an hinahagad mo.”

¹¹ Padagos sindang nag-oolay mantang naglalakaw. Dangan biglang nagpatahaw sainda an sarong karwahe na kalayo na guyod nin mga kabayong kalayo, asin isinakat si Elias sa langit sa paagi nin aripuros.

¹² Nahiling ini ni Eliseo asin nagkurahaw siya ki Elias, “Ama ko, ama ko! Makosog na parasurog nin Israel! Mayo ka na!” Asin dai na niya nahiling si Elias. Sa kamondoan, ginisi ni Eliseo an saiyang gubing sa duwang kabtang.

¹³ Dangan pinurot niya an nahulog na alikboy ni Elias asin nagbalik saka nagtindog siya sa tampi kan Salog nin Jordan.

¹⁴ Pinakol niya an tubig kan alikboy saka nagsabi, “Haen an Kagurangnan, an Dios ni Elias?” Dangan pinakol niya giraray an tubig, asin nabanga ini; naglakaw si Eliseo pasiring sa ibong kan salog.

¹⁵ Kan mahiling ini kan mga propetang taga Jerico, nagsabi sinda, “An kapangyarihan ni Elias yaon na ki Eliseo!” Nagdolok sinda sa pagsabat ki Eliseo asin nagdarapa sa saiyang atubang.

¹⁶ Nagsabi sinda ki Eliseo, “Singkwenta kaming uya digdi, gabos makokosog na lalaki. Padumana kami tanganing hanapon an saimong kagurangnan. Tibaad dinara siya kan espiritu nin Kagurangnan asin iwinalat sa ibabaw nin sarong bukid o sa sarong kapantayan.” “Dai na kamo maglakaw,” an simbag ni Eliseo.

¹⁷ Alagad nagpirit sinda sagkod na magtugot si Eliseo kaya pinalakaw niya sinda. Hinanap si Elias kan singkwentang lalaki sa laog nin tolong aldaw, alagad dai ninda siya nakua.

¹⁸ Dangan nagbalik sinda ki Eliseo, na naghalat sa Jerico. Sinabihan sinda ni Eliseo, “Bakong sinabi ko na saindong dai na kamo maglakaw?”

Mga Milagro ni Eliseo

¹⁹ Nagduman ki Eliseo an nagkapirang taga Jerico asin nagsabi, “Siring kan saimong nahihiling, magayon an syudad na ini, alagad maati an tubig digdi, asin nagigin dahelan tanganing makuahan an sarong bados.

²⁰ “Bugtakan nindo nin asin an sarong bagong mangko dangan daraha sako,” an sabi ni Eliseo. Kaya dinara ninda saiya an mangko,

²¹ dangan nagduman si Eliseo sa burabod nin tubig. Itinapok ni Eliseo sa tubig an asin dangan nagsabi, “Iyo ini an sinasabi nin Kagurangnan: ‘Lininigan ko na an tubig na ini. Dai na ini magigin dahelan nin kagadanan o nin pagkakuahe sa mga bados.’”

²² Magpoon kaidto nagin malinig na an tubig siring sa sinabi ni Eliseo.

²³ Naghale siya sa Jerico tanganing magduman sa Betel. Mantang naglalakaw siya, nagluwas an mga aking lalaki asin pinagtuyatuya siya. “Humale ka digdi, kalbo!” an kurahaw ninda.

²⁴ Nagsalingoy si Eliseo asin kan mahiling niya sinda, minaldisyon niya sinda sa ngaran nin Kagurangnan. Dangan luminuwas hale sa kakahoyan an duwang babaeng oso saka ginaradan an kwarenta y dos sa mga aking lalaki.

²⁵ Hale duman nagpadagos si Eliseo pasiring sa Bukid nin Carmelo, dangan nagbalik sa Samaria.