2 Mga Hade 12 - Marahay na Bareta Biblia

Si Hadeng Joas nin Juda

¹ Kan ikapitong taon kan paghahade ni Jehu sa Israel, nagin hade si Joas, asin kwarentang taon siyang naghade sa Jerusalem. An saiyang ina iyo si Zibias na taga Beer-sheba.

² Ginibo ni Joas an matanos sa atubangan nin Kagurangnan sa bilog niyang pagkabuhay, huli ta tinukdoan siya kan padi na si Jehoiada.

³ Alagad dai niya rinaot an paganong mga lugar na pagsasambahan, kaya an mga tawo nagpadagos sa pag-atang asin sa pagtutong nin insenso duman.

⁴ Ipinaapod ni Joas an mga padi asin sinabihan na tiponon an kwartang ibinabayad para sa mga sakripisyo sa Templo—an kwartang ibinabayad para sa regular na sakripisyo asin an itinatao bilang boluntad na regalo.

⁵ An lambang padi iyo an namahala sa kwartang dinara kan saiyang pinaglingkodan. Dangan an kwarta gagamiton ninda sa paghirahay kan Templo sa oras na may mahiling digdi na dapat hirahayon.

⁶ Alagad kan ikabeynte y tres na taon kan paghahade ni Joas dai pa hinihirahay kan mga padi an Templo.

⁷ Kaya ipinaapod ni Joas si Jehoiada saka an ibang padi. Hinapot niya sinda, “Tano ta dai nindo hinihirahay an Templo? Magpoon ngunyan dai na nindo sasarayon an kwarta na inaako nindo; kaipuhan mamugtak iyan sa paghirahay kan Templo.”

⁸ Nag-oyon an mga padi na bako na sinda an masaray kan kwarta asin an mahirahay kan Templo.

⁹ Dangan nagkua si Jehoiada nin sarong kahon, linabotan an takop, asin ibinugtak idto sa kataed kan altar, sa toong parte palaog sa Templo. Digdi ilinalaog kan padi na nagbabantay sa pintoan an gabos na kwarta na itinao kan mga parasamba.

¹⁰ Kun nahihiling ninda na dakul na an kwarta sa kahon, minaduman an sekretaryo kan hade asin an halangkaw na padi dangan binibilang ninda an kwarta saka ilinalaog sa mga supot.

¹¹ Tinitimbang ninda ini bago itao sa mga namamahala kan paghirahay kan Templo. Kinukua ninda sa kwartang ini an tandan sa mga karpintero, sa mga paratugdok,

¹² sa mga kantero asin sa mga paratabas nin gapo. Digdi man ninda kinukua an ibinabakal kan mga kahoy saka mga gapo na ginagamit sa paghirahay kan Templo, sagkod kan iba pang kaipuhan.

¹³ Alagad an kwartang ini dai ninda ibinabayad sa paggibo kan mga palangganang plata, pamalsok nin ilaw, mangko, trompeta o ano man na kasangkapan na bulawan o plata.

¹⁴ An kwarta ginagamit sana ninda na pambayad sa trabahador saka pambakal kan mga kagamitan na kaipuhan sa paghirahay kan Templo.

¹⁵ Dai ninda hinahagadan nin kwenta kan gastos an mga namamahala sa pagpahirahay huli ta mga onesto ini.

¹⁶ An kwartang itinatao para sa mga dolot nin kabayadan asin mga dolot para sa kasalan dai ilinalaog sa kahon; sadiri iyan kan mga padi.

¹⁷ Kan panahon na iyan, sinalakay ni Hadeng Hazael nin Siria an syudad nin Gat asin nasakop ini. Alagad kan mag-isip siya na salakayon an Jerusalem,

¹⁸ kinua ni Hadeng Joas nin Juda an gabos na dolot na itinalaga sa Kagurangnan ni Jehosafat, Jehoram, asin Ahazias, an mga hadeng naenot saiya. Kinua man niya an sadiri niyang mga dolot asin an gabos na bulawan sa kaban nin yaman duman sa Templo saka sa palasyo, dangan ipinadara gabos ki Hadeng Hazael. Kaya dai na sinalakay ni Hadeng Hazael an Jerusalem.

¹⁹ An iba pang ginibo ni Hadeng Joas gabos nasusurat sa An Kasaysayan kan mga Hade nin Juda.

²⁰ An saiyang mga opisyal nagkasararo laban ki Joas asin ginadan siya ninda duman sa harong na itinugdok sa lugar na tinambakan nin daga sa sirangan na parte kan Jerusalem, sa dalan paibaba sa Silla.

²¹ An mga opisyal na guminadan saiya iyo si Jozacar na aking lalaki ni Simeat asin si Jehozabad na aking lalaki ni Somer. Ilinubong si Joas sa lulubngan kan mga hade sa Syudad ni David. Si Amazias na saiyang aking lalaki iyo an nagsalihid saiya bilang hade.