2 Mga Hade 11 - Marahay na Bareta Biblia

Si Reyna Atalia nin Juda

¹ Kan maaraman ni Atalia, na ina ni Hadeng Ahazias, na gadan na an saiyang aki, nagboot siya na gadanon an gabos na kaayon sa pamilya kan hade.

² Si Joas na aking lalaki ni Ahazias iyo sana an dai nagadan. Gagadanon na sana siya kaiba kan iba, alagad hilom na ilinigtas siya kan tiya niyang si Jehosheba, na aki ni Hadeng Jehoram asin tugang sa ama ni Ahazias. Si Joas saka an paraaling niya itinago ni Jehosheba sa sarong kwartong torogan sa Templo, kaya an aki nakaligtas sa kagadanan sa kamot ni Atalia.

³ Sa laog nin anom na taon itinago ni Jehosheba si Joas duman sa Templo, mantang si Atalia an namayo bilang reyna.

⁴ Alagad pag-abot kan ikapitong taon, ipinaapod kan pading si Jehoiada an mga opisyal na namamahala kan mga bantay kan hade. Pinaduman niya an mga opisyal na ini sa Templo saka nakipagtipan sainda; pinasumpa niya sinda duman sa Templo. Pakatapos, ipinahiling niya sainda an aking lalaki kan hade.

⁵ Sinabihan sinda ni Jehoiada, “Pagdigdi nindo tanganing maglingkod sa aldaw nin Sabbath, an ikatolong kabtang saindo iyo an mabantay sa palasyo,

⁶ an sunod na ikatolong kabtang iyo an mabantay kan trangkahan nin Sur, asin an sunod na ikatolong kabtang iyo an mabantay kan trangkahan sa likod kan ibang mga bantay.

⁷ An duwang grupo na mayo na nin trabaho sa aldaw nin Sabbath iyo an mamumugtak sa Templo tanganing bantayan an hade.

⁸ Si Hadeng Joas babantayan nindo na may mga kapot na armas asin iibahan nindo siya saen man siya magduman. Gadanon nindo an siisay man na magdolok saindo.”

⁹ Kinuyog kan mga opisyal an pagboot ni Jehoiada. An mga lalaki na mayo na nin trabaho sa aldaw nin Sabbath dai na ninda pinahale kundi padagos na pinapaglingkod kaiba kan maralaog sa trabaho sa aldaw na iyan, dangan dinara ninda an mga ini sa pading si Jehoiada.

¹⁰ An mga opisyal tinawan ni Jehoiada kan mga garod saka mga kalasag na sadiri kaidto ni Hadeng David asin nasasaray duman sa Templo.

¹¹ An mga lalaki na may kapot na armas ibinugtak ni Jehoiada sa palibot kan atubangan kan Templo tanganing bantayan an hade.

¹² Dangan ilinuwas ni Jehoiada si Joas, kinoronahan, saka tinawan kan kopya kan katogonan nin paghahade. Ginibo nindang hade si Joas; asin linahidan ini nin lana. Dangan nag-oropak an mga tawo saka nagkururahaw, “Mabuhay an hade!”

¹³ Kan madangog ni Atalia an ribok kan mga bantay asin kan mga tawo, nagduman siya sa Templo, sa pinagtitiriponan kan mga tawo.

¹⁴ Nahiling niya duman an bagong hade na nakatindog sa may harigi, sosog sa kaugalean, napapalibotan kan mga opisyal kan hukbo asin kan mga paratrompeta. An gabos na tawo maogmang nagkukurahaw saka nagpapatanog kan mga trompeta. Ginisi ni Atalia an saiyang gubing asin nagkurahaw, “Kapasaluiban! Kapasaluiban!”

¹⁵ Habo ni Jehoiada na gadanon si Atalia sa laog kan Templo kaya pinagbotan niya an mga opisyal kan hukbo, “Isiblag siya sa grupo kan mga bantay, asin gadanon nindo an siisay man na maghingowang magligtas saiya.”

¹⁶ Dinakop ninda siya, dinara sa palasyo dangan ginadan duman sa may Trangkahan nin Kabayo.

Mga Reporma ni Jehoiada

¹⁷ Nakipagtipan si Jehoiada sa Kagurangnan dangan sa hade asin sa banwaan, na sinda gabos iyo an magigin banwaan nin Kagurangnan; nakipagtipan man siya sa hade saka sa banwaan.

¹⁸ Pakatapos, nagduman an mga tawo sa templo ni Baal asin rinumpag idto. Rinonot ninda an saiyang mga altar saka mga imahen, asin ginadan sa atubang kan mga altar si Mattan, an padi ni Baal. Nagbugtak si Jehoiada nin mga bantay sa Templo.

¹⁹ Dangan kaiba an mga opisyal kan hukbo, an mga bantay kan hade, an mga bantay kan palasyo, asin an bilog na banwaan dinara ni Jehoiada an hade hale sa Templo pasiring sa palasyo. Duman sinda nag-agi sa Trangkahan nin Bantay, dangan nagtukaw si Joas sa saiyang trono.

²⁰ Nag-ogma an gabos na tawo; nagin matoninong an syudad pakagadan ni Atalia duman sa palasyo.

²¹ Pitong taon an edad ni Joas kan siya magin hade nin Juda.