2 Mga Hade 1 - Marahay na Bareta Biblia

Si Elias asin si Hadeng Ahazias

¹ Pagkagadan ni Hadeng Ahab nin Israel, nagrebelde an Moab laban sa Israel.

² Nahulog si Hadeng Ahazias hale sa balkon kan atop kan saiyang palasyo sa Samaria asin naghelang siya. Kaya nagpadara siya nin mga sugo tanganing maghapot ki Baal-zebub, an dios nin Ekron, kun mararahay pa siya.

³ Alagad pinagbotan kan anghel nin Kagurangnan an propetang si Elias na taga Tisbe, na sabaton an mga sugo kan hade nin Samaria dangan hapoton, “Tadaw ta mahapot kamo ki Baal-zebub, an dios nin Ekron? Sa paghona nindo, mayo nin dios sa Israel?

⁴ Kaya ngunyan ini an tataramon nin Kagurangnan: ‘Dai ka na mararahay sa saimong helang; magagadan ka!’” Ginibo ni Elias an pagboot nin Kagurangnan.

⁵ Kaya nagbalik sa hade an mga sugo. Hinapot sinda kan hade, “Tano ta nagbalik kamo?”

⁶ Nagsimbag sinda, “Sinabat kami nin sarong lalaki na nagsabing magbalik kami tanganing sabihan mi ika na an Kagurangnan nagtataram saimo, ‘Tadaw ta nagpapadara ka nin mga sugo na mahapot ki Baal-zebub, an dios nin Ekron? Sa paghona mo, mayo nin Dios sa Israel? Dai ka na mararahay sa saimong helang; magagadan ka!’”

⁷ “Anong klaseng lalaki an nagsabat saindo asin nagsabi kan mga bagay na ini?” an hapot kan hade.

⁸ “Nakasulot siya nin gubing na gibo sa mga anit nin hayop asin nakahabay nin anit,” an simbag ninda. “Si Elias idto!” an sabi kan hade.

⁹ Dangan an sarong opisyal na may kaibahan na singkwentang soldados sinugo kan hade ki Elias. Nakua kan opisyal si Elias na nagtutukaw sa ibabaw nin sarong bulod asin sinabihan, “Sorogoon nin Dios, ipinagboboot kan hade na maghilig ka.”

¹⁰ Alagad nagsimbag si Elias, “Kun ako sarong sorogoon nin Dios, maghugpa logod an kalayo hale sa langit asin gadanon ka saka an saimong mga soldados!” Dangan naghugpa an kalayo asin ginadan an opisyal sagkod an saiyang mga soldados.

¹¹ Nagsugo giraray ki Elias an hade nin sarong opisyal na may kaibahan na singkwentang soldados. Nagtukad an opisyal saka nagsabi ki Elias, “Sorogoon nin Dios, ipinagboboot kan hade na maghilig ka tolos!”

¹² Alagad nagsimbag si Elias, “Kun ako sarong sorogoon nin Dios, maghugpa logod an kalayo hale sa langit asin gadanon ka sagkod an saimong mga soldados!” Dangan naghugpa an kalayo nin Dios asin ginadan an opisyal sagkod an saiyang mga soldados.

¹³ Nagsugo giraray an hade nin sarong opisyal na may kaibahan na singkwentang soldados. Nagtukad sa bulod an opisyal, nagluhod sa atubang ni Elias, dangan nakimaherak, “Sorogoon nin Dios, nakikimaherak ako saimo, pahalagahan mo logod an sakong buhay asin an buhay kan sakong mga soldados.

¹⁴ An duwang opisyal na naenot sako asin an saindang mga soldados ginadan kan kalayong hale sa langit; alagad kaherakan mo ako!”

¹⁵ Nagsabi an anghel nin Kagurangnan ki Elias, “Mag-iba ka sa saiya, asin dai ka matakot.” Kaya nag-iba si Elias sa opisyal pasiring sa hade,

¹⁶ asin sinabihan an hade, “Ini an tataramon nin Kagurangnan: ‘Huli ta nagpadara ka nin mga sugo tanganing maghapot ki Baal-zebub, an dios nin Ekron—na garong mayo nin dios sa Israel na pwedeng hapoton—dai ka na mararahay; magagadan ka!’”

¹⁷ Nagadan si Ahazias, sosog sa itinaram nin Kagurangnan sa paagi ni Elias. Mayo siya nin aking lalaki, kaya si Joram na saiyang tugang iyo an nagsalihid saiya bilang hade sa ikaduwang taon nin paghahade ni Jehoram na aking lalaki ni Jehosafat, an hade nin Juda.

¹⁸ An iba pang ginibo ni Ahazias gabos nasusurat sa An Kasaysayan kan mga Hade nin Israel.