2 Mga Cronica 9 - Marahay na Bareta Biblia

An Pagdalaw kan Reyna nin Sheba

¹ Nadangog kan reyna nin Sheba an kabantogan ni Solomon, kaya nagduman siya sa Jerusalem tanganing baloon si Solomon sa paagi nin dipisil na mga hapot. Ipinag-iba niya an dakulang grupo nin mga katabang, saka mga kamelyo na may kargang mga pahamot, dakul na bulawan asin mga mahalagang bato. Kan mag-abot an reyna, sinaro-saro niya ki Solomon an gabos na hapot na nasa isip niya.

² Sinimbag ni Solomon an gabos na kahapotan niya; mayo nin hapot na dai niya nasimbag.

³ Nadangog kan reyna nin Sheba an kadonongan ni Solomon asin nahiling niya an palasyo na ipinatugdok kaini.

⁴ Nahiling niya an pagkakan sa saiyang lamesa, an mga erokan kan saiyang mga opisyal, an paglingkod kan mga sorogoon kan hade saka an saindang mga gubing, an mga naglilingkod sa lamesa kan hade saka an saindang mga gubing, asin an mga tinutong na atang na idinolot kaini sa Templo. Kaya kanigoan nanggad an saiyang pagngalas.

⁵ Nagsabi siya sa hade, “Totoo an baretang nadangog ko sa sakuyang daga manongod sa mga ginibo mo saka manongod sa saimong kadonongan,

⁶ alagad dai ako nagtubod sa mga bareta sagkod na nagdigdi ako dangan nahiling ko mismo. An nadangog ko kabanga sana kan saimong kadonongan; nangongorog pa sa ibinareta sako an kadonongan mo.

⁷ Paladan an saimong mga tawohan na danay na naglilingkod sa atubangan mo asin naghihinanyog kan saimong kadonongan!

⁸ Pag-omawon an Kagurangnan na saimong Dios, na nawiwili saimo asin nagpapatukaw saimo sa saiyang trono bilang hade sa ngaran niya. Huli ta namomotan niya an Israel asin boot niya sindang danay na atamanon, kaya ginibo ka niyang hade ninda tanganing mapadanay mo an hustisya saka an katanosan.”

⁹ Dangan tinawan si Hadeng Solomon kan reyna nin sobra sa kwatro mil na kilo nin bulawan asin kadakul na mga pahamot saka mahalagang mga bato; mayong makakadaog sa mga pahamot na itinao kan reyna nin Sheba ki Solomon. (

¹⁰ An mga sorogoon ni Hiram saka ni Solomon, na nagdara nin bulawan hale sa Ofir, nagdara man nin mga kahoy na algum asin mahalagang mga bato.

¹¹ An mga kahoy na algum ginamit ni Hadeng Solomon sa paggibo kan mga hagdan kan Templo asin kan saiyang palasyo; ini man an ginamit niya sa paggibo nin mga lira saka mga arpa para sa mga paraawit. Mayo pang nahiling na arog kaini sa daga nin Juda.)

¹² Itinao ni Hadeng Solomon sa reyna nin Sheba an gabos na hinagad kaini, laen pa kan itinao niya digding mga regalo bilang karibay kan mga dinara saiya. Dangan nagbalik an reyna sa sadiri niyang daga, kaiba an saiyang mga sorogoon.

An Kayamanan ni Solomon

¹³ An bulawan na nakukua ni Solomon sa laog nin sarong taon minaabot sa beynte y tres mil na kilo,

¹⁴ laen pa kan mga buhis na ibinabayad kan manlaen-laen na mga negosyante. An gabos na hade nin Arabia saka an mga gobernador sa daga nin Israel nagdara man nin mga bulawan asin plata ki Solomon.

¹⁵ Naggibo si Solomon nin dos syentos na darakulang kalasag na pinolpog na bulawan, na an lambang saro maabot sa pitong kilong pinolpog na bulawan.

¹⁶ Naggibo man siya nin tres syentos na saradit na kalasag na pinolpog na bulawan, na an lambang saro maabot sa tolong kilo nin pinolpog na bulawan. Ipinabugtak niya ini gabos duman sa Sala kan Kadlagan nin Lebanon.

¹⁷ An hade naggibo man nin sarong dakulang marpil na trono na kinalopkopan nin purong bulawan.

¹⁸ An trono igwa nin anom na tangga saka sarong bulawan na tungtongan na kasugpon kan trono. Igwa nin mag-ibong na pasunadan nin braso an trono, asin may nakatindog na pigura nin leon sa kataed kan lambang pasunadan.

¹⁹ Doseng pigura nin leon an nasa mga tangga; duwang leon sa mag-ibong na poro kan lambang tangga. Mayo pang ginibong trono na arog kaini sa arin man na kahadean.

²⁰ An gabos na kalis na pinag-iinoman ni Hadeng Solomon gibo sa bulawan; an mga kagamitan sa Sala kan Kadlagan nin Lebanon gibo sa purong bulawan. Kan panahon ni Solomon, bakong mahalaga an plata,

²¹ huli ta an mga barko kan hade minaduman sa Tarsis kaiba kan mga sorogoon ni Hiram, dangan lambang ikatolong taon, minabalik hale sa Tarsis na may darang bulawan, plata, marpil, mga kabalang asin mga ukay.

²² Si Hadeng Solomon iyo an pinakamayaman asin pinakamadonong sa gabos na hade sa kinaban.

²³ An mga hadeng ini nagdolok saiya tanganing madangog an kadonongan na itinao saiya nin Dios.

²⁴ An lambang saro sainda nagdara nin regalo—mga bagay na gibo sa plata saka bulawan, mga gubing, mira, pahamot, mga kabayo asin mga mula. Ginibo ninda ini taon-taon.

²⁵ Igwa man si Solomon nin kwatro mil na kwadra para sa mga kabayo saka mga karwahe, dangan dose mil na mga parakabayo. An iba kaini ibinugtak niya sa Jerusalem asin an iba ibinugtak niya sa manlaen-laen na syudad.

²⁶ Pinamayohan niya an gabos na hade magpoon sa Salog nin Eufrates sagkod sa daga kan mga Filisteo asin sa pagdolonan kan Egipto.

²⁷ Kan panahon nin saiyang paghahade, an plata ordinaryo sanang bagay sa Jerusalem arog kan gapo, asin an sedro arog kadakul sa sikomoro duman sa Sefela.

²⁸ An mga kabayo ni Solomon pinakua pa niya hale sa Egipto asin sa ibang mga nasyon.

Pinahalipot na Istorya kan Paghahade ni Solomon

²⁹ An iba pang mga ginibo ni Solomon, magpoon sa kapinonan sagkod sa kataposan, nasusurat sa An Kasaysayan ni Natan na Propeta, asin sa An Propesiya ni Ahias kan Shilo, patin sa An mga Bisyon ni Iddo na Propeta, na nag-iistorya man kan paghahade sa Israel ni Jeroboam na aking lalaki ni Nebat.

³⁰ Kwarentang taon niyang pinaghadean an Israel duman sa Jerusalem.

³¹ Nagadan siya asin ilinubong sa Syudad ni David. Nagin kasalihid niya bilang hade an saiyang aking si Rehoboam.