2 Mga Cronica 4 - Marahay na Bareta Biblia

Mga Kagamitan para sa Templo

¹ Nagpagibo si Solomon nin bronseng altar, na siyam na metros an laba, siyam na metros an lakbang asin apat may kabangang metros an langkaw.

² Nagpagibo man siya nin sarong bilog na bronseng tangke na duwang metros may beynte sentimetros an rarom, apat na metros may kwarenta sentimetros an hiwas asin trese metros may beynte sentimetros an pabilog na sukol.

³ Sa palibot, sa luwas na parte kan tangke, igwa nin duwang raya nin mga samno, an sarong raya nasa ibabaw kan saro. An mga samno porma nin baka na hinaman sa saro sanang pedaso nin bronse kaiba an bilog na tangke.

⁴ An tangke nakatumbaw sa likod nin doseng bronseng baka na an tolo nakaatubang sa amihan; an tolo sa solnopan, an tolo sa habagat asin an tolo sa sirangan; nagtataralikodan an gabos na baka.

⁵ Setenta y singko milimetros an hibog kan tangke; an porma kan ngabil kaini arog sa ngabil nin sarong kalis, siring sa bukad na burak nin liryo. An tangke pwedeng malaogan nin sesenta mil na litrong tubig.

⁶ Nagpagibo man siya nin sampolong palangganang hanawan. An lima kaini ibinugtak niya sa parteng habagat kan Templo, an lima sa parteng amihan. Gagamiton an mga ini sa pagbalnaw kan mga kabtang kan mga hayop na tinutong bilang sakripisyo, mantang an tubig sa laog kan tangke iyo an gagamiton sa paghanaw kan mga padi.

⁷ Nagpagibo man si Solomon nin sampolong bulawan na kandelero, sosog sa kinaugalean na paggibo kan mga ini, asin ipinabugtak niya sa Templo, lima sa parteng habagat asin lima sa parteng amihan.

⁸ Nagpagibo pa siya nin sampolong lamesa na ipinabugtak man niya sa Templo, lima sa parteng habagat asin lima sa parteng amihan. Dangan nagpagibo siya nin sanggatos na bulawan na mangko.

⁹ Nagpagibo siya nin panlaog na patyo para sa mga padi asin saro pang panluwas na patyo. An mga pinto kan mga patyong ini ipinapatos niya sa bronse.

¹⁰ An tangke ipinabugtak niya sa habagat-sirangan na kanto kan Templo.

¹¹ Naggibo man si Huram nin mga kaldero, mga pala asin mga mangko. Tinapos niya an gabos na ipinagibo saiya ni Hadeng Solomon para sa Templo nin Dios:

^12-16 An duwang harigi An duwang kapitel na pormang mangko sa ibabaw kan mga harigi An sinalapid na mga kadena para sa mga kapitel; An kwatro syentos na granadang pansamno, duwang raya nin granada para sa sarong kadenang nasa lambang kapitel An sampolong kariton An sampolong palanggana An tangke An doseng baka na natutumbawan kan tangke An mga kaldero, mga pala asin mangko An mga kagamitan na ini para sa Templo, na ipinagibo ni Hadeng Solomon ki Huram gabos gibo sa makintab na bronse.

¹⁷ An mga kagamitan na ini ipinagibo gabos ni Hadeng Solomon duman sa Kapantayan nin Jordan, sa lugar na tunawan nin metal sa pagultanan kan Sukkot asin Zereda.

¹⁸ Dakul na kagamitan an ginibo kaya dai na naaraman an kabilogan na timbang kan ginamit na bronse.

¹⁹ Nagpagibo man si Solomon nin bulawan na mga kagamitan para sa Templo: an altar, an mga lamesa para sa mga tinapay na dolot sa Dios;

²⁰ an mga kandelero asin an mga ilawan na gibo sa purong bulawan na maglalaad sa atubangan kan Kabanal-banaleng Lugar, sosog sa plano;

²¹ an mga burak, an mga ilawan asin an mga pansipit;

²² an mga pamalsok kan ilaw, an mga mangko, an mga plato para sa insenso, asin an mga bugtakan nin baga. Gabos ini gibo sa purong bulawan. An mga pinto sa luwas kan Templo asin an mga pinto pasiring sa Kabanal-banaleng Lugar pinatos sa bulawan.