2 Mga Cronica 36 - Marahay na Bareta Biblia

Si Hadeng Joahaz nin Juda

¹ Pinili kan banwaan nin Juda si Joahaz, na aking lalaki ni Josias, asin ginibong hade nin Jerusalem bilang kasalihid kan saiyang ama.

² Beynte y tres na taon an edad ni Joahaz kan siya magin hade nin Juda, asin tolong bulan siyang naghade sa Jerusalem.

³ Binihag siya ni Neco na hade nin Egipto dangan ibinilanggo. Pinapagbuhis ni Neco an Juda nin tres mil kwatro syentos kilos nin plata asin treynta y kwatrong kilo nin bulawan.

⁴ Si Eliakim, na tugang na lalaki ni Joahaz, iyo an ibinugtak ni Neco bilang hade nin Juda saka nin Jerusalem asin an ngaran kaining Eliakim rinibayan niya nin Jehoiakim. Si Joahaz dinara ni Neco sa Egipto.

Si Hadeng Jehoiakim nin Juda

⁵ Beynte y singkong taon an edad ni Jehoiakim kan siya magin hade nin Juda, asin onseng taon siyang naghade sa Jerusalem. Ginibo niya an maraot sa atubangan kan Kagurangnan na saiyang Dios.

⁶ Sinalakay ni Hadeng Nebukadnezzar nin Babilonia an Juda, binihag si Jehoiakim, dangan nakakadenang dinara sa Babilonia.

⁷ Dinara man ni Nebukadnezzar an ibang mga kagamitan sa Templo dangan ibinugtak sa saiyang palasyo duman sa Babilon.

⁸ An iba pang ginibo ni Jehoiakim, kaiba an saiyang makauuyam na mga gawe asin an karatan na ginibo niya, gabos nasusurat sa An Kasaysayan kan mga Hade nin Israel saka Juda. Si Jehoiakin na saiyang aking lalaki iyo an nagsalihid saiya bilang hade.

Si Hadeng Jehoiakin nin Juda

⁹ Dyes y otsong taon an edad ni Jehoiakin kan siya magin hade nin Juda, asin tolong bulan saka sampolong aldaw siyang naghade sa Jerusalem. Ginibo niya an maraot sa atubangan kan Kagurangnan.

¹⁰ Kan magpoon na an tig-init, binihag ni Hadeng Nebukadnezzar si Jehoiakin asin dinara sa Babilonia, kaiba an mga kayamanan sa Templo nin Kagurangnan. Dangan si Zedekias, na tiyo ni Jehoiakin, iyo an ginibo ni Nebukadnezzar na hade nin Juda saka Jerusalem.

Si Hadeng Zedekias nin Juda

¹¹ Beynte y unong taon an edad ni Zedekias kan siya nagin hade sa Juda, asin onseng taon siyang naghade sa Jerusalem.

¹² Ginibo niya an maraot sa atubangan kan Kagurangnan. Dai siya nagpakumbaba sa propetang si Jeremias na nagtaram sa ngaran nin Kagurangnan.

An Pagkarumpag kan Jerusalem

¹³ Nagrebelde si Zedekias laban ki Hadeng Nebukadnezzar na nagpirit saiya na magsumpa sa ngaran nin Dios na siya magigin maimbod ki Nebukadnezzar. Nagin matagas an saiyang puso asin nagsayuma siyang magbalik sa Kagurangnan, an Dios nin Israel.

¹⁴ An mga lider nin Juda, an mga padi asin an bilog na banwaan dai man nagin maimbod sa Kagurangnan, kundi nagsunod sa makauuyam na mga gawe kan ibang mga nasyon, kaya nadigtaan ninda an Templo na an Kagurangnan mismo an nagpabanal.

¹⁵ An Kagurangnan, an Dios kan saindang mga ginikanan, danay na nagsugo nin mga propeta tanganing patanidan sinda, huli ta boot niyang iligtas sinda saka an Templo.

¹⁶ Alagad pinag-olog-olog ninda an mga sugo nin Dios, dai dinangog an mga tataramon kan mga ini, saka pinagtuyatuya an mga propeta nin Kagurangnan sagkod na naanggot siya sainda nin makuri, asin dai na nanggad nin paagi na makadulag sinda sa saiyang kaanggotan.

¹⁷ Kaya dinara nin Kagurangnan an hade nin Babilonia tanganing salakayon sinda. Ginadan kan hade an gabos na hoben na lalaki nin Juda maski an mga yaon duman sa Templo. Dai siya naherak sa kiisay man, aki man o gurang, lalaki man o babae; an gabos itinao nin Dios sa saiyang mga kamot.

¹⁸ Sinamsaman kan hade nin Babilonia an Templo nin Kagurangnan; dinara niya sa Babilon an gabos na kayamanan sa Templo, siring man an kayamanan kan hade asin kan mga opisyal kaini.

¹⁹ Sinulo niya an Templo, rinumpag an mga kudal nin Jerusalem, sinulo an mga palasyo asin an gabos na kayamanan duman.

²⁰ An mga natadang buhay dinara niya sa Babilonia bilang mga bihag, asin nagin mga oripon niya saka kan saiyang mga kapagarakian, sagkod kan pagkosog kan Imperyo nin Persia.

²¹ Kaya naotob an sinabi nin Kagurangnan sa paagi ni Jeremias: “An daga magigin alang sa laog nin setentang taon tanganing mabayadan an dai pag-otob kan pagpahingalo kun Sabbath.”

Pinagbotan ni Ciro an mga Judio na Magbalik sa Jerusalem

²² Kan enot na taon kan si Ciro nin Persia iyo an emperador, ginibo nin Kagurangnan na magkatotoo an itinaram niya sa paagi ni propeta Jeremias. Pinasabongan nin Kagurangnan si Ciro kaya nagpaluwas ini nin sarong pagboot para sa bilog niyang kahadean. Ini an nasusurat sa pagboot:

²³ “Ini an pagboot ni Ciro na emperador nin Persia: An Kagurangnan, an Dios nin langit, iyo an nagtao sako kan gabos na kahadean sa daga asin pinagbotan ako na magtugdok nin sarong templo para saiya duman sa Jerusalem sa Juda. Magduman kamo sa Jerusalem, kamo gabos na saiyang banwaan, asin ibahan logod kamo nin Kagurangnan na saindong Dios.”