2 Mga Cronica 33 - Marahay na Bareta Biblia

Si Hadeng Manases nin Juda

¹ Doseng taon an edad ni Manases kan siya magin hade nin Juda, asin singkwenta y singkong taon siyang naghade sa Jerusalem.

² Nagkasala siya sa Kagurangnan huli ta nagsunod siya kan makauuyam na mga gawe kan mga nasyon na pinahale nin Kagurangnan mantang nagdadangadang an banwaan nin Israel.

³ Ipinatugdok niya giraray an paganong mga lugar na pagsasambahan na ginaba kan saiyang ama na si Ezekias. Nagtugdok siya nin mga altar para ki Baal asin naggibo nin mga ladawan kan diosang si Asera; nagsamba saka naglingkod siya sa mga bitoon.

⁴ Naggibo siya nin paganong mga altar sa laog kan Templo, an lugar na sinabi nin Kagurangnan na dapat pagsambahan saiya sagkod pa man.

⁵ Sa duwang patyo kan Templo, nagpagibo siya nin mga altar para sa pagsamba kan mga bitoon.

⁶ Isinakripisyo niya an saiyang mga aking lalaki bilang mga tinutong na atang duman sa Kapantayan nin Hinnom. Naghula siya, nagsalamangka asin nangkulam. Nakihumapot siya sa mga parahula asin sa mga tawong nakikipag-olay sa mga espiritu. Nagkasala siya nin makuri sa Kagurangnan, na pinaanggot niya nin marahay.

⁷ An imahen kan dios-dios na saiyang ginibo, ibinugtak ninda sa laog kan Templo, sa lugar na iyo an sinabi nin Dios kan siya magtaram ki David asin ki Solomon na aki kaini: “Digdi sa Templong ini, asin sa Jerusalem na pinili ko hale sa gabos na tribu nin Israel, ibubugtak ko an sakong ngaran sagkod pa man.

⁸ Kun otobon nin Israel an gabos kong togon saka mga pagboot na itinao sainda ni Moises, dai ko na tutugotan na mapahale pa sinda sa daga na itinao ko sa saindang mga ginikanan.”

⁹ Dinagka ni Manases na magkasala an mga banwaan nin Juda saka nin Jerusalem, kaya nagin mas makuri an kasalan na ginibo ninda ki sa kasalan kan mga nasyon na pinahale nin Kagurangnan mantang nagdadangadang an banwaan nin Israel.

Nagbakle si Manases

¹⁰ Maski pinatanidan nin Kagurangnan si Manases asin an saiyang banwaan, alagad dai sinda nagdangog.

¹¹ Kaya dinara nin Kagurangnan sa Juda an mga pamayo kan hukbo nin Asiria. Dinakop ninda si Manases sa paagi nin mga kawit saka kinadenahan dangan dinara sa Babilon.

¹² Sa saiyang pagtios, nagin mapakumbaba siya sa Dios nin saiyang mga ginikanan asin naghagad nin tabang.

¹³ Dinangog nin Dios an saiyang pamibi asin tinugotan siyang makabalik sa Jerusalem, sa saiyang kahadean. Dangan naaraman ni Manases na an Kagurangnan iyo an Dios.

¹⁴ Pakatapos kaini, nagtugdok si Manases nin sarong panluwas na kudal para sa Syudad ni David, sa parteng solnopan, poon sa kapantayan na harani sa Burabod nin Gihon sagkod sa Trangkahan nin Sira asin sa palibot kan syudad nin Ofel. Pinahalangkaw niya an panluwas na kudal na ini asin nagbugtak siya nin mga opisyal nin hukbo sa gabos na pinapusog na syudad nin Juda.

¹⁵ Hinale niya sa Templo an dayuhan na mga dios-dios asin an ladawan na ibinugtak niya duman. Hinale man niya an mga altar na ginibo niya sa bukid na namumugtakan kan Templo asin sa iba pang mga lugar sa Jerusalem. Dinara niya idto gabos sa luwas kan syudad dangan itinapok.

¹⁶ Hinirahay man niya an altar nin Kagurangnan saka nagdolot siya duman nin mga sakripisyo, mga dolot para sa katoninongan asin mga dolot nin pasasalamat. Pinagbotan niya an Juda na maglingkod sa Kagurangnan, an Dios nin Israel.

¹⁷ Maski padagos an mga tawo sa pagdolot nin mga sakripisyo sa ibang lugar na pagsasambahan, ginibo ninda ini para sana sa Kagurangnan, na saindang Dios.

An Kataposan kan Paghahade ni Manases

¹⁸ An iba pang ginibo ni Manases, an saiyang pamibi sa saiyang Dios, asin an mga mensahe saiya kan mga propeta na nagtaram sa ngaran nin Kagurangnan, an Dios nin Israel, gabos nasusurat sa An Kasaysayan kan mga Hade nin Israel.

¹⁹ Nasusurat sa An Kasaysayan kan mga Propeta an saiyang pamibi, kun paano siya sinimbag nin Dios, an gabos niyang kasalan, an paganong mga lugar na pagsasambahan na ipinatugdok niya, an mga imahen kan diosang si Asera saka an mga dios-dios na saiyang sinamba asin an gabos niyang ginibong karatan bago siya nagpakumbaba saka nagbakle.

²⁰ Nagadan si Manases asin ilinubong sa saiyang palasyo. Si Amon na saiyang aking lalaki iyo an nagsalihid saiya bilang hade.

Si Hadeng Amon nin Juda

²¹ Beynte y dos na taon an edad ni Amon kan siya magin hade nin Juda, asin duwang taon siyang naghade sa Jerusalem.

²² Arog kan saiyang ama na si Manases, nagkasala siya sa Kagurangnan. Nagdolot si Amon nin mga sakripisyo sa gabos na imahen na ginibo kan saiyang ama na si Manases, dangan pinaglingkodan an mga imahen.

²³ Alagad bako siyang arog kan saiyang ama na nagpakumbaba saka nagbalik sa Kagurangnan; dai siya nagpakumbaba kundi orog na nagkasala.

²⁴ Pinasaluiban si Amon kan saiyang mga opisyal asin ginadan duman sa palasyo.

²⁵ Alagad ginadan kan mga tawo an mga nagpasaluib ki Amon, asin si Josias na saiyang aking lalaki iyo an ginibo nindang hade bilang kasalihid niya.