2 Mga Cronica 32 - Marahay na Bareta Biblia

Tinakot kan mga taga Asiria an Jerusalem

¹ Pakatapos kan mga pangyayaring ini, na ipinahiling ni Hadeng Ezekias an saiyang maimbod na paglingkod sa Kagurangnan, sinalakay ni Senakerib, na emperador nin Asiria an Juda. Nagkampo siya sa palibot kan pusog na mga syudad sa paghona na manggagana an saiyang hukbo.

² Kan mahiling ni Ezekias na boot salakayon ni Senakerib an Jerusalem,

^3-4 nagdesisyon siya asin an saiyang mga opisyal na sulaton an mga burabod na nagtatao nin tubig sa luwas kan syudad, tanganing dai magkaigwa nin tubig an mga taga Asiria kun makaharani an mga ini sa Jerusalem. Pinangenotan kan mga opisyal an sarong dakulang grupo nin mga tawo paluwas kan syudad dangan sinulat an gabos na burabod nin tubig duman.

⁵ Pinakosog kan hade an syudad sa paagi nin paghirahay kan kudal, pagtugdok nin mga tore sa ibabaw kan kudal, asin pagtugdok nin saro pang panluwas na kudal. Laen pa kaini, hinirahay man niya an mga depensa na itinugdok sa lugar na tambakan nin daga sa sirangan na parte kan lumang kabtang nin Jerusalem. Nagpagibo man siya nin dakul na armas saka mga kalasag.

⁶ An gabos na lalaki sa syudad ibinugtak niya sa pamamahala kan mga opisyal kan hukbo. Tinipon niya sinda sa plasa na harani sa trangkahan kan syudad dangan sinabihan,

⁷ “Magmakosog kamo saka magmaisog. Dai kamo matakot sa emperador nin Asiria asin sa bilog na hukbo na kaiba niya, huli ta kaiba ta an sarong mas dakula ki sa kaibahan niya.

⁸ Kaiba niya an kosog nin tawo, alagad kaiba ta an Kagurangnan na satuyang Dios, na matabang satuya asin makikilaban kan satuyang mga gera.” Napakosog an boot kan mga tawo kan mga tataramon na ini ni Ezekias na hade nin Juda.

⁹ Dangan mantang yaon pa duman sa Lakis si Senakerib asin an saiyang hukbo, nagpadara siya kaining mensahe ki Ezekias asin sa mga taga Juda na kaiba kaini duman sa Jerusalem:

¹⁰ “Ako, si Senakerib, an emperador nin Asiria, naghahapot kun ano an sinasarigan nindo, kaya nagpawalat kamo sa Jerusalem na napapalibotan na.

¹¹ Sinabihan kamo ni Ezekias na ililigtas kamo kan Kagurangnan na saindong Dios sa samong mga kamot; alagad dinadaya niya kamo asin boot niyang magadan kamo sa gutom saka sa paha.

¹² Siya an nagrumpag kan mga altar saka mga lugar na pagsasambahan sa Kagurangnan, dangan nagboot sa banwaan nin Juda asin Jerusalem na sa saro sanang altar dapat magsamba asin magtutong nin insenso.

¹³ Dai nindo naaaraman an ginibo ko asin kan sakuyang mga ginikanan sa gabos na tawo kan ibang mga nasyon? Ikinaligtas daw samo kan mga dios kan mga nasyon na idto an saindang mga daga?

¹⁴ Siisay sa mga dios kan mga nasyon na idto, na rinonot kan samong mga ginikanan, an nagligtas kan saiyang banwaan sa sakong kamot? Kun siring, tadaw ta naghohona kamo na ikakaligtas kamo samo kan saindong dios?

¹⁵ Kaya dai kamo magpadaya o magpadagka ki Ezekias sa siring na paagi. Dai kamo magtubod saiya, huli ta mayo pang dios nin arin man na nasyon o kahadean na nagligtas kan saiyang banwaan sa sakong kamot o sa kamot kan sakuyang mga ginikanan. Kaya dai man kamo ikakaligtas sa sakong mga kamot kan saindong dios!”

¹⁶ Mas maraot pa an sinabi kan mga opisyal nin Asiria tumang sa Kagurangnan Dios asin tumang ki Ezekias na sorogoon nin Kagurangnan.

¹⁷ Naggibo si Senakerib nin mga surat na naglalanghad sa Kagurangnan, an Dios nin Israel. Ini an laog kan surat, “Siring sa mga dios kan mga nasyon sa daga na dai ikinaligtas sa sakong mga kamot an saindang mga banwaan, an dios ni Ezekias dai man makakaligtas kan saiyang banwaan sa sakong mga kamot.”

¹⁸ Ikinurahaw ini kan mga opisyal sa lengwaheng Hebreyo tanganing matakot saka manluya an boot kan mga taga Jerusalem na yaon sa kudal kan syudad, tanganing pasil na masakop ninda ini.

¹⁹ Nagtaram sinda manongod sa Dios nin Jerusalem siring kan pagtaram ninda manongod sa mga dios-dios kan mga banwaan nin daga, mga dios-dios na gibo kan mga kamot nin tawo.

²⁰ Huli kaini, namibi saka naghagad nin tabang sa Dios si Ezekias asin an propetang si Isaias na aking lalaki ni Amoz.

²¹ An Kagurangnan nagsugo nin sarong anghel na guminadan kan gabos na soldados saka mga opisyal kan hukbo kan emperador nin Asiria. Kaya sa kasopogan nagbalik ini sa saiyang daga. Dangan kan magduman siya sa templo kan saiyang dios, binuno siya sagkod na magadan kan nagkapira niyang aking lalaki.

²² Sa paaging ini ilinigtas nin Kagurangnan si Ezekias saka an banwaan nin Jerusalem sa kamot ni Senakerib, an emperador nin Asiria asin sa kamot kan iba pa nindang mga kaiwal. Ginibo nin Kagurangnan na mamuhay sinda sa katoninongan kaiba an mga kataraed na nasyon.

²³ Dakul an nagduman sa Jerusalem na nagdadara nin mga dolot sa Kagurangnan asin nin mga regalo ki Ezekias na hade nin Juda, kaya poon kaidto inomaw si Ezekias kan gabos na nasyon.

An Helang asin an Kapaabaw-abawan ni Ezekias

²⁴ Kan panahon na idto, naghelang si Ezekias asin haros magadan siya. Namibi siya asin tinawan siya nin Kagurangnan nin sarong tanda na siya mararahay.

²⁵ Alagad huli sa kapaabaw-abawan, dai lamang nagpahiling si Ezekias nin anoman na pasasalamat sa ginibo saiya nin Kagurangnan. Kaya an kaanggotan nin Kagurangnan duminatong saiya, sa Juda asin sa Jerusalem.

²⁶ Sa kahuri-hurihi, nagpakumbaba si Ezekias asin an banwaan nin Jerusalem, kaya dai pinadusahan nin Kagurangnan an mga tawo mantang buhay pa si Ezekias.

An Kayamanan asin Kaomawan ni Ezekias

²⁷ Nagyaman nin marahay si Hadeng Ezekias asin inomaw kan gabos. Nagpagibo siya nin mga kwartong sarayan nin bulawan, plata, mga mahalagang bato, mga pahamot, mga kalasag, asin iba pang mahalagang mga kagamitan.

²⁸ Nagpagibo pa siya nin mga bodega nin mga mais, arak saka lana; nagpagibo man siya nin mga laoman para sa mga baka saka mga karnero.

²⁹ Tinawan siya nin Kagurangnan nin dakul na pagsadiri, mga karnero asin mga baka, kaya nagpatugdok siya nin dakul na syudad.

³⁰ An Ezekias na ini iyo an nagsulat kan agihan nin tubig na hale sa Burabod nin Gihon dangan pinabulos niya an tubig pasiring sa solnopan na parte kan Syudad ni David. Nagin mauswag si Ezekias sa gabos niyang gibo.

³¹ Kan magduman an mga sugo na mga taga Babilonia sa pagsiyasat kan mga nangyayari sa saiyang daga, pinabayaan nin Kagurangnan si Ezekias sa mga palakaw kaini tanganing baloon an hade asin aramon an nasa puso niya.

An Kataposan kan Paghahade ni Ezekias

³² An iba pang ginibo ni Ezekias asin an saiyang marahay na mga gawe gabos nasusurat sa An Bisyon kan Propetang si Isaias, na aking lalaki ni Amoz asin sa An Kasaysayan kan mga Hade nin Juda asin Israel.

³³ Nagadan si Ezekias asin ilinubong sa itaas na kabtang kan mga lulubngan kan mga aking lalaki ni David. Sa saiyang pagkagadan, tinawan siya nin dakulang kaomawan kan mga taga Juda asin kan mga taga Jerusalem. Si Manases na saiyang aking lalaki iyo an nagsalihid saiya bilang hade.