2 Mga Cronica 30 - Marahay na Bareta Biblia

Pag-andam para sa Paskwa

^1-3 Dai nakapagselebrar kan Paskwa an mga tawo sa tamang panahon sa enot na bulan, huli ta kulang an mga padi na nakapaglinig kan sadiri saka kulang an mga tawong nagtiripon sa Jerusalem. Kaya si Hadeng Ezekias, an saiyang mga opisyal asin an banwaan nin Jerusalem nagkaoroyon na selebraron an Paskwa sa ikaduwang bulan. Nagpasugo an hade sa gabos na banwaan nin Israel saka Juda. Nagpadara man siya nin mga surat para sa mga tribu nin Efraim saka Manases tanganing alokon sinda na magduman sa Templo sa Jerusalem sa pagselebrar kan Paskwa sa pag-omaw sa Kagurangnan, an Dios nin Israel.

⁴ Ikinaogma kan hade asin kan banwaan an saindang plano,

⁵ kaya inalok ninda an gabos na Israelita, poon sa Beer-sheba sagkod sa Dan, tanganing magtiripon sa Jerusalem sa pagselebrar kan Paskwa huli ta dai pa ninda ini pinagselebrar na igwa nin dakulang katiriponan sosog sa hinahagad kan Katogonan.

⁶ Naglibot sa bilog na Israel saka Juda an mga sugo dara an mga surat kan hade asin kan mga opisyal na nagpapahayag nin siring: “Banwaan nin Israel, nakaligtas kamo sa kamot kan mga hade nin Asiria. Kaya magbalik kamo sa Kagurangnan, an Dios ni Abraham, ni Isaac saka ni Jacob, asin mabalik man saindo an Dios.

⁷ Dai kamo mag-arog sa saindong mga ginikanan asin sa saindong mga kapwa Israelita, na dai nagin maimbod sa Kagurangnan na saindang Dios. Nahiling nindo an pagpadusa niya sainda.

⁸ Dai kamo magmatagas nin payo arog sainda, kundi magkuyog kamo saiya. Magdalaw kamo sa Templo sa Jerusalem, na sagkod pa man pinabanal nin Kagurangnan na saindong Dios, asin magsamba kamo saiya tanganing dai na siya maanggot saindo.

⁹ Huli ta kun magbalik kamo sa Kagurangnan, an saindong mga kadugo asin mga aki maheherakan kan mga nagbihag sainda, dangan papabalikon sinda sa dagang ini. Maugayon asin maheherakon an Kagurangnan na saindong Dios, kaya aakoon niya kamo kun magbalik kamo saiya.”

¹⁰ An mga sinugo naglibot sa lambang syudad sa bilog na teritoryo kan mga tribu ni Efraim saka ni Manases, sagkod sa harayong tribu ni Zabulon, alagad pinagngisihan asin pinagtuyatuya sinda kan mga tawo.

¹¹ Kadikit sana sa mga tribu ni Asher, ni Manases saka ni Zabulon an nagpakumbaba dangan nagduman sa Jerusalem.

¹² Pinangyari nin Dios na magkasararo an mga taga Juda sa pagkuyog kan saiyang kabotan huli sa pagsunod kan pagboot kan hade asin kan mga opisyal kaini.

Sinelebrar an Paskwa

¹³ Dakul na tawo an nagtiripon sa Jerusalem sa pagselebrar kan Pyesta nin Tinapay na mayo nin Lebadura kan ikaduwang bulan.

¹⁴ Kinua ninda an mga altar na ginamit sa Jerusalem sa pagdolot nin mga atang asin sa pagtutong nin insenso, dangan tinapok ninda ini gabos sa Kapantayan nin Kidron.

¹⁵ Kan ikakatorseng aldaw kan bulan, binuno ninda an Korderong Pangpaskwa. Nasopog an mga Levita sagkod an mga padi na maati sosog sa seremonya nin paglinig, kaya kinonsagra ninda an saindang sadiri dangan nagdara sinda sa Templo nin mga tinutong na atang.

¹⁶ Nagbalik sinda sa dati nindang lugar sa Templo sosog sa Katogonan ni Moises, an sorogoon nin Dios. Iwinirik sa altar kan mga padi an dugo kan mga hayop na itinao sainda kan mga Levita.

¹⁷ Huli ta kadakul sa mga tawong nagtiripon an bakong malinig, dai sinda nagbuno kan mga Korderong Pangpaskwa, kaya an mga Levita an nagbuno kan mga hayop para sainda dangan kinonsagra ninda an mga kordero sa Kagurangnan.

¹⁸ Dakul man sa mga gikan sa mga tribu nin Efraim, Manases, Issakar saka Zabulon an dai naglinig kan sadiri, kaya dai sinda nakasunod kan pagboot sa Paskwa. Alagad ipinamibi sinda ni Ezekias,

¹⁹ “O Kagurangnan, Dios nin samuyang mga ginikanan, sa saimong pagkamarahayon patawada an mga nagsasamba saimo nin tudok sa puso, maski dai sinda nakapag-otob kan mga pagsusundon manongod sa paglinig.”

²⁰ Dinangog nin Kagurangnan an pamibi ni Ezekias kaya dai niya pinadusahan an mga tawo.

²¹ Pitong aldaw na maogmang pinagselebrar kan mga tawo na nagtiripon sa Jerusalem an Pyesta kan Tinapay na mayo nin Lebadura. Sa bilog na kosog, aroaldaw na nag-omaw sa Kagurangnan an mga Levita saka mga padi.

²² Inomaw ni Ezekias an mga Levita huli kan saindang kakayahan sa paglingkod sa Kagurangnan. Pakatapos kan pitong aldaw na pagdolot nin mga atang saka pag-omaw sa Kagurangnan, an Dios kan saindang mga ginikanan,

An Ikaduwang Selebrasyon

²³ nagka-oroyon an mga tawo na ipadagos an pyesta nin pito pang aldaw; kaya maogma sindang nagpadagos kan selebrasyon.

²⁴ Nagtao si Hadeng Ezekias nin sangribong torong baka saka syete mil na karnero tanganing bunoon dangan kakanon kan mga tawo. Nagtao man an mga opisyal nin sangribong torong baka saka dyes mil na karnero. Dakul na padi an nagkonsagra kan saindang sadiri.

²⁵ Nag-ogma an gabos—an bilog na banwaan nin Juda, an mga padi, an mga Levita, an gabos na naggikan sa Israel asin an mga dayuhan na nag-erok sa Israel asin sa Juda.

²⁶ Nagkaigwa nin dakulang kaogmahan sa Jerusalem, huli ta dai pa nagkaigwa nin siring na pangyayari magpoon kan panahon ni Hadeng Solomon na aki ni David.

²⁷ Dangan hinagad sa Kagurangnan kan mga padi asin kan mga Levita na bendisyonan an banwaan. Sa langit na saiyang erokan nadangog dangan inako nin Dios an saindang pamibi.