2 Mga Cronica 3 - Marahay na Bareta Biblia

¹ Itinalaan na ni David, na ama ni Solomon, kun saen itutugdok an Templo. Duman ini itutugdok sa Jerusalem, sa ibabaw kan Bukid nin Moria, saen nagpahiling ki David an Kagurangnan, sa lugar na ginamit ni Arauna na Jebuseo bilang ginikan. Pinonan ni Solomon an pagtugdok kan Templo

² kan ikaduwang bulan, kan ikaapat na taon nin saiyang paghahade.

³ An Templo nin Dios na ipinatugdok ni Hadeng Solomon igwa nin sukol na beynte y syete metros an laba asin siyam na metros an lakbang.

⁴ An balkon sa atubangan kan Templo igwa nin sukol na siyam na metros an laba, siring kan lakbang kan mismong Templo, asin singkwenta y kwatro metros an langkaw. An lanob kan balkon pinatos niya nin purong bulawan.

⁵ An pinakakwarto kan Templo linanoban niya nin mga kahoy na sedro, na napapatos nin purong bulawan na may desenyong mga kahoy na palma saka mga kadena.

⁶ An Templo sinamnohan kan hade nin mga mahalagang bato, saka bulawan na hale pa sa Parvaim.

⁷ Bulawan an ginamit niyang pamatos sa mga lanob kan Templo, sa mga kahabaan, sa mga laogan saka sa mga pinto. An mga lanob pinaukitan niya nin mga kerubin.

⁸ An pinakalaog na kwarto, an Kabanal-banaleng Lugar, may sukol na siyam na metros an laba, pareho kan lakbang kan Templo, asin siyam na metros an lakbang. Sobra sa beynte toneladang bulawan an ginamit sa pagpatos kan mga lanob kan Kabanal-banaleng Lugar.

⁹ An timbang kan bulawan na ginamit sa paggibo nin mga pako uminabot sa kinyentos setenta gramos. An mga lanob kan mga kwarto sa itaas pinatos man nin bulawan.

¹⁰ Nagpagibo man an hade nin duwang metal na kerubin na pinatos nin bulawan. Ipinabugtak niya an mga ini sa laog kan Kabanal-banaleng Lugar,

^11-13 magkataed na nagtitindog asin nakaatubang sa balkon. An lambang kerubin igwa nin duwang pakpak, na gabos nakaunat. An lambang pakpak igwa nin sukol na dos metros, beynte sentimetros an laba, na nakaunat kaya nagdudutaan sa tahaw kan kwarto an poro kan tigsaro nindang pakpak, asin nakaduta sa mag-ibong na lanob an poro kan ikaduwa nindang pakpak. Kaya siyam na metros an natatahoban kan saindang mga pakpak.

¹⁴ Nagpagibo man siya nin sarong panlipod na kurtina para sa Kabanal-banaleng Lugar; ini ginibo sa pinong lino asin sa mga telang lana na kolor asul, purpura saka pula, dangan igwa nin disenyong mga kerubin.

An Duwang Bronseng Harigi

¹⁵ Sa atubang kan Templo nagpagibo siya nin duwang harigi na kinse may kabangang metros an langkaw kan lambang saro. An lambang harigi igwa nin kapitel na duwang metros, beynte sentimetros an langkaw.

¹⁶ Nagpagibo siya nin sinalapid na mga kadena dangan ikinabit niya ini na garo mga kulintas sa mga kapitel kan mga harigi. Nagpagibo man siya nin sanggatos na bronseng granada asin ikinabit niya sa mga kadena.

¹⁷ Pinatindog niya sa atubangan kan Templo an mga harigi, saro sa habagat na nginaranan Jakin, asin saro sa amihan na nginaranan Boaz.