2 Mga Cronica 29 - Marahay na Bareta Biblia

Si Hadeng Ezekias nin Juda

¹ Beynte y singkong taon an edad ni Ezekias kan siya magin hade, asin beynte y nuebeng taon siyang naghade sa Jerusalem. An saiyang ina iyo si Abias na aki ni Zacarias.

² Ginibo niya an matanos sa atubang nin Kagurangnan, arog kan ginibo ni David na saiyang ginikanan.

An Paglinig kan Templo

³ Kan enot na bulan nin paghahade ni Ezekias, binukasan niya an mga pintoan kan Templo asin saiyang ipinahirahay.

⁴ An mga padi saka an mga Levita tinipon niya sa sirangan na parte kan patyo kan Templo

⁵ dangan sinabihan, “Dangoga nindo ako, mga Levita! Magpakabanal kamo asin pakabanalon nindo an Templo nin Kagurangnan, an Dios kan saindong mga ginikanan. Haleon nindo sa banal na lugar na ini an anoman na ati.

⁶ An satong mga ginikanan dai nagin maimbod asin ginibo ninda an dai nawiwilihan kan Kagurangnan na satuyang Dios. Binayaan ninda siya asin tinalikodan an saiyang erokan.

⁷ Sinerahan ninda an mga pintoan kan Templo, pinalsok an mga ilaw asin dai nagtutong nin insenso. Dai sinda nagdolot nin mga tinutong na atang sa Templo kan Dios nin Israel.

⁸ Kaya an kaanggotan nin Kagurangnan uminabot sa Juda saka sa Jerusalem, asin an ginibo niya sa mga ini nagin sarong bagay na pinagtakotan, nginalasan saka ikinasopog nin lambang saro, siring sa nahiling nindo.

⁹ An satong mga magurang nagadan sa ralaban asin an satong mga agom saka mga aki nabihag.

¹⁰ Nasa puso ko ngunyan an pakipagtipan sa Kagurangnan, an Dios nin Israel, tanganing dai na siya maanggot satuya.

¹¹ Mga aki ko, dai kamo magpabaya, huli ta kamo an pinili nin Kagurangnan na magtindog sa atubang niya, maglingkod saiya dangan magtutong nin insenso para saiya.”

¹² An mga Levita na yaon duman iyo si Mahat na aking lalaki ni Amasai saka si Joel na aking lalaki ni Azarias kan kamaganakan ni Kohat; si Kis na aking lalaki ni Abdi saka si Azarias na aking lalaki ni Jehallelel kan kamaganakan ni Merari; si Joa na aking lalaki ni Zimna saka si Eden na aking lalaki ni Joa kan kamaganakan ni Gerson;

¹³ si Simri saka si Jeuel kan kamaganakan ni Elizafan; si Zacarias saka si Matanias kan kamaganakan ni Asaf;

¹⁴ si Jehuel saka si Simei kan kamaganakan ni Heman; dangan si Semaias saka si Uzziel kan kamaganakan ni Jedutun.

¹⁵ Tinipon kan mga lalaking ini an kapwa ninda mga Levita asin naglinig sinda kan saindang sadiri. Dangan sa pagboot kan hade, lininigan ninda an Templo sosog sa Katogonan nin Kagurangnan.

¹⁶ An mga padi nagduman sa pinakalaog na kabtang kan Templo dangan lininigan ninda ini. Ilinuwas ninda sa Templo an gabos na ati asin dinara sa patyo kan Templo. Hale duman dinara ini kan mga Levita sa Kapantayan nin Kidron.

¹⁷ Pinonan ninda an paglinig kan Templo sa enot na aldaw kan enot na bulan, asin pag-abot kan ikawalong aldaw nalinigan na ninda an gabos sagkod an balkon kan Templo. Dangan sa laog nin walong aldaw inandam ninda an Templo para sa pagsamba, asin natapos an trabaho pag-abot kan ikadyes y seis na aldaw kan enot na bulan.

Kinonsagra giraray an Templo

¹⁸ Nagduman ki Hadeng Ezekias an mga Levita dangan nagsabi, “Nalinigan mi na an bilog na Templo, an altar para sa tinutong na atang asin an mga kagamitan kaini, sagkod an lamesa para sa mga dolot na tinapay asin an mga kagamitan kaini.

¹⁹ Ibinalik man nyamo saka kinonsagra an mga kagamitan na hinale ni Hadeng Ahaz kan bako na siyang maimbod sa Dios. Yaon an gabos na ini sa atubangan kan altar nin Kagurangnan.”

²⁰ Tinipon tolos ni Hadeng Ezekias an mga opisyal kan syudad, dangan nagduman sinda gabos sa Templo.

²¹ Nagdara sinda nin pitong torong baka, pitong karnero, pitong kordero saka pitong lalaking kanding bilang dolot para sa kasalan kan pamilya kan hade saka kan banwaan nin Juda, asin tanganing malinigan an Templo. Pinagbotan niya an mga padi, an mga kapagarakian ni Aaron, na idolot an mga hayop sa altar nin Kagurangnan.

²² Enot na binuno kan mga padi an mga baka, dangan an mga karnero saka an mga kordero; pakatapos, an dugo kan mga ini iwinirik ninda sa altar.

²³ Dangan dinara ninda an mga kanding sa hade asin sa katiriponan; idinuta kan gabos an saindang kamot sa payo kan mga kanding.

²⁴ Pakatapos, binuno kan mga padi an mga kanding, dangan an dugo kan mga ini inula ninda sa altar bilang atang para sa kasalan kan bilog na Israel, huli ta nagboot an hade na an tinutong na atang saka an dolot para sa kasalan kaipuhan iatang para sa bilog na Israel.

²⁵ Kinuyog kan hade an mga pagboot nin Kagurangnan na itinao ki Hadeng David sa paagi ni Gad, na propeta kan hade, asin sa paagi kan propeta na si Natan; nagbugtak siya nin mga Levita sa Templo, na may mga gimbal, mga arpa saka mga lira,

²⁶ mga instrumento na arog kan mga ginamit ni David. Yaon man duman an mga padi na may kapot na mga trompeta.

²⁷ Dangan nagboot si Hadeng Ezekias na idolot sa altar an mga tinutong na atang. Pagpoon kan pagdolot, nag-awit nin pag-omaw sa Kagurangnan an mga tawo, kasabay an tanog kan mga trompeta asin kan ibang mga instrumento nin musika.

²⁸ Nagsamba an bilog na katiriponan, mantang padagos an pag-awit saka an pagtugtog sagkod na matutong an gabos na sakripisyo.

²⁹ Dangan an hade asin an gabos na yaon duman nagduko sa pagsamba sa Dios.

³⁰ An mga Levita pinagbotan kan hade asin kan mga lider na awiton sa Kagurangnan an mga awit nin pag-omaw na sinurat ni David asin kan propeta na si Asaf. Nag-awit an gabos sa dakulang kaogmahan mantang nakadukong nagsasamba sa Dios.

³¹ Dangan nagsabi si Ezekias, “Kinonsagra na nindo an saindong sadiri sa Kagurangnan; dumolok kamo asin pagdara nin mga sakripisyo saka mga atang nin pasasalamat sa Templo.” Nagkuyog sinda, asin an nagkapira sainda boluntad na nagdara man nin mga hayop na isasakripisyo bilang tinutong na atang.

³² Nagdara an mga tawo nin setentang baka, sanggatos na karnero asin duwang gatos na kordero; ini gabos idinolot bilang mga tinutong na atang sa Kagurangnan.

³³ Nagdara man sinda nin mga dolot na kakakanon kan mga tawo: seis syentos na torong baka saka tres mil na mga karnero.

³⁴ Alagad kadikit sana an mga padi asin dai ninda kayang bunoon an gabos na hayop, kaya tinabangan sinda kan mga Levita sagkod na matapos an trabaho, asin sagkod na makapaglinig kan saindang sadiri an ibang mga padi. (Mas maimbod an mga Levita sa paglinig kan saindang sadiri ki sa mga padi.)

³⁵ Laen pa kan kadakul na tinutong na atang, igwa pa kan taba na dolot para sa katoninongan saka kan arak na kaiba kan mga tinutong na atang. Kaya nakabalik giraray sa dati an pagsamba sa Templo.

³⁶ Naogma si Hadeng Ezekias asin an banwaan huli ta tinabangan sinda nin Dios na magibo tolos an gabos na ini.