2 Mga Cronica 28 - Marahay na Bareta Biblia

Si Hadeng Ahaz nin Juda

¹ Beynteng taon an edad ni Ahaz kan siya magin hade, asin dyes y seis na taon siyang naghade sa Jerusalem. Dai niya inarog si David na saiyang ginikanan, kundi ginibo niya an bakong matanos sa atubang nin Kagurangnan

² asin sinunod niya an mga paarog kan mga hade nin Israel. Nagpagibo pa siya nin mga metal na ladawan ni Baal,

³ dangan nagtutong siya nin insenso sa Kapantayan nin Hinnom. Tinutong niya an sadiri niyang mga aking lalaki bilang mga atang, sa pag-arog kan makauuyam na mga gawe kan mga nasyon na pinahale nin Kagurangnan mantang nagdadangadang an banwaan nin Israel.

⁴ Nagdolot siya nin atang saka nagtutong nin insenso sa paganong mga lugar na pagsasambahan, sa kabubuldan, asin sa lindong kan lambang marambong na kahoy.

Pakigera sa Siria asin sa Israel

^5-6 Huli ta nagkasala si Hadeng Ahaz, ipinadaog siya nin Kagurangnan na saiyang Dios sa hade nin Siria na nakabihag nin dakul na taga Juda, na saiyang dinara sa Damasco. Ipinadaog pa siya nin Kagurangnan sa hade nin Israel na si Peka, na aking lalaki ni Remalias na nakagadan nin syento beynte mil kan pinakamaisog na mga soldados nin Juda sa sarong aldaw sana. Nangyari an mga ini huli ta an banwaan nin Juda nagtalikod sa Kagurangnan na Dios kan saindang mga ginikanan.

⁷ Sarong soldados na an ngaran Zikri an guminadan ki Maaseias na aking lalaki ni Hadeng Ahaz, ki Asrikam na parapamahala kan palasyo asin ki Elkana na ikaduwa sa hade sa kapangyarihan.

⁸ Maski kahimanwa kan mga Israelita an mga taga Juda, binihag kan mga Israelita an dos syentos mil na mga babae saka mga aki dangan dinara sa Samaria, kaiba an dakul na sinamsam.

An Propeta na si Oded

⁹ Alagad may sarong propeta nin Kagurangnan, na an ngaran Oded, an nag-erok kaidto sa syudad nin Samaria. Sinabat niya an mga nagbaralik na Israelita kaiba an mga bihag na taga Juda, asin sinabihan, “Anggot sa Juda an Kagurangnan na Dios kan saindong mga ginikanan, kaya tinugotan niyang madaog nindo sinda. Alagad nakaabot sa langit an makuring paggadan nindo sainda.

¹⁰ Ngunyan boot pa nindong gibohon na mga oripon an mga lalaki saka mga babae nin Juda asin nin Jerusalem. Dai nindo naaaraman na nagkasala man kamo sa Kagurangnan na saindong Dios?

¹¹ Dangoga nindo ako, papulia nindo an mga binihag nindong mga kadugo tanganing dai kamo padusahan nin Kagurangnan sa saiyang kaanggotan.”

¹² Apat sa mga lider kan Kahadean sa Amihan an nagsalungat sa ginibo kan hukbo. An mga lider na ini iyo si Azarias na aking lalaki ni Jehohanan, si Berekias na aking lalaki ni Mesillemot, si Jehizkias na aking lalaki ni Sallum asin si Amasa na aking lalaki ni Hadlai.

¹³ Nagsabi sinda, “Dai nindo pagdarahon digdi an mga bihag! Nagkasala kita sa Kagurangnan asin pinaanggot nyato siya, kaya maninigo kitang padusahan. Ngunyan boot pa nindong dagdagan an satong kasalan.”

¹⁴ Kaya an mga bihag saka an mga sinamsam itinao kan hukbo sa mga lider asin sa bilog na katiriponan.

¹⁵ Nagtindog an apat na lalaking nasambit dangan nagkua nin mga gubing sa sinamsam asin ginubingan an mga hubang bihag, tinawan nin sandalyas, kakanon saka inomon asin linahidan nin lana an mga lugad. An mga pinanluluya ilinunad ninda sa mga asno dangan dinara sa saindang mga kadugo sa Jerico, an syudad nin mga palma. Dangan an gabos na Israelita nagpuli sa saindang mga harong sa Samaria.

Naghagad nin Tabang sa Asiria si Hadeng Ahaz

¹⁶ Kan panahon na iyan, nagsugo si Hadeng Ahaz tanganing maghagad nin tabang sa emperador nin Asiria,

¹⁷ huli ta an Juda sinalakay kan mga Edomita. Dinaog asin binihag kan mga ini an mga taga Juda.

¹⁸ Kan panahon man na iyan, sinalakay kan mga Filisteo an mga syudad sa Sefela asin sa habagat na parte nin Juda. Nasakop ninda an mga syudad nin Bet-semes, Aijalon asin Gederot, siring man an mga syudad nin Soco, Timna, saka Gimzo kaiba an mga baryo kan mga ini, dangan duman na sinda nag-erok.

¹⁹ Pinadarahan kan Kagurangnan nin kasakitan an Juda huli ta linapas ni Hadeng Ahaz an mga deretso kan mga tawo asin dai siya nagin maimbod sa Kagurangnan.

²⁰ Si Tiglat-pileser na emperador kan Asiria iyo an nagsalungat asin nagpasakit ki Ahaz, embes na magtabang saiya.

²¹ Kaya kuminua si Ahaz nin bulawan sa Templo, sa palasyo asin sa harong kan mga lider kan banwaan dangan itinao sa emperador nin Asiria, alagad maski ini dai man giraray nakatabang saiya.

An mga Kasalan ni Ahaz

²² Kan nagin grabe an kasakitan ni Hadeng Ahaz, orog man logod siyang nagkasala sa Kagurangnan.

²³ Nagdolot siya nin sakripisyo sa mga dios kan mga Siro, na nakadaog saiya, asin nagsabi, “Tinabangan kan mga dios-dios nin Siria an mga hade nin Siria, kaya kun magdolot man ako sainda nin sakripisyo, pwedeng tabangan man ninda ako.” Ini an nagdara nin karatan sa saiya asin sa bilog na Israel.

²⁴ Laen pa kaini, kinua niya an mga kagamitan sa Templo dangan saiyang pinarasa. Sinerahan niya an Templo asin nagtugdok siya nin mga altar sa lambang kanto nin Jerusalem.

²⁵ Sa lambang syudad saka banwa nin Juda, nagtugdok siya nin paganong mga lugar na pagsasambahan, saen tututongon an mga insenso para sa mga dios-dios. Huli kaini, naanggot saiya an Kagurangnan, an Dios kan saiyang mga ginikanan.

²⁶ An iba pang ginibo ni Hadeng Ahaz, poon sa kapinonan sagkod sa kataposan, gabos nasusurat sa An Kasaysayan kan mga Hade nin Juda asin nin Israel.

²⁷ Nagadan si Ahaz asin ilinubong sa syudad nin Jerusalem, alagad bako sa lulubngan kan mga hade. Si Ezekias na saiyang aking lalaki iyo an nagsalihid saiya bilang hade.