2 Mga Cronica 26 - Marahay na Bareta Biblia

Si Hadeng Uzzias nin Juda

¹ An aking lalaki ni Amazias na si Uzzias, na an edad dyes y seis na taon, iyo an pinili kan bilog na banwaan nin Juda na magin kasalihid kan saiyang ama bilang hade.

² (Pagkagadan ni Amazias, nabawi ni Uzzias an Elat asin hinirahay niya an syudad.)

³ Dyes y seis an edad ni Uzzias kan siya magin hade, asin singkwenta y dos na taon siyang naghade sa Jerusalem.

⁴ Ginibo niya an matanos sa atubangan nin Kagurangnan, asin inarog an gabos na ginibo kan saiyang ama na si Amazias.

⁵ Mantang buhay pa an parahatol niya na si Zacarias, maimbod siyang naglingkod sa Kagurangnan asin pinauswag siya nin Dios.

⁶ Nakigera si Uzzias sa mga Filisteo. Rinumpag niya an mga kudal kan mga syudad nin Gat, Jamnia saka Asdod, dangan nagtugdok siya nin mga pusog na syudad harani sa Asdod asin maski saen sa daga kan mga Filisteo.

⁷ Tinabangan siya nin Dios na madaog an mga Filisteo, an mga Arab na nag-eerok sa Gurbaal asin an mga Meunita.

⁸ Nagtao nin buhis ki Uzzias an mga Ammonita, asin an saiyang ngaran nakalakop sagkod sa pagdolonan nin Egipto, huli ta siya nagin orog na mapangyari.

⁹ Pinapusog niya an Jerusalem sa paagi nin pagbugtak nin mga tore duman sa Trangkahan nin Kanto, sa Trangkahan nin Kapantayan dangan duman sa pagliko kan kudal.

¹⁰ Nagtugdok pa siya nin mga tore sa kalangtadan asin nagkalot nin dakul na bubon huli ta dakul an saiyang mga baka duman sa Sefela asin sa kapatagan. Huli ta namotan niya an pag-oma, sinadol niya an mga tawo na magtanom nin mga ubas sa kabubuldan asin magtrabaho sa matubang na daga.

¹¹ Igwa siya nin sarong hukbo nin mga soldados na andam sa gera. An lista kan hukbong ini sinaray kan saiyang mga sekretaryo na si Jeiel saka si Maaseias, sa pamamahala ni Hananias, na saro kan mga opisyal kan hade.

¹² An bilang kan mga opisyal kan hukbo uminabot sa dos mil seis syentos.

¹³ Sakop ninda an tres syentos syete mil, kinyentos na matitibay na soldados, na andam na makilaban para sa hade.

¹⁴ An hukbo tinawan ni Uzzias nin mga kalasag, mga garod, mga helmet, mga gubing na panggera, mga pana saka mga gapo para sa lagpitaw.

¹⁵ Sa Jerusalem, an saiyang mga ekspertong tawohan naggibo nin mga makina na pangpana saka pantapok nin darakulang gapo hale sa mga tore asin mga kanto kan kudal kan syudad. An saiyang kabantogan nakalakop, asin nagin orog siyang mapangyari huli ta tinabangan siya nin Dios.

Pinadusahan si Uzzias huli kan saiyang Kapaabaw-abawan

¹⁶ Alagad kan makosog na nin marahay si Uzzias, nagin mapaabaw-abaw siya na iyo an dahelan kan saiyang pagbagsak. Sinalungat niya an Kagurangnan na saiyang Dios kan maglaog siya sa Templo tanganing magtutong nin insenso sa altar nin insenso.

¹⁷ Sinunod siya kan pading si Azarias kaiba an otsentang maiisog na padi nin Kagurangnan

¹⁸ tanganing pugolan siya. Nagsabi sa hade an mga ini, “Uzzias, mayo ka nin deretso na magtutong nin insenso sa Kagurangnan. An mga aki sana ni Aaron an kinonsagra tanganing maggibo kaiyan. Maghale ka sa banal na lugar na ini. Sala an saimong ginibo, asin dai ka na bebendisyonan nin Kagurangnan Dios.”

¹⁹ Yaon duman si Uzzias nagtitindog sa Templo, harani sa altar nin insenso asin may kapot na insensaryo. Naanggot siya sa mga padi, asin tolos-tolos na nagkaigwa siya nin nakakatakot na helang sa kublit sa saiyang angog.

²⁰ Nahiling ni Azarias asin kan iba pang mga padi an nakakatakot na helang sa kublit sa angog kan hade kaya pinahale tolos ninda ini sa Templo asin ini mismo naghidali pagluwas, huli ta pinadusahan siya nin Kagurangnan.

²¹ Nagkaigwa nin nakakatakot na helang sa kublit si Hadeng Uzzias sagkod na siya nagadan. Dai na nanggad siya nakalaog sa Templo asin nag-erok siya sa sarong siblag na harong. Si Jotam na aki niyang lalaki iyo an namahala kan saiyang harong asin nagpadalagan kan banwaan.

²² An iba pang ginibo ni Hadeng Uzzias isinurat kan propeta na si Isaias, na aking lalaki ni Amoz.

²³ Nagadan si Uzzias asin ilinubong sa daga kan saiyang mga ginikanan, alagad dai siya ilinubong sa lulubngan kan mga hade huli kan saiyang nakakatakot na helang sa kublit. Si Jotam na aki niyang lalaki iyo an nagsalihid saiya bilang hade.