2 Mga Cronica 23 - Marahay na Bareta Biblia

An Pagrebelde Laban ki Atalia

¹ Alagad pag-abot kan ikapitong taon, pinakosog ni Jehoiada an saiyang boot asin nakipagtipan siya sa limang opisyal kan hukbo na iyo si Azarias na aking lalaki ni Jeroham, si Ismael na aking lalaki ni Jehohanan, si Azarias na aking lalaki ni Obed, si Maaseias na aking lalaki ni Adaias, saka si Elisafat na aking lalaki ni Zikri.

² Linibot ninda an mga syudad nin Juda dangan ipinag-iba ninda pabalik sa Jerusalem an gabos na Levita saka mga pamayo nin mga kamaganakan.

³ Nagtiripon sinda gabos sa Templo asin nakipagtipan ki Joas, na aking lalaki kan hade. Sinabihan sinda ni Jehoiada, “Uya an aking lalaki kan hade! Siya na an magigin hade, siring sa panuga nin Kagurangnan manongod sa kapagarakian ni David.

⁴ Ini an gigibohon nyato. Pagdigdi kan mga padi saka mga Levita tanganing maglingkod sa aldaw nin Sabbath, magtolong grupo sinda: an sarong grupo mabantay kan mga trangkahan kan Templo,

⁵ an saro mabantay kan palasyo, asin an ikatolo mabantay kan Trangkahan kan Pundasyon. An gabos na tawo matiripon sa patyo kan Templo.

⁶ Mayo nin siisay man na pwedeng maglaog sa Templo nin Kagurangnan pwera kan mga padi asin kan naglilingkod na mga Levita; makakalaog sinda huli ta konsagrado sinda, alagad an mga tawo kaipuhan mag-otob kan kabotan nin Kagurangnan.

⁷ An hade papalibotan kan mga Levitang may kapot na armas, asin maiba saiya saen man siya magduman. An siisay man na maglaog sa Templo gagadanon.”

⁸ Kinuyog kan mga Levita asin kan mga taga Juda an pagboot ni Jehoiada. An mga lalaki na mayo na nin trabaho sa aldaw nin Sabbath dai pinahale ni Jehoiada kundi padagos na pinapaglingkod kaiba kan maralaog sa trabaho sa aldaw na iyan.

⁹ An mga opisyal tinawan niya kan mga garod asin kan mga darakula saka saradit na kalasag na sadiri kaidto ni David asin nasasaray duman sa Templo.

¹⁰ An mga lalaki na may kapot na armas ibinugtak ni Jehoiada sa palibot kan atubangan kan Templo tanganing bantayan an hade.

¹¹ Dangan ilinuwas ni Jehoiada si Joas, kinoronahan saka tinawan kan kopya kan katogonan sa paghahade. Ginibo nindang hade si Joas; linahidan siya nin lana kan padi na si Jehoiada saka kan mga aki kaini. Dangan an gabos nagkurahaw, “Mabuhay an hade!”

¹² Kan madangog ni Atalia an ribok kan mga tawo na nagdadalagan saka nag-oomaw sa hade, nagduman siya sa Templo, sa pinagtiriponan kan mga tawo.

¹³ Nahiling niya an bagong hade na nakatindog sa may harigi sa laogan kan Templo, napapalibotan kan mga opisyal kan hukbo saka kan mga paratrompeta. An gabos na tawo maogmang nagkukurahaw asin nagpapatanog kan mga trompeta, mantang an mga paratugtog sa Templo iyo an nangengenot sa selebrasyon. Ginisi ni Atalia an saiyang gubing asin nagkurahaw, “Kapasaluiban! Kapasaluiban!”

¹⁴ Habo ni Jehoiada na gadanon si Atalia sa laog kan Templo kaya inapod niya an mga kapitan kan hukbo dangan sinabihan, “Isiblag siya sa grupo kan mga bantay asin gadanon nindo an siisay man na maghingowang magligtas saiya.”

¹⁵ Dinakop ninda siya, dinara sa palasyo dangan ginadan duman sa may Trangkahan nin Kabayo.

Mga Reporma ni Jehoiada

¹⁶ Nakipagtipan si Jehoiada sa hade saka sa mga tawo na sinda gabos iyo an magigin banwaan nin Kagurangnan.

¹⁷ Dangan nagduman sinda gabos sa templo ni Baal asin rinumpag idto. Rinonot ninda an saiyang mga altar saka mga imahen asin ginadan sa atubangan kan mga altar si Mattan, an padi ni Baal.

¹⁸ An mga padi asin an mga Levita iyo an ginibo ni Jehoiada na parapamahala kan trabaho sa Templo. Katongdan ninda na kuyogon an pagboot ni Hadeng David asin magdolot nin mga tinutong na atang sa Kagurangnan, sosog sa nasusurat sa Katogonan ni Moises. Sinda man an parapamahala kan musika asin kan mga selebrasyon.

¹⁹ Nagbugtak man si Jehoiada nin mga bantay sa mga trangkahan kan Templo nin Kagurangnan tanganing dai makalaog an siisay man na maati.

²⁰ Dangan kaiba an mga opisyal kan hukbo, an mga ginagalangan na tawo kan banwaan, an mga gobernador asin an bilog na banwaan. Dinara ninda an hade hale sa Templo, pasiring sa palasyo. Duman sinda nag-agi sa itaas na trangkahan. Dangan pinatukaw ninda an hade sa trono.

²¹ Nag-ogma an gabos na tawo; nagin matoninong an syudad pakagadan ni Atalia.