2 Mga Cronica 21 - Marahay na Bareta Biblia

¹ Nagadan si Jehosafat asin ilinubong sa Syudad ni David, sa lulubngan kan mga hade. Si Jehoram na saiyang aking lalaki iyo an nagsalihid saiya bilang hade.

Si Hadeng Jehoram nin Juda

² Si Jehoram na aking lalaki ni Hadeng Jehosafat nin Juda igwa nin anom na tugang na lalaki. An mga ini iyo si Azarias, Jehiel, Zacarias, Azariahu, Miguel, asin Sefatias.

³ Tinawan sinda kan saindang ama nin dakulang halaga nin bulawan, plata saka iba pang pagsadiri, asin an lambang saro sa sainda ginibo niyang parapamahala nin sarong pinapusog na syudad sa Juda; alagad si Jehoram an ginibo niyang hade huli ta siya an matua niyang aki.

⁴ Kan nakatukaw na sa trono nin saiyang ama si Jehoram, ipinagadan niya an gabos niyang tugang asin an nagkapirang mga opisyal nin Israel.

⁵ Treynta y dos an edad ni Jehoram kan siya magin hade, asin walong taon siyang naghade sa Jerusalem.

⁶ Inarog niya an maraot na ginibo ni Hadeng Ahab asin kan iba pang hade nin Israel, huli ta naagom niya an sarong aking babae ni Ahab. Ginibo niya an maraot sa atubangan kan Kagurangnan,

⁷ alagad habong tunawon nin Kagurangnan an kapagarakian ni David, huli kan tipan na ginibo niya ki David asin huli kan panuga niya na magdadanay sa paghahade an saiyang kapagarakian.

⁸ Sa panahon na ini kan paghahade ni Jehoram, nagrebelde an Edom laban sa Juda asin nagbugtak man nin sadiri nindang hade.

⁹ Kaya nagluwas si Jehoram kaiba an saiyang mga opisyal na nakalunad sa mga karwahe dangan sinalakay an Edom. Pinalibotan sinda duman kan mga Edomita, alagad pagkabanggi nakalusot sinda asin nakadulag.

¹⁰ Poon kaidto sagkod ngunyan, nagin sarong siblag na nasyon sa Juda an Edom. Kan panahon man na ini, nagrebelde man sa Juda an Libna, huli ta tinalikodan ni Jehoram an Kagurangnan na Dios kan saiyang mga ginikanan.

¹¹ Laen pa kaiyan nagbugtak siya nin paganong mga lugar na pagsasambahan sa kabubuldan nin Juda dangan pinangenotan an mga banwaan nin Juda asin nin Jerusalem sa pagsombikal sa Kagurangnan.

¹² Sarong surat an ipinadara saiya ni propeta Elias na an sabi, “Ini an tataramon nin Kagurangnan, an Dios ni David na saimong ginikanan: ‘Huli ta dai mo inarog an ginibo ni Jehosafat na saimong ama, o an ginibo ni Asa na saimong lolo,

¹³ kundi inarog mo an maraot na ginibo kan mga hade nin Israel asin pinangenotan mo an mga banwaan nin Juda saka nin Jerusalem sa pagsombikal sako, siring na an Israel pinangenotan ni Ahab asin kan saiyang mga kasalihid sa pagsombikal sako patin ginadan mo an saimong mga tugang na lalaki na mas marahay ki sa saimo,

¹⁴ kaya papadarahan ko nin makatakot na peste an saimong banwaan, an saimong mga aki saka mga agom, patin an gabos mong pagsadiri.

¹⁵ Dangan ika mismo magkakaigwa nin sarong makuring helang sa bituka na orog na magngangana sa aroaldaw.’”

¹⁶ Pinasabongan nin Kagurangnan na maanggot ki Jehoram an mga Filisteo saka mga Arab na nag-eerok sa lugar na harani sa mga taga Etiopia.

¹⁷ Sinalakay ninda an Juda, sinamsam an gabos na kagamitan sa palasyo kan hade, asin binihag an saiyang mga aki saka mga agom. Mayong aki na natada sa hade kundi si Ahazias, an saiyang ngohod na aking lalaki.

¹⁸ Pakatapos kaini, an hade pinadarahan nin Kagurangnan nin sarong makuring helang sa bituka.

¹⁹ Sa laog nin haros duwang taon, nagtios an hade kan helang na ini na orog na nagngangana sa aroaldaw; nagadan siya sa helang na ini na kanigoan an kulog. An saiyang banwaan dai naggibo nin dakulang sulo bilang pagmondo saiya, bakong arog kan ginibo ninda sa saiyang mga ginikanan.

²⁰ Treynta y dos an edad ni Jehoram kan siya magin hade, asin walong taon siyang naghade sa Jerusalem. Mayo lamang nin nagmondo kan siya nagadan. Ilinubong siya ninda sa Syudad ni David, alagad bako sa lulubngan kan mga hade.