2 Mga Cronica 19 - Marahay na Bareta Biblia

Sinagwe si Jehosafat nin Sarong Propeta

¹ Matiwasay na nagpuli si Hadeng Jehosafat nin Juda sa saiyang harong sa Jerusalem.

² Alagad sarong propeta, si Jehu na aking lalaki ni Hanani, an nagsabat sa hade asin nagsabi, “Kaipuhan daw na tabangan mo an mga tampalasan asin apilan an mga naoongis sa Kagurangnan? Huli kan ginibo mong ini, maabot saimo an kaanggotan nin Kagurangnan.

³ Alagad maski siring, igwa man nin nakuang karahayan saimo, huli ta hinarale mo an mga simbolo ni Asera asin hiningowa mong magsunod sa kabotan nin Dios.”

An mga Reporma ni Jehosafat

⁴ Nag-erok sa Jerusalem si Jehosafat; alagad padagos siyang naglibot sa mga banwaan magpoon sa Beer-seba sagkod sa mabulod na daga nin Efraim tanganing sabihan an mga tawo na magbalik sa Kagurangnan, an Dios nin saindang mga ginikanan.

⁵ Nagbugtak siya nin mga hukom sa lambang pinapusog na syudad nin Juda.

⁶ Sinabihan niya an mga hukom, “Horophoropa nindo an saindong ginigibo, huli ta naghuhukom kamo bakong para sa tawo kundi para sa Kagurangnan; kaiba nindo siya sa saindong paghukom.

⁷ Kaya magkaigwa kamo nin takot sa Kagurangnan asin isipon nindo nin marahay an saindong ginigibo, huli ta an Kagurangnan na satuyang Dios dai nagbibiko nin hustisya, mayong kinikilingan asin dai nag-aako nin suhol.”

⁸ Laen pa kaiyan, nagbugtak si Jehosafat sa Jerusalem nin mga Levita, mga padi dangan mga pamayo nin pamilya bilang mga hukom kan mga kaso manongod sa paglapas kan Katogonan nin Kagurangnan, asin manongod sa mga kaso nin mga namamanwaan na dapat husayon.

⁹ Hinulitan niya sinda, “Otobon nindo an saindong katongdan na may pagkatakot sa Kagurangnan, sa kaimbodan asin sa bilog nindong puso.

¹⁰ Kun an saindong mga tugang na nag-eerok sa mga syudad magdolok saindo saka magsangat nin kaso nin panggagadan, o paglapas nin sarong pagboot o togon, hulitan nindo sinda nin marahay, tanganing dai sinda magkasala sa Kagurangnan. Kun dai nindo iyan gibohon, madatong saindo asin sainda an kaanggotan nin Kagurangnan. Alagad kun gibohon nindo an saindong katongdan, dai kamo magkakasala.

¹¹ An Halangkaw na Padi na si Amarias iyo an igwa kan kapangyarihan manongod sa mga kasong relihiyoso; siring man si Zebadias na aking lalaki ni Ismael, an gobernador nin Juda, iyo an igwa kan kapangyarihan manongod sa mga kasong sibil. An mga Levita iyo an malingkod saindo bilang mga opisyal. Pakosogon nindo an saindong boot asin ibahan logod nin Kagurangnan an matanos!”