2 Mga Cronica 18 - Marahay na Bareta Biblia

Pinatanidan ni Propeta Micaias si Ahab

¹ Nagyaman saka ginalangan si Hadeng Jehosafat. Nakialyansa siya ki Ahab sa paagi nin pag-agoman kan sarong kaayon kan saiyang pamilya asin kan kaayon sa pamilya ni Ahab nin Israel.

² Pakalihis nin nagkapirang taon, dinalaw ni Jehosafat si Ahab duman sa Samaria. Nagbuno si Ahab nin dakul na karnero saka baka para ki Jehosafat asin para sa mga kaibahan kaini. Dinagka niya si Jehosafat na mag-iba saiya sa pagsalakay sa syudad nin Ramot-gilead.

³ Naghapot si Ahab ki Jehosafat na hade nin Juda, “Maiba ka sako sa pagsalakay sa Ramot-gilead?” Nagsimbag si Jehosafat, “Andam ako kun andam ka asin siring man an sakong mga soldados. Maiba kami saimo sa pakigera.”

⁴ Nagsabi pa siya, “Alagad hapoton ta ngona an Kagurangnan.”

⁵ Kaya inapod ni Ahab an mga propeta, mga apat na gatos sinda gabos, saka hinapot, “Dapat daw na magduman ako asin salakayon an Ramot-gilead o dai?” Nagsimbag sinda, “Salakayon mo an Ramot-gilead. Itatao saimo nin Kagurangnan an kapangganahan.”

⁶ Alagad naghapot si Jehosafat, “Mayo na daw nin ibang propeta na pwedeng makihumapot sa Kagurangnan para sato?”

⁷ Nagsimbag si Ahab, “Igwa pa nin saro, si Micaias na aking lalaki ni Imla. Alagad kinaoongisan ko siya, huli ta mayo lamang siya nin marahay na propesiya manongod sako; danay na maraot na bagay an saiyang propesiya.” “Dai ka magsabi kaiyan!” an simbag ni Jehosafat.

⁸ Dangan ipinaapod ni Ahab an sarong opisyal saka sinabihan, “Magduman ka asin ipag-iba mo tolos digdi si Micaias na aking lalaki ni Imla.”

⁹ An duwang hade, na nakagubing nin sa hade, yaon kaidto sa lugar na pinaggiginikan sa luwas kan trangkahan nin Samaria. Nakatukaw sinda sa saindang trono asin nagpopropesiya sa atubangan ninda an gabos na propeta.

¹⁰ An saro kaini, si Zedekias na aking lalaki ni Kenaana, naggibo nin lansang na mga sungay asin nagsabi ki Ahab, “Ini an tataramon nin Kagurangnan: ‘Sa paagi kaini lalabanan asin dadaogon mo an mga taga Siria.’”

¹¹ Nagsabi man nin siring an ibang propeta, “Salakayon mo an Ramot-gilead asin manggagana ka,” an sabi ninda. “Itatao saimo nin Kagurangnan an kapangganahan.”

¹² Sinabihan si Micaias kan opisyal na nagkua saiya, “An gabos na propeta nagpropesiya nin kapangganahan para sa hade; marahay na iyan man an gibohon mo.”

¹³ Alagad nagsimbag si Micaias, “Sa ngaran kan buhay na Kagurangnan, kun ano an itinaram niya sako iyo sana an sakong itataram!”

¹⁴ Kan mag-atubang si Micaias ki Hadeng Ahab, hinapot siya kan hade, “Micaias, dapat daw na salakayon mi ni Hadeng Jehosafat an Ramot-gilead o dai?” Nagsimbag si Micaias, “Salakayon nindo asin manggagana kamo. Itatao saindo nin Kagurangnan an kapangganahan.”

¹⁵ Alagad sinabihan siya kan hade, “Pirang beses taka pasusumpaon na mayo ka nin itataram sako kundi an katotoohan sa ngaran nin Kagurangnan?”

¹⁶ Nagsimbag si Micaias, “Nahiling ko an bilog na Israel na nawarak sa kabukidan, arog sa mga karnero na mayo nin pastor. Asin nagtaram an Kagurangnan, ‘Mayo sinda nin pamayo, papulia sinda sa katoninongan.’”

¹⁷ Sinabihan ni Ahab si Jehosafat, “Bakong sinabi ko na saimo na dai pa lamang siya nin marahay na propesiya dapit sako? An saiyang propesiya danay na maraot!”

¹⁸ Nagpadagos si Micaias, “Hinanyoga ngunyan an tataramon nin Kagurangnan. Nahiling ko an Kagurangnan na nagtutukaw sa saiyang trono. Kataed niya an gabos niyang anghel na nagtitindog sa too niya asin sa wala.

¹⁹ Naghapot an Kagurangnan, ‘Siisay an madagka ki Ahab tanganing sumalakay siya asin magadan sa Ramot-gilead?’ Nagsabi nin sarong bagay an nagkapirang anghel, mantang laen man an sinabi kan iba.

²⁰ Dangan nagpaenotan an sarong espiritu asin nagtindog sa atubangan nin Kagurangnan. ‘Dadagkahon ko siya,’ an sabi niya. Hinapot nin Kagurangnan an espiritu, ‘Sa anong paagi?’

²¹ Nagsimbag siya, ‘Maduman ako asin magigin espiritung nagpuputik sa ngoso kan gabos niyang propeta.’ Nagtaram an Kagurangnan, ‘Lakaw asin dagkahon mo siya ta mangyayari an iniisip mo.’”

²² Nagpadagos si Micaias, “Iyo ini an nangyari ngunyan. Ibinugtak nin Kagurangnan an espiritung nagpuputik sa ngoso kan saimong mga propeta. Alagad siya mismo an nagtalaan kan saimong kagadanan!”

²³ Kaya nagdolok an propetang si Zedekias asin sinampaling si Micaias. An sabi niya, “Kasuarin nagbalyo hale sako pasiring saimo an espiritu nin Kagurangnan tanganing magtaram saimo?”

²⁴ “Maaaraman mo iyan pag-abot kan aldaw na maglaog ka sa sarong pinakatagong kwarto tanganing magtago,” an simbag ni Micaias.

²⁵ Nagboot si Hadeng Ahab, “Dakopa nindo si Micaias saka daraha nindo ki Amon, an gobernador kan syudad, asin ki Prinsipe Joas.

²⁶ Sabihan nindo sinda na ibilanggo ninda an tawong ini asin dikit sanang tinapay saka tubig an itao saiya sagkod na magbalik akong tiwasay.”

²⁷ Nagsabi si Micaias, “Kun ika makabalik nin tiwasay, an Kagurangnan dai mananggad nagtaram sa paagi ko!” Nagsabi pa siya, “Hinanyoga nindo gabos an sakong itinaram!”

An Pagkagadan ni Ahab

²⁸ Dangan nagduman sa Ramot-gilead si Hadeng Ahab nin Israel asin si Hadeng Jehosafat nin Juda.

²⁹ Nagsabi si Ahab ki Jehosafat, “Paglaog ta sa ralaban, dai ako mapamidbid bilang hade, alagad isulot mo an saimong gubing na sa hade.” Kaya nagsagin-sagin an hade nin Israel kan magduman sa ralaban.

³⁰ Igwa nin pagboot kaidto an hade nin Siria sa mga kapitan kan saiyang mga karwahe na dai pagsalakayon an siisay man kundi an hade sana nin Israel.

³¹ Kaya kan mahiling ninda si Jehosafat, nagsaboot sinda na siya na an hade nin Israel. Nagbirik sinda tanganing salakayon siya, alagad nagkurahaw si Jehosafat. Tinabangan siya nin Kagurangnan asin pinaontok an pagsalakay saiya kan mga kaiwal, huli

³² ta kan mahiling kan mga kapitan na bako siya an hade nin Israel, nag-ontok sinda sa paglamag saiya.

³³ Alagad sarong soldados an nagpana, asin dai tuyong tinamaan si Hadeng Ahab sa tahaw kan pinagsugponan kan saiyang gubing na panggera. Kaya nagkurahaw siya sa nagpapadalagan kan saiyang karwahe, “Umatras ka asin haleon mo ako digdi sa ralaban, huli ta nalugadan ako!”

³⁴ Mantang nagpapadagos an ralaban, nagdanay si Ahab na nakahurandig sa saiyang karwahe; maghapon siyang nakaatubang sa mga taga Siria, sagkod na magadan siya pagkabanggi.