2 Mga Cronica 17 - Marahay na Bareta Biblia

Nagin Hade si Jehosafat

¹ Si Jehosafat an nagin kasalihid bilang hade kan saiyang ama na si Asa, asin pinakosog niya an saiyang kamugtakan laban sa Israel.

² Nagbugtak siya nin mga soldados sa pinapusog na mga syudad nin Juda. Nagtugdok siya nin mga bantayan sa bilog na daga nin Juda asin sa mga syudad nin Efraim na nasakop kan saiyang ama.

³ Benendisyonan nin Kagurangnan si Jehosafat, huli ta sinunod niya an mga naenot na paarog nin saiyang ama. Dai siya nagsamba ki Baal,

⁴ kundi naglingkod sa Dios nin saiyang ama, nagsunod sa mga pagboot nin Dios asin dai nag-arog sa ginibo kan mga hade nin Israel.

⁵ Kaya pinapusog nin Kagurangnan an kahadean nin Juda sa pamamahala ni Jehosafat. Dinarahan siya nin mga regalo kan bilog na banwaan, asin nagyaman siya saka ginalangan.

⁶ Ipinag-orgulyo niya an paglingkod sa Kagurangnan asin hinale niya sa Juda an paganong mga lugar na pagsasambahan saka an mga simbolo kan diosang si Asera.

⁷ Kan ikatolong taon nin saiyang paghahade, ipinadara niya an mga opisyal na si Benhail, Obadias, Zacarias, Netanel asin Micaias tanganing magtukdo sa mga syudad nin Juda.

⁸ Inibahan sinda nin siyam na Levita saka duwang padi. An mga Levita iyo si Semaias, Netanias, Zebadias, Asahel, Semiramot, Jehonatan, Adonias, Tobias asin Tobadonias; an duwang padi iyo si Elisama saka si Jehoram.

⁹ Dinara ninda an libro kan Katogonan nin Kagurangnan asin linibot ninda an gabos na banwa nin Juda sa pagtukdo sa mga tawo.

An Kadakulaan ni Jehosafat

¹⁰ Ginibo nin Kagurangnan na matakot an gabos na kahadean sa palibot nin Juda, kaya dai sinda nakigera ki Jehosafat.

¹¹ Nagkapirang mga Filisteo an nagdara ki Jehosafat nin dakulang halaga nin plata saka iba pang mga regalo. Dinarahan man siya kan mga Arab nin syete mil syete syentos na karnero saka syete mil syete syentos na kanding.

¹² Kaya orog na nagin mapangyari si Jehosafat. Sa bilog na Juda nagtugdok siya nin mga bantayan saka mga syudad

¹³ na sarayan nin dakul na bagay. Nagbugtak siya sa Jerusalem nin mga maiisog na soldados,

¹⁴ sosog sa saindang mga kamaganakan. Si Adna iyo an pamayo kan hukbo kan mga kamaganakan nin Juda asin sakop niya an tres syentos mil na mga soldados.

¹⁵ Sunod saiya iyo si Jehohanan na sakop an dos syentos otsenta mil na soldados.

¹⁶ An sunod iyo si Amasias na aking lalaki ni Zikri, na sakop an dos syentos mil na soldados. (Boluntad na idinolot ni Amasias an saiyang paglingkod sa Kagurangnan.)

¹⁷ An pamayo kan hukbo kan mga kamaganakan ni Benjamin iyo si Eliada, sarong bantog na soldados. Sakop niya an dos syentos mil na soldados na armado nin mga kalasag saka mga pana.

¹⁸ Sunod saiya iyo si Jozabad na sakop an syento otsenta mil na soldados, gabos armado sa pakigera.

¹⁹ Naglingkod an mga ini sa hade sa Jerusalem, laen pa kan mga soldados na ibinugtak kan hade sa pinapusog na mga syudad sa bilog na Juda.