2 Mga Cronica 15 - Marahay na Bareta Biblia

Mga Reporma ni Asa

¹ An Espiritu nin Dios nag-abot ki Azarias na aking lalaki ni Oded,

² asin naglakaw siya tanganing sabaton si Hadeng Asa. Dangan sinabihan niya ini, “Dangoga ako Hadeng Asa, asin kamong mga taga Juda saka mga taga Benjamin: An Kagurangnan yaon saindo mantang kamo nasa saiya. Kun hanapon nindo siya, makukua nindo siya; alagad kun talikodan nindo siya, tatalikodan man niya kamo.

³ An Israel namuhay na mayo kan tunay na Dios sa haloy na panahon, mayo nin mga padi na nagtukdo sainda asin mayo nin katogonan.

⁴ Alagad kan mag-apod sinda sa panahon nin kasakitan, asin hinanap an Kagurangnan, an Dios nin Israel, nakua siya ninda.

⁵ Kaidtong panahon mayong tawong tiwasay na minaabot o minahale sa daga, huli ta igwa nin kasakitan asin kahorasaan sa gabos na lugar.

⁶ Sarong nasyon an minaapi sa sarong nasyon asin sarong syudad an minaapi sa sarong syudad, huli ta an Dios nagpadara sainda nin gabos na kasakitan.

⁷ Alagad magmaisog kamo! Hare nindo pagpaluyaha an saindong boot huli ta babalosan an gabos nindong gibo.”

⁸ Kuminosog an boot ni Asa kan madangog niya an propesiya na sinambit ni Azarias na aking lalaki ni Oded. An makauuyam na mga dios-dios hinale niya sa bilog na daga nin Juda saka Benjamin asin sa mga syudad na sinakop niya sa mabulod na daga nin Efraim. Hinirahay man niya an altar nin Kagurangnan na nasa patyo kan Templo.

⁹ Dakul na taga Efraim, Manases saka Simeon an nag-apil ki Asa dangan nag-erok sa saiyang kahadean, huli ta nahiling ninda na kaiba niya an Kagurangnan. Tinipon sinda ni Asa, kaiba an mga taga Juda saka Benjamin.

¹⁰ Nagtiripon sinda sa Jerusalem kan ikatolong bulan kan ikakinseng taon kan paghahade ni Asa.

¹¹ Kan aldaw na idto, nagdolot sinda nin mga sakripisyo sa Kagurangnan hale sa mga sinamsam ninda: syete syentos na baka asin syete mil na karnero.

¹² Naggibo sinda nin tipan, saen nanumpa sinda na sasambahon an Kagurangnan, an Dios kan saindang mga ginikanan, sa bilog nindang puso asin kalag.

¹³ Gagadanon an siisay man na dai magsamba saiya, magin gurang, aki, lalaki o babae man.

¹⁴ Nanumpa sinda sa Kagurangnan sa makosog na tingog, kaiba an tanog nin mga trompeta asin nin mga kinurahaw.

¹⁵ Nag-ogma an bilog na banwaan nin Juda huli ta ginibo ninda an pakipagtipan na ini sa bilog nindang puso. Naogma sinda na magsamba sa Kagurangnan, asin inako niya sinda saka tinawan nin katoninongan sa bilog na lugar.

¹⁶ Maski si Maaca na saiyang lola hinale ni Asa bilang inang-reyna, huli ta naggibo ini nin sarong makauuyam na imahen ni Asera. Pinutol ni Asa an imahen, rinonot, dangan sinulo sa may Sapa nin Kidron.

¹⁷ Dai nahale ni Asa an gabos na paganong altar na pagsasambahan, alagad nagin maimbod siya sa Kagurangnan sa bilog niyang pagkabuhay.

¹⁸ Ibinugtak niya sa Templo an gabos na bagay na kinonsagra sa Dios kan saiyang ama, sagkod an itinao niyang mga bulawan, plata, asin mga banal na kagamitan.

¹⁹ Dai na nagkaigwa nin gera sagkod sa ikatreynta y singkong taon kan saiyang paghahade.