2 Mga Cronica 13 - Marahay na Bareta Biblia

Pakigera ni Abias ki Jeroboam

¹ Kan ikadyes y otsong taon nin paghahade ni Jeroboam sa Israel, nagin hade kan Juda si Abias,

² asin tolong taon ining naghade sa Jerusalem. An ina niya iyo si Micaias, na aki ni Uriel na gikan sa syudad nin Gibea. Naggera si Abias saka si Jeroboam.

³ Si Abias igwa nin kwatro syentos mil na piling mga soldados mantang si Jeroboam igwa nin otso syentos mil na piling makokosog na mga soldados.

⁴ An duwang hukbo naghampangan sa mabulod na banwa nin Efraim. Nagtukad si Hadeng Abias sa Bukid nin Zemaraim asin kinurahawan si Jeroboam saka an mga Israelita, “Dangoga ako nindo!

⁵ Dai nindo aram na an Kagurangnan, an Dios nin Israel, naggibo nin sarong dai malalapas na tipan ki David, dangan itinao nin Dios saiya saka sa saiyang mga aki an paghahade sa Israel sagkod pa man?

⁶ Alagad si Jeroboam na aking lalaki ni Nebat nagrebelde laban ki Solomon na saiyang hade;

⁷ dangan nagtipon siya nin sarong grupo nin mayo nin halagang mga tawo asin kinalaban ninda si Rehoboam, na aking lalaki ni Solomon. Dai nin naginibo sainda si Rehoboam huli ta ini aki pa saka mayo nin pakaaram.

⁸ Ngunyan boot nindong magtumang sa kapangyarihan na itinao nin Kagurangnan sa mga aki ni David, huli ta dakul kamo asin dara nindo an mga bulawan na baka na ginibo ni Jeroboam tanganing magin dios-dios nindo.

⁹ Pinahale nindo an mga padi nin Kagurangnan, an kapagarakian ni Aaron, saka an mga Levita dangan nagbugtak kamo nin mga padi arog kan ginibo kan ibang mga nasyon. An siisay man na magdolok na may darang ogbon na baka o pitong karnero, pwedeng konsagrahon bilang padi kan inaapod nindong mga dios-dios.

¹⁰ “Alagad para samo, an Kagurangnan iyo an samuyang Dios asin dai kami nagtalikod saiya. An naglilingkod sa Kagurangnan bilang mga padi iyo an mga aki ni Aaron asin an mga Levita an nagtatabang sainda.

¹¹ Aga-hapon nagdodolot sinda nin mga tinutong na atang saka mahamot na insenso. Ibinubugtak ninda sa purong bulawan na lamesa an mga dolot na tinapay, asin barubanggi sinusuloan ninda an mga ilawan sa bulawan na kandelero. Inootob mi an pagboot nin Kagurangnan na samuyang Dios, alagad tinalikodan nindo siya.

¹² An Dios kaibahan mi asin iyo an samong pamayo; andam an saiyang mga padi sa pagpatanog kan mga trompeta tanganing labanan nyamo kamo. Banwaan nin Israel, hare kamo pagtumang sa Kagurangnan, an Dios kan saindong mga ginikanan, huli ta dai kamo manggagana!”

¹³ Nagsugo si Jeroboam nin nagkapira sa saiyang hukbo tanganing salakayon sa likodan an mga taga Juda mantang an iba nasa atubang ninda.

¹⁴ Kan magsalingoy an mga taga Juda nahiling ninda na napapalibotan sinda kan saindang mga kaiwal. Nagkurahaw sinda sa Kagurangnan tanganing tabangan asin pinatanog kan mga padi an mga trompeta.

¹⁵ Dangan nagkurahaw nin pagsalakay an mga taga Juda, sa pamamayo ni Abias. Dinaog nin Dios si Jeroboam saka an mga soldados na Israelita.

¹⁶ Nagdurulag an mga Israelita, alagad itinao sinda nin Dios sa mga taga Juda.

¹⁷ Dakul an ginadan ni Abias asin kan saiyang hukbo—kinyentos mil na mga piling soldados nin Israel.

¹⁸ Kaya nanggana laban sa mga taga Israel an mga taga Juda huli ta nagsarig sinda sa Kagurangnan, an Dios kan saindang mga ginikanan.

¹⁹ Linamag ni Abias an hukbo ni Jeroboam asin sinakop an nagkapirang syudad kaini: an Betel, an Jesana saka an Efron sagkod an mga baryo kan mga ini.

²⁰ Dai na ikinabalik ni Jeroboam an dati niyang kapangyarihan sa panahon kan paghahade ni Abias; dangan hinampak siya nin Kagurangnan asin nagadan.

²¹ Alagad si Abias orog na nagin mapangyari. Nagkaigwa siya nin katorseng agom asin beynte y dos na aking lalaki saka dyes y seis na aking babae.

²² An iba pang ginibo ni Abias, an saiyang mga palakaw saka mga sinabi gabos nasusurat sa An Kasaysayan ni Iddo na Propeta.