2 Mga Cronica 11 - Marahay na Bareta Biblia

An Propesia ni Semaias

¹ Kan mag-abot sa Jerusalem si Hadeng Rehoboam, tinipon niya an syento otsenta mil na mga piling soldados hale sa mga tribu nin Juda saka nin Benjamin, sa pakilaban sa mga tribu nin Israel sa amihan tanganing mapasaiya an kahadean.

² Alagad tinaraman nin Kagurangnan an propetang si Semaias

³ na itao an mensaheng ini ki Rehoboam asin sa gabos na kaayon sa tribu nin Juda saka nin Benjamin:

⁴ “Dai nindo pagsalakayon ni paglabanan an saindong mga tugang. Magpuli na kamo, huli ta kabotan ko an nangyari.” Nagkuyog sinda gabos sa pagboot nin Kagurangnan; nagpuruli sinda asin dai ninda linabanan si Jeroboam.

Pinapusog ni Rehoboam an mga Syudad

⁵ Duman sa Jerusalem nag-erok si Rehoboam asin pinakosog niya an depensa kan mga syudad sa teritoryo ni Juda asin ni Benjamin. An mga syudad na ini iyo

⁶ an Betlehem, Etam, Tekoa,

⁷ Bet-zur, Soco, Adullam,

⁸ Gat, Maresa, Zif,

⁹ Adoraim, Lakis, Azeka,

¹⁰ Zora, Aijalon asin Hebron.

¹¹ Pinakosog niya an mga bantayan asin sa lambang saro kaiyan nagbugtak siya nin mga pamayo, mga pagkakan, lana nin oliba saka arak;

¹² nagbugtak man siya nin mga kalasag asin mga garod sa gabos na syudad. Sa paaging ini, ibinugtak ni Rehoboam sa irarom kan saiyang kapangyarihan an Juda asin an Benjamin.

Nagduman sa Juda an mga Padi asin an mga Levita

¹³ An mga padi asin an mga Levita sa bilog na Israel nagpasiring sa Juda.

¹⁴ Binayaan kan mga Levita an saindang mga dagang pasabsaban asin iba pang pagsadiring daga, dangan nagduman sa Juda asin sa Jerusalem, huli ta dai sinda tinugotan ni Hadeng Jeroboam saka mga kasalihid kaini na maglingkod sa Kagurangnan bilang mga padi.

¹⁵ Si Jeroboam nagpili nin sadiri niyang mga padi tanganing maglingkod sa mga paganong lugar na pagsasambahan, magsamba sa mga demonyo asin mga ladawan nin baka na saiyang ginibo.

¹⁶ Hale sa gabos na tribu nin Israel, an gabos na nagmawot nin tudok sa puso na pagsamba sa Kagurangnan, an Dios nin Israel, nagsurunod sa mga Levita pasiring sa Jerusalem tanganing magdolot nin mga atang sa Kagurangnan, an Dios kan saindang mga ginikanan.

¹⁷ Napakosog ninda an kahadean nin Juda, asin sa laog nin tolong taon inandorogan ninda si Rehoboam na aking lalaki ni Solomon. Namuhay sinda siring kan panahon nin paghahade ni David asin ni Solomon.

An Pamilya ni Rehoboam

¹⁸ Inagom ni Rehoboam si Mahalat na aking babae ni Jerimot, na aking lalaki ni David, asin ni Abihail na aking babae ni Eliab asin makoapo ni Jesse.

¹⁹ Nagkaigwa nin tolong aking lalaki si Rehoboam ki Mahalat: si Jeus, si Semarias, asin si Zaham.

²⁰ Dangan inagom niya si Maaca na aking babae ni Absalom. Nagkaigwa siya digdi nin apat na aking lalaki: si Abias, Attai, Ziza, asin Selomit.

²¹ Nagkaigwa si Rehoboam nin dyes y otsong agom saka sesentang kasaroan, asin nagkaigwa siya nin beynte y otsong aking lalaki saka sesentang aking babae. Orog niyang namotan si Maaca ki sa gabos niyang agom saka kasaroan,

²² asin pinadangat niya si Abias sa gabos niyang aki. Ini an pinili niya na magin kasalihid niya bilang hade.

²³ Sa madonong na paagi, ipinamugtak ni Rehoboam an saiyang mga aking lalaki sa gabos na distrito nin Juda asin nin Benjamin, sa gabos na pinakosog na syudad. Tinawan niya sinda nin dakul na kakanon asin nin dakul na agom.