2 Mga Cronica 10 - Marahay na Bareta Biblia

An Pagrebelde kan mga Tribu sa Amihan

¹ Nagduman sa Shekem si Rehoboam, huli ta nagtiripon duman an bilog na Israel tanganing gibohon siyang hade.

² Kan an baretang ini madangog ni Jeroboam, na aking lalaki ni Nebat, na nagduman sa Egipto sa pagdulag ki Hadeng Solomon, nagbalik siya sa Israel.

³ Ipinaapod si Jeroboam kan mga kaayon kan mga tribu sa amihan, dangan iriba sindang nagduman ki Rehoboam asin nagsabi,

⁴ “Binugtakan kami nin magabat na mga pasan kan saimong ama. Pagianon mo an pang-ooripon nin saimong ama saka an magabat na pasan na ibinugtak niya samuya, asin paglilingkodan mi ika.”

⁵ Nagsimbag si Rehoboam, “Magbalik kamo pakalihis nin tolong aldaw.” Kaya nagharale an mga tawo.

⁶ Naghagad si Rehoboam nin hatol sa kamagurangan na naglingkod bilang mga parahatol sa saiyang ama na si Solomon. “Ano sa paghona nindo an dapat kong isimbag sa mga tawong ini?”

⁷ Nagsimbag sinda, “Kun magigin maboot ka sa mga tawong ini asin mapawili mo sinda huli sa marahay na mga tataramon, na isisimbag mo sainda maimbod sindang malingkod saimo sagkod lamang.”

⁸ Alagad dai niya dinangog an hatol na itinao saiya kan mga kamagurangan. Embes kaiyan, nagpahatol siya sa mga kapwa niya hoben na kasabay niyang nagdakula, asin ngunyan mga parahatol na niya.

⁹ “Ano an dapat kong isimbag sa mga tawong ini na nagsabi sako na pagianon ko an pasan na ibinugtak sainda kan sakong ama?”

¹⁰ Nagsimbag sinda, “Iyo ini an isabi mo sainda: ‘An sakuyang gigis mas mahibog ki sa habayan nin sakong ama.

¹¹ Binugtakan kamo kan sakong ama nin magabat na pasan; orog ko ining pagagabaton. An sakong ama naggamit saindo nin badas, alagad gagamitan ko kamo nin pamakol na may tonok!’”

¹² Pakalihis nin tolong aldaw, si Jeroboam asin an gabos na tawo nagbalik ki Hadeng Rehoboam siring kan sinabi sainda kaini.

¹³ Isinikwal kan hade an hatol kan mga kamagurangan, asin maisog na nagtaram siya sa mga tawo,

¹⁴ siring kan hatol kan mga hoben na lalaki. Nagsabi siya, “Binugtakan kamo kan sakuyang ama nin magabat na pasan; orog ko ining pagagabaton. Naggamit siya saindo nin badas; gagamitan ko kamo nin pamakol na may tonok!”

¹⁵ Dai dinangog kan hade an mga tawo huli ta kabotan nin Kagurangnan Dios na mangyari ini tanganing maotob an itinaram niya ki Jeroboam na aking lalaki ni Nebat sa paagi kan propetang si Ahias na taga Shilo.

¹⁶ Kan mahiling kan mga tawo na habong maghinanyog sainda an hade, nagkurahaw sinda, “Ano an samong kahirasan ki David? Dai kami nin pamana sa aking lalaki ni Jesse. Bumalik kamo sa saindong mga tolda, O Israel! Atamana ngunyan an sadiri mong harong, O David!” Kaya nagbalik sa saindang mga tolda an Israel.

¹⁷ Alagad pinaghadean ni Rehoboam an mga tawong nag-erok sa teritoryo nin Juda.

¹⁸ Dangan pinaduman ni Rehoboam sa mga Israelita si Adoniram, an namamahala kan pirit na pagpatrabaho, alagad ginapo ninda siya sagkod na magadan. Huli kaini, hidaling naglunad si Rehoboam sa saiyang karwahe asin nagdulag pasiring sa Jerusalem.

¹⁹ Magpoon kaidto sagkod ngunyan nagin rebelde an Israel laban sa paghahade kan kapagarakian ni David.