1 Samuel 9 - Marahay na Bareta Biblia

Nanumpongan ni Saul si Samuel

¹ Igwa kaidto nin sarong mayaman na lalaki na an ngaran Kis, na gikan sa tribu ni Benjamin; aki siya ni Abiel asin makoapo ni Zeror na aki ni Becorat asin makoapo ni Afia.

² Igwa si Kis nin aking lalaki na an ngaran Saul, sarong gwapong lalaki. Siya an pinakagwapo asin pinakahalangkaw na lalaki sa bilog na Israel.

³ Nawara an nagkapirang asno ni Kis, kaya sinabihan niya si Saul, “Ipag-iba mo an saro sa mga sorogoon asin hanapon nindo an mga asno.”

⁴ Nalibot ninda an mabulod na daga nin Efraim asin an daga nin Salisa, alagad dai ninda nakua an mga asno; kaya nagpadagos sinda sa daga nin Saalim, alagad mayo man duman an mga asno. Dangan naghanap sinda sa daga ni Benjamin, alagad dai man ninda nakua duman.

⁵ Kan nakaabot sinda sa daga nin Zuf, sinabihan ni Saul an saiyang sorogoon, “Magpuli na kita tibaad bako na an mga asno an paghaditan kan sakong ama, kundi kita na.”

⁶ Nagsimbag an sorogoon, “Halat! Igwa digdi nin sarong banal na lalaki, na ginagalangan huli ta nagkakatotoo an gabos niyang sinasabi. Magduman kita saiya; tibaad ikatukdo niya sato kun saen ta makukua an mga asno.”

⁷ Naghapot si Saul, “Kun magduman kita, ano an ikakatao ta saiya? Mayo nang natada sa satong balon na pagkakan; mayo kita maski anong bagay na pwedeng ikatao saiya.”

⁸ Nagsimbag an sorogoon, “Igwa ako digdi nin sadit na pedasong plata. Pwede kong itao ini saiya tanganing ikatukdo niya sato kun saen makukua an mga asno.”

^9-11 “Marahay na kaisipan,” an simbag ni Saul. “Magduman na kita.” Kaya nagduman sinda sa banwa na pinag-erokan kan banal na lalaki. Mantang nagtutukad sinda sa bulod palaog sa banwa, nasabat ninda an nagkapirang babae na nagruluwas tanganing magharok nin tubig. Hinapot ninda an mga babae, “Yaon daw an parahula?” (Sa Israel kaidto, an sarong propeta inapod na parahula, kaya kun an sarong tawo boot maghapot sa Dios, minasabi siya, “Magduman kita sa parahula.”)

^12-13 Nagsimbag an mga babae, “Yaon siya. An totoo, nasa enotan sana nindo siya asin kun maghidali kamo, maaabotan pa nindo. Pakalaog nindo sa banwa, makukua na nindo siya. Minaabot pa sana siya huli ta madolot an mga tawo nin atang sa altar sa itaas kan bulod. Dai makakan an mga tawong inalok sagkod na dai pa siya nag-abot duman, huli ta kaipuhan bendisyonan ngona niya an atang. Kun magduman na kamo ngunyan, maaabotan nindo siya bago siya magtukad sa bulod tanganing magkakan.”

¹⁴ Kaya nagdagos sa banwa si Saul asin an saiyang sorogoon. Kan naglalaog na sinda, nahiling ninda na nagluluwas sa banwa si Samuel pasabat sainda, sa pagduman niya sa lugar na pagsasambahan.

¹⁵ Kan nakaaging aldaw bago mag-abot duman si Saul, nagpahayag an Kagurangnan ki Samuel,

¹⁶ “Sa aga, sa siring kaining oras, ipapadara ko saimo an sarong lalaki na gikan sa tribu ni Benjamin; lahidan mo siya bilang hade kan sakong banwaan na Israel. Siya an maligtas sainda sa mga Filisteo, huli ta nahiling ko an pagtios kan sakong banwaan asin nadangog ko an saindang inagrangay.”

¹⁷ Kan mahiling ni Samuel si Saul, tinaraman siya nin Kagurangnan, “Iyo ini an lalaking sinabi ko saimo. Siya an maghahade sa sakong banwaan.”

¹⁸ Dangan dinolok ni Saul si Samuel, na nasa may trangkahan kan banwa, asin hinapot, “Saen nag-eerok an parahula?”

¹⁹ Nagsimbag si Samuel, “Ako an parahula. Mag-enot na kamo sa lugar na pagsasambahan, huli ta masabay kamo sako sa pagkakan. Pagkaaga, sisimbagon ko an saindong mga hapot asin makakapuli na kamo.

²⁰ Manongod sa mga asno na nawawara tolong aldaw na an nakaagi, dai kamo mahandal; nakua na sinda. Alagad para kiisay an orog na minamawot nin Israel? Bakong para saimo asin para sa pamilya kan saimong ama?”

²¹ Nagsimbag si Saul, “Tadaw ta siring an pinagsasabi mo sako? Gikan ako sa pinakasadit na tribu nin Israel, sa tribu ni Benjamin, asin an sakong pamilya iyo an pinakamenos sa gabos na tribu.”

²² Dangan dinara ni Samuel si Saul asin an saiyang sorogoon sa sarong dakulang kwarto na pinagtitiriponan kan mga bisita, mga treynta gabos, asin tinawan nin lugar sa pamayohan kan lamesa.

²³ Sinabihan ni Samuel an paraluto, “Daraha digdi an karne na ipinasaray ko saimo.”

²⁴ Kaya kinua kan paraluto an piling pedaso kan bitis asin ibinugtak sa atubangan ni Saul. Nagsabi si Samuel, “Uya an pedaso nin karne na sinaray para saimo. Kakanon mo iyan, huli ta talagang sinaray ko iyan tanganing kakanon mo sa oras na ini sa kaibahan kan mga bisita.” Kaya nagkakan si Saul sa kaibahan ni Samuel kan aldaw na idto.

²⁵ Kan maglugsot na sinda hale sa lugar na pinagsasambahan pasiring sa banwa, inandaman ninda nin higdaan si Saul sa ibabaw kan atop,

²⁶ asin duman siya nagkatorog. Pagsirang kan aldaw, pinukaw ni Samuel si Saul na nasa atop, “Bangon na, asin dedespediron taka.” Nagbangon si Saul, dangan nag-iba sinda ni Samuel pasiring sa tinampo.

Linahidan ni Samuel si Saul Bilang Pamayo

²⁷ Pag-abot ninda sa may luwas kan banwa, sinabihan ni Samuel si Saul, “Paenota na an saimong sorogoon.” Pakahale kan sorogoon, nagsabi si Samuel, “Mag-ontok ka ngona asin sasabihon ko saimo an itinaram nin Dios.”