1 Samuel 7 - Marahay na Bareta Biblia

¹ Kaya nagduruman an mga taga Kiriat-jearim asin kinua ninda an Kaban nin Tipan. Dinara ninda ini sa harong ni Abinadab, na nag-erok sa sarong bulod. Kinonsagra ninda an aki niyang lalaki na si Eleazar tanganing iyo an mangataman kan Kaban nin Tipan nin Kagurangnan.

Nagin Hukom si Samuel sa Israel

² Nag-ontok sa Kiriat-jearim an Kaban nin tipan nin Kagurangnan sa halawig na panahon, mga beynteng taon. Sa panahon na idto, nag-agrangay sa Kagurangnan an gabos na Israelita.

³ Sinabihan ni Samuel an mga Israelita, “Kun magbalik kamo sa Kagurangnan sa bilog nindong puso, kaipuhan haraleon nindo an mga dayuhan na dios asin an mga ladawan kan diosang si Astarte. Bilog nindong idusay an saindong sadiri sa Kagurangnan; siya sana an saindong paglingkodan, asin ililigtas niya kamo sa kapangyarihan kan mga Filisteo.”

⁴ Kaya hinale kan mga Israelita an mga ladawan ni Baal saka ni Astarte, asin an Kagurangnan sana an saindang pinaglingkodan.

⁵ Dangan ipinaapod ni Samuel an gabos na Israelita na magtiripon sa Mizpa, asin sinabihan, “Ipapamibi ko kamo sa Kagurangnan.”

⁶ Kaya nagtiripon sinda sa Mizpa. Nagharok sinda nin tubig dangan inula ninda bilang sarong dolot sa Kagurangnan; nag-ayuno sinda kan aldaw na idto. Olay ninda, “Nagkasala kami sa Kagurangnan.” (Hinukoman ni Samuel an mga Israelita duman sa Mizpa.)

⁷ Kan madangog kan mga Filisteo na nagtiripon sa Mizpa an mga Israelita, nagruluwas an limang hade kan mga Filisteo kaiba an saindang mga soldados tanganing salakayon an Israel. Nabaretaan ini kan mga Israelita asin nagkatarakot sinda.

⁸ Nagsarabi sinda ki Samuel, “Dai ka mag-ontok sa pag-agrangay sa Kagurangnan na satong Dios para sa samo, tanganing iligtas niya kita sa kamot kan mga Filisteo.”

⁹ Kaya nagbuno si Samuel nin sarong bako pang butas na kordero asin bilog na idinolot bilang sarong tinutong na atang sa Kagurangnan. Dangan nag-agrangay siya sa Kagurangnan para sa Israel; sinimbag siya nin Kagurangnan.

¹⁰ Mantang idinodolot ni Samuel an atang, nagpadagos sa pagsalakay an mga Filisteo; alagad nagdaguldol sa makosog na tingog an Kagurangnan laban sa mga Filisteo kan aldaw na idto. Nagkarilibong sinda asin nagdurulag sa takot.

¹¹ Hale sa Mizpa, rinalamag kan mga Israelita an mga Filisteo asin ginaradan sa dalan sagkod sa Bet-car.

¹² Nagkua si Samuel nin sarong gapo dangan pinatindog sa pagultanan kan Mizpa asin kan Shen. An gapo inapod niyang Ebenezer huli ta an olay niya, “Tinabangan kita nin Kagurangnan sagkod digdi.”

¹³ Kaya nadaog an mga Filisteo asin dai nanggad sinda tinugotan nin Kagurangnan na masakop an Israel mantang nabubuhay pa si Samuel.

¹⁴ Nakabalik giraray sa Israel an mga syudad sa pagultanan kan Ekron saka Gat na nasakop kan mga Filisteo, kaya nakua giraray kan Israel an gabos niyang teritoryo. Dai na man nagkaigwa nin ralaban an mga Israelita asin an mga Cananeo.

¹⁵ Nagin hukom si Samuel sa Israel sa bilog niyang pagkabuhay.

¹⁶ Taon-taon, naglilibot siya sa mga syudad nin Betel, Gilgal, asin Mizpa tanganing hukoman an mga kaso sa mga lugar na idto.

¹⁷ Dangan minapuli siya sa saiyang harong sa Rama, na pinaglilingkodan man niya bilang hukom. Nagpatugdok siya duman nin altar para sa Kagurangnan.