1 Samuel 6 - Marahay na Bareta Biblia

Ibinalik an Kaban nin Tipan

¹ Pitong bulan na nasa daga kan mga Filisteo an Kaban nin Tipan.

² Inarapod kan mga tawo an mga padi asin an mga salamangkero dangan hinarapot, “Ano an satong gigibohon sa Kaban nin Tipan nin Kagurangnan? Kun ibalik ta iyan sa dating lugar, ano an dapat tang ipadara kaiba kaiyan?”

³ Nagsimbag sinda, “Kun ibabalik nindo an Kaban nin Tipan kan Dios nin Israel, kaipuhan ibalik nindo na igwang kaibang regalo para saiya tanganing matubos an saindong kasalan. Sa paaging ini, mararahay kamo asin maaaraman nindo kun tadaw ta padagos niya kamong pinapadusahan.”

⁴ “Anong regalo an ipapadara mi saiya?” an hapot kan mga tawo. Nagsimbag sinda, “Limang bulawan na pormang tumor asin limang bulawan na pormang kino; saro para sa lambang hade kan mga Filisteo, huli ta parehong padusa an ipinadara saindo asin sa limang hade.

⁵ Kaya kaipuhan maggibo kamo nin mga porma kan mga tumor asin kan mga kino na nagraot kan saindong daga, dangan omawon nindo an Dios nin Israel; tibaad paontokon na niya an pagpadusa saindo, sa saindong mga dios asin sa saindong daga.

⁶ Tadaw ta pinapatagas nindo an saindong payo arog kan hade nin Egipto asin kan mga Egipcio? Bakong aram nindo kun paano ginibo nin Dios na garo mga lolong an hade nin Egipto asin an mga Egipcio sagkod na nagtugot sindang makahale an mga Israelita?

⁷ Kaya mag-andam kamo nin bagong kariton asin duwang baka na dai pa nasasakalan; igakod nindo an mga ini sa kariton dangan alawon nindo pabalik sa toril an saindang mga ogbon.

⁸ Ibugtak nindo sa kariton an Kaban nin Tipan nin Kagurangnan; ibugtak nindo sa kataed kaini an kahon na linaogan kan pormang mga tumor asin mga kino na ipapadara nindo saiya bilang regalo tanganing tuboson an saindong mga kasalan. Dangan palargahon na nindo an kariton asin pabayaan sana nindo.

⁹ Bantayan nindo; kun magpasiring an kariton sa banwaan nin Bet-semes, an dios nin Israel iyo an nagpadara sato kan makangirhat na pesteng ini; alagad kun dai, bako siya an nagpadara kundi nagkanorongod sana.”

¹⁰ Ginibo ninda an sinabi sainda: nagkua sinda nin duwang baka dangan iginakod an mga ini sa kariton, asin ikinulong ninda sa toril an mga ogbon.

¹¹ Ibinugtak ninda an Kaban nin Tipan sa kariton kaiba an kahon na nalalaogan kan mga bulawan na pormang mga kino asin mga tumor.

¹² Deretsong naglakaw an mga baka sa dalan na pasiring sa Bet-semes, nag-uungal mantang naglalakaw. Nagsunod sa kariton an limang hade kan mga Filisteo sagkod sa pagdolonan kan Bet-semes.

¹³ Kan panahon na iyan, an mga taga Bet-semes nag-aani kan saindang trigo sa kapantayan. Kan magtingkalag sinda, nahiling ninda an Kaban nin Tipan; nagkaorogma sinda nin marahay.

¹⁴ Nakaabot an kariton sa oma ni Josue na taga Bet-semes asin nag-ontok sa harani nin sarong dakulang gapo. Tiniak kan mga tawo an kariton na kahoy asin idinolot ninda an mga baka bilang tinutong na atang sa Kagurangnan.

¹⁵ Inalsa kan mga Levita an Kaban nin Tipan asin an Kahon na linaogan kan mga bulawan na pormang mga tumor asin mga kino, dangan ibinugtak ninda sa ibabaw kan dakulang gapo. Pakatapos, nagdorolot sa Kagurangnan an mga taga Bet-semes nin mga tinutong na atang asin iba pang mga dolot.

¹⁶ An limang hadeng Filisteo nagmasid kan ginigibo ninda ini dangan nagbalik sinda sa Ekron kan aldaw na idto.

¹⁷ Nagpadara sa Kagurangnan an mga Filisteo kan limang bulawan na pormang mga tumor bilang regalo tanganing bayadan an saindang kasalan; an limang ini para sa limang syudad kan Asdod, Gaza, Askelon, Gat, asin Ekron.

¹⁸ Nagpadara man sinda nin limang bulawan na kino, saro para sa lambang syudad na sakop kan limang hadeng Filisteo, kaiba an mga nakukudalan na syudad, asin an mga baryo na mayo nin kudal. An dakulang gapo sa oma ni Josue na taga Bet-semes, na binugtakan kan Kaban nin Tipan nin Kagurangnan, yaon pa duman bilang saksi sa nangyari.

¹⁹ Ginadan nin Kagurangnan an setenta sa kalalakihan kan Bet-semes huli ta naghiling sinda sa laog kan Kaban nin Tipan. Nagmorondo an mga tawo duman huli ta dakul sainda an ginadan nin Kagurangnan.

An Kaban nin Tipan sa Kiriat-jearim

²⁰ Kaya nagsarabi an mga taga Bet-semes, “Siisay an makakatindog sa atubangan nin Kagurangnan, ining banal na Dios? Saen ta siya pwedeng ipadara tanganing magin harayo sato?”

²¹ Kaya nagpadara sinda nin mga sugo sa mga taga Kiriat-jearim tanganing magsabi, “Ibinalik na kan mga Filisteo an Kaban nin Tipan. Magdigdi kamo asin kuahon nindo ini.”