1 Samuel 5 - Marahay na Bareta Biblia

An Kaban nin Tipan sa Kamot kan mga Filisteo

¹ Kan mabihag kan mga Filisteo an Kaban nin Tipan, dinara ninda ini sa syudad nin Asdod hale sa Ebenezer.

² Ilinaog ninda an Kaban sa templo kan saindang dios na si Dagon asin ibinugtak sa kataed kan estatwa kaini.

³ Amay pa kan sunod na aldaw, nahiling kan mga taga Asdod na an estatwa ni Dagon nakadapa sa daga, sa atubangan kan Kaban nin Tipan nin Kagurangnan. Kaya binuhat ninda an estatwa asin ibinalik sa dating namumugtakan.

⁴ Kan sunod na aldaw, nahiling ninda na nakadapa na naman sa atubangan kan Kaban nin Tipan an estatwa ni Dagon. Putol an payo asin mga kamot kaini na nagkakurua ninda sa may pintoan; an hawak na sana kan estatwa an natada ki Dagon. (

⁵ Ini an dahelan kun tadaw ta sagkod ngunyan dai minatungtong sa may pintoan kan templo ni Dagon an saiyang mga padi asin an gabos na nagsasamba saiya sa Asdod.)

⁶ Pinadusahan nin Kagurangnan an mga taga Asdod asin an mga nag-eerok sa kataraed na lugar; tinakot niya sinda sa paagi nin mga tumor.

⁷ Kan mahiling kan mga tawo an nangyayari, nagsarabi sinda, “Pinapadusahan kita asin an satong dios na si Dagon kan Dios nin Israel. Dai ta pwedeng padanayon digdi an Kaban nin Tipan.”

⁸ Kaya pinasugoan ninda asin tinipon an limang hade kan mga Filisteo dangan hinapot an mga ini, “Ano an gigibohon mi sa Kaban nin Tipan kan Dios nin Israel?” Nagsimbag sinda, “Daraha nindo sa Gat.” Kaya an Kaban nin Tipan dinara ninda sa Gat, saro pang syudad kan mga Filisteo.

⁹ Alagad kan yaon na duman an Kaban, pinadusahan man nin Kagurangnan an syudad na idto, kaya nagkatarakot an mga tawo duman. Pinadusahan sinda nin Kagurangnan sa paagi nin mga tumor na nagtalubo sa gabos na nag-eerok sa syudad, aki man o gurang.

¹⁰ Kaya an Kaban nin Tipan ipinadara ninda sa Ekron, saro pang syudad kan mga Filisteo; alagad pag-abot duman, nagsarabi an mga taga Ekron, “Dinara ninda digdi an Kaban kan Dios nin Israel tanganing magkagaradan kita gabos!”

¹¹ Kaya ipinaapod giraray ninda an limang hade kan mga Filisteo dangan sinabihan, “Balikan nindo an Kaban nin Tipan nin Israel sa dating lugar kaiyan, tanganing dai kami magkagaradan sagkod an samong mga pamilya.” Nagkaigwa nin dakulang takot sa bilog na syudad huli ta makuri an padusa nin Dios.

¹² Maski idtong dai nagkagaradan nagkaigwa nin mga tumor, kaya nag-agrangay an mga tawo sa saindang mga dios.