1 Samuel 4 - Marahay na Bareta Biblia

Nabihag an Kaban nin Tipan

¹ Kan panahon na iyan nagtiripon an mga Filisteo tanganing makigera sa Israel, kaya nagluwas an mga Israelita tanganing labanan sinda. Nagkampo an mga Israelita sa Ebenezer mantang an mga Filisteo nagkampo sa Afek.

² Nagsalakay an mga Filisteo asin pakatapos nin mangirhat na ralaban, nadaog ninda an mga Israelita. Nakagadan sinda nin mga apat na ribong Israelita.

³ Kan makabalik sa kampo an mga nagkatarada, nagsarabi an kamagurangan nin Israel, “Tadaw ta itinugot nin Kagurangnan na madaog kita ngunyan na aldaw kan mga Filisteo? Magduman kita sa Shilo asin kuahon ta an Kaban nin Tipan nin Kagurangnan tanganing ibahan niya kita asin iligtas sa satong mga kaiwal.”

⁴ Kaya nagsugo sinda nin mga lalaki pasiring sa Shilo dangan kinua duman an Kaban nin Tipan nin Kagurangnan na nasa tahaw kan mga kerubin. An duwang aking lalaki ni Eli na si Hofni asin si Finehas, nag-iba sa Kaban nin Tipan.

⁵ Kan mag-abot sa kampo an Kaban nin Tipan, nagkurahaw sa kaogmahan an mga Israelita, kaya natanyog an daga.

⁶ Kan madangog kan mga Filisteo an kinurahaw, nagharapot sinda, “Ano an kahulogan kan kinurahaw na ini sa kampo kan mga Hebreyo?” Kan maaraman ninda na nag-abot sa kampo an Kaban nin Tipan nin Kagurangnan,

⁷ nagkatarakot sinda asin nagsarabi, “Igwang dios na nag-abot sa saindang kampo! Herak man sato! Dai pa nangyari an arog kaini!

⁸ Siisay an maligtas sato sa kapangyarihan kan mga makokosog na dios na iyan? Iyo iyan an mga dios na guminadan kan mga Egipcio duman sa kalangtadan!

⁹ Magmaisog kamo, mga Filisteo! Magpakalalaki kamo huli ta tibaad magin mga oripon kita kan mga Hebreyo, siring na sinda nagin mga oripon ta. Magpakalalaki kamo asin lumaban!”

¹⁰ Kaya nakilaban an mga Filisteo asin nadaog ninda an mga Israelita. Nagdurulag an mga Israelita pasiring sa saindang mga harong. Dakul an nagkagaradan: treynta mil na mga soldados an nagadan sa Israel.

¹¹ Nabihag an Kaban nin Tipan nin Dios, asin parehong nagadan an duwang aking lalaki ni Eli na si Hofni saka si Finehas.

An Pagkagadan ni Eli

¹² Sarong lalaki na gikan sa tribu ni Benjamin an nagdalagan hale sa lugar nin ralaban asin nakaabot sa Shilo kan aldaw man sanang idto. Ginirisi niya an saiyang gubing asin binugtakan nin daga an saiyang payo sa pagpahiling kan saiyang kamondoan.

¹³ Si Eli, na naghahadit para sa Kaban nin Tipan, nagtutukaw sa may dalan, nakatanaw sa harayo. Kan makalaog sa syudad an lalaki asin makapagbareta, nagkurahaw an gabos sa takot.

¹⁴ Kan madangog ni Eli an ribok, naghapot siya, “Ano an boot sabihon kan ribok na iyan?” Naghidali an lalaki pasiring ki Eli tanganing baretaan siya. (

¹⁵ Nubenta y otso na an edad ni Eli asin haros dai na siya nakakahiling.)

¹⁶ Sinabihan kan lalaki si Eli, “Nakadulag ako hale sa ralaban asin nagparadalagan ako pasiring digdi ngunyan.” Naghapot si Eli, “Ano an nangyari, aki ko?”

¹⁷ Nagsimbag an lalaki, “Nagdurulag an mga Israelita sa mga Filisteo; dakul an nagkagaradan. Kaiba duman an duwa mong aking lalaki na si Hofni saka si Finehas, asin nabihag an Kaban nin Tipan!”

¹⁸ Kan masambit kan lalaki an Kaban nin Tipan, patihaya na natumba si Eli hale sa saiyang tukawan sa may trangkahan. Gurang na siyang marahay asin mataba, kaya nabari an saiyang liog pagkatumba niya, asin nagadan siya. Nagin hukom siya sa Israel sa laog nin kwarentang taon.

An Pagkagadan kan Balo ni Finehas

¹⁹ Bados an manugang ni Eli, an agom ni Finehas, asin madali nang mangaki. Kan madangog niya na nabihag an Kaban nin Tipan nin Dios asin gadan na man an panugangan niyang si Eli saka si Finehas, biglang nagkulog an saiyang tulak asin nangaki siya.

²⁰ Kan naghihingagdan na siya, sinabihan siya kan saro sa mga babaeng nagtabang saiya, “Pakosoga an saimong boot! Sarong lalaki an ipinangaki mo!” Alagad dai nagmangno ni nagsimbag an agom ni Finehas.

²¹ An aki nginaranan niyang Ikabod na an olay, “Naghale na an kamurawayan nin Dios sa Israel!” huli ta nabihag an Kaban nin Dios asin nagadan an saiyang panugangan saka an saiyang agom.

²² “Naghale na an kamurawayan nin Dios sa Israel,” olay niya, “huli ta nabihag an Kaban nin Dios.”