1 Samuel 30 - Marahay na Bareta Biblia

An Gera Laban sa mga Amalekita

¹ Pakalihis nin duwang aldaw, nag-abot sa Ziklag si David asin an saiyang mga tawohan. Tapos pa sanang salakayon kan mga Amalekita an habagat na parte nin Juda asin an Ziklag. Sinulo ninda an banwa

² asin binihag an gabos na babae; mayo sinda nin ginadan alagad binihag ninda an lambang saro kan maghale sinda.

³ Kaya kan nag-abot si David asin an saiyang mga tawohan, nakua nindang tomtom na nin kalayo an banwa asin mayo na an saindang mga agom, mga aking lalaki asin babae.

⁴ Nagparahibi si David asin an saiyang mga tawohan sagkod na pinanluya sinda.

⁵ Maski an duwang agom ni David na si Ahinoam saka si Abigail nagkabirihag man.

⁶ Dakula an kahaditan ni David huli ta pinag-iisipan siyang gapoon kan saiyang mga tawohan huli kan pagkabihag kan saindang mga aki. Alagad pinakosog ni David an saiyang sadiri sa Kagurangnan na saiyang Dios.

⁷ Sinabihan ni David an padi na si Abiatar, na aking lalaki ni Ahimelec, “Daraha sako an efod.” Kaya dinara ni Abiatar saiya an efod.

⁸ Hinapot ni David an Kagurangnan, “Marahay daw na lamagon ko an mga parasalakay na idto? Maabotan ko pa daw sinda?” Nagsimbag an Kagurangnan, “Lamagon mo sinda; aabotan mo sinda asin mababawe an mga bihag.”

⁹ Kaya naglamag si David asin an saiyang anom na gatos na tawohan. Kan nakaabot sinda sa sapa nin Besor, nagpawalat an iba sainda.

¹⁰ Alagad nagpadagos si David sa paglamag kaiba an apat na gatos niyang tawohan; duwang gatos an nawalat huli ta paragal na sindang marahay asin dai na kayang mag-ibong sa sapa.

¹¹ An mga lalaking kaiba ni David nakanumpong sa kaawagan nin sarong hoben na Egipcio asin dinara ninda siya ki David. Tinawan ninda siya nin pagkakan asin tubig,

¹² nin nagkapirang bibingkang alang na higera, asin duwang pungot nin pasas. Pakatapos magkakan kan hoben, nagbalik an saiyang kosog; mayo siyang kinakan o ininom sa laog nin tolong aldaw asin tolong banggi.

¹³ Hinapot siya ni David, “Siisay an saimong kagurangnan? Taga saen ka?” Nagsimbag an hoben, “Saro akong Egipciong oripon nin sarong Amalekita. Binayaan ako kan sakong kagurangnan tolong aldaw na an nakalihis huli ta naghelang ako.

¹⁴ Sinalakay mi an teritoryo kan mga Keretita sa parteng habagat kan Juda asin an teritoryo kan kamaganakan ni Caleb, dangan sinulo mi an Ziklag.”

¹⁵ Hinapot siya ni David, “Pwede mo daw akong giyahan pasiring sa mga parasalakay na idto?” Nagsimbag an hoben, “Pwede, kun manuga ka sako sa ngaran nin Dios na dai mo ako gagadanon o ibabalik sa sakong kagurangnan.”

¹⁶ Giniyahan niya si David pasiring sa mga parasalakay. Wararak an mga parasalakay sa bilog na lugar; nagkakarakan sinda, nag-iirinom, asin nag-oorogma huli kan dakulang nasamsam ninda sa daga kan mga Filisteo asin sa Juda.

¹⁷ Amay pa kan sunod na aldaw, sinalakay sinda ni David asin linabanan sagkod na banggi. Mayo nin nakadulag sa mga Amalekita pwera kan apat na gatos na hoben na nakasakay sa mga kamelyo.

¹⁸ Nabawi ni David an gabos na nabihag saka mga nasamsam kan mga Amalekita; ikinaligtas man ni David an duwa niyang agom.

¹⁹ Nabawi pa niya an gabos na nabihag asin sinamsam kan mga Amalekita; sadit man o dakula, babae man o lalaki.

²⁰ Nabawi man ni David an mga baka saka mga karnero; inaralaw kan saiyang mga tawohan an gabos na hayop sa enotan ninda asin nagsarabi, “Sadiri ini ni David!”

²¹ Dangan binalikan ni David an duwang gatos niyang tawohan na dai nakaiba saiya huli sa sobrang kapagalan, kaya nagpawaralat sa sapa nin Besor. Nagsarabat sinda ki David asin sa kairiba niya; nagdolok sainda si David asin kinomusta niya sinda.

²² Alagad an nagkapirang maisip asin mayong halagang mga lalaki na nag-iba ki David an nagsarabi, “Dai sinda maninigong tawan kan satong sinamsam, huli ta dai sinda nag-iba sato. Pwede nindang kuahon an saindang mga agom asin mga aki dangan makakahale na sinda.”

²³ Alagad nagsimbag si David, “Mga tugang ko, dai nindo iyan paggibohon sa itinao sato nin Kagurangnan! Ilinikay niya kita sa pag-alaman asin itinao sa satong mga kamot an mga parasalakay.

²⁴ Dai nin siisay man na maoyon sa sinabi nindo! Kaipuhan pareho an kahirasan kan lambang saro; an mga nawalat na nagbantay kan mga kagamitan maako nin kahirasan na arog kan sa mga nakilaban.”

²⁵ Poon kaidto, ginibo ining sarong pagsusundon ni David sa Israel.

²⁶ Kan magbalik si David sa Ziklag, ipinadara niya an ibang sinamsam sa saiyang mga katood, an mga kamagurangan nin Juda, kaiba an mensaheng ini, “Uya an sarong regalo para saindo hale sa sinamsam na samong kinua sa mga kaiwal nin Kagurangnan.”

²⁷ Ipinadara niya an mga regalong ini sa mga taga Betel, sa mga taga Rama sa habagat na parte nin Juda, asin sa mga taga Jattir,

²⁸ sa Aroer, sa Sifmot, sa Estemoa,

²⁹ asin Racal; sa kamaganakan ni Jerameel, sa mga Cineo,

³⁰ asin sa mga taga Horma, Borasan, Atac,

³¹ saka Hebron. Ipinadara ini ni David sa gabos na lugar na naabot niya asin kan saiyang mga tawohan.