1 Samuel 3 - Marahay na Bareta Biblia

¹ Kan naglilingkod sa Kagurangnan an aking si Samuel, dikit sana an nag-abot na mensahe hale sa Kagurangnan asin bihira an mga bisyon na hale saiya.

² Sarong banggi, si Eli na maluya na an mata, nagkakatorog sa saiyang kwarto;

³ duman nagkatorog si Samuel sa santwaryo na namumugtakan kan Kaban nin Tipan. Bago magliwanag an aldaw, mantang naglalaad pa an ilaw,

⁴ nag-apod an Kagurangnan, “Samuel! Samuel!” Nagsimbag siya, “Uya po ako!”

⁵ dangan nagdalagan siya pasiring ki Eli. Sinabihan niya ini, “Inapod mo po ako, asin uya ako.” Alagad nagsimbag si Eli, “Dai taka inapod; magbalik ka sa saimong higdaan.” Kaya nagbalik si Samuel sa saiyang higdaan.

⁶ Inapod giraray nin Kagurangnan si Samuel. Nagbangon siya, nagduman ki Eli dangan nagsabi, “Inapod mo po ako, asin uya ako.” Alagad nagsimbag si Eli, “Dai taka inapod, aki ko; magbalik ka sa saimong higdaan.”

⁷ Dai aram kan aking si Samuel na an Kagurangnan an nag-apod saiya huli ta dai pa lamang nagtaram saiya an Kagurangnan.

⁸ Sa ikatolong beses inapod nin Kagurangnan si Samuel; nagbangon siya, nagduman ki Eli asin nagsabi, “Inapod mo po ako, asin uya ako.” Saka naaraman ni Eli na an Kagurangnan an nag-aapod sa aki,

⁹ kaya sinabihan niya ini, “Magkatorog ka giraray. Kun apodon ka pa niya, ini an sabihon mo, ‘Magtaram ka, Kagurangnan, huli ta naghihinanyog an saimong sorogoon.’” Kaya nagbalik giraray si Samuel sa saiyang higdaan.

¹⁰ Nag-abot an Kagurangnan, nagtindog duman, asin nag-apod arog kan enot, “Samuel! Samuel!” Nagsimbag si Samuel, “Magtaram ka, huli ta naghihinanyog an saimong sorogoon.”

¹¹ Tinaraman nin Kagurangnan si Samuel, “Maabot an panahon na gigibohon ko an sarong bagay sa Israel; sarong bagay na makakatakot kaya mabibigla an siisay man na makadangog.

¹² Sa aldaw na iyan, ootobon ko an gabos kong itinaram laban ki Eli asin sa saiyang pamilya, magpoon sa kapinonan sagkod sa kataposan.

¹³ Tinaraman ko na siya na papadusahan ko sagkod pa man an saiyang pamilya huli kan mga maraot na sinabi kan saiyang mga aking lalaki tumang sako. Aram ni Eli na ginigibo ninda ini, alagad dai niya sinda sinaway.

¹⁴ Kaya isinusumpa ko sa pamilya ni Eli na mayo nin atang o dolot na makakatubos sa kasalan na ini.”

¹⁵ Naghigda giraray si Samuel sagkod mag-aga; dangan binukasan niya an mga pintoan kan harong nin Kagurangnan. Natakot siyang isabi an bisyon ki Eli.

¹⁶ Alagad inapod siya ni Eli, “Samuel, aki ko!” “Uya po ako,” an simbag ni Samuel.

¹⁷ “Ano an itinaram saimo nin Kagurangnan?” an hapot ni Eli. “Dai mo pagtagoon an ano man sako. Makuri an magigin padusa saimo nin Dios kun dai mo sako sabihon an gabos na itinaram niya saimo.”

¹⁸ Kaya inistorya saiya ni Samuel an gabos; mayo siyang itinago. Dangan nagsabi si Eli, “Siya an Kagurangnan; gigibohon niya an pinaghohona niyang marahay.”

¹⁹ Nagdakula si Samuel na danay na iniibahan nin Kagurangnan; inotob niya an lambang sinabi ni Samuel.

²⁰ Kaya an gabos na tawo sa Israel, magpoon sa sarong poro kan daga sagkod sa ibong na poro, nakaaram na si Samuel sarong tunay na propeta nin Kagurangnan.

²¹ Padagos na nagpahayag an Kagurangnan sa Shilo, huli ta duman siya nagpahiling asin nagtaram ki Samuel. Kun minataram si Samuel minahinanyog an bilog na Israel.