1 Samuel 27 - Marahay na Bareta Biblia

Si David sa Kaibahan kan mga Filisteo

¹ Nagsaboot si David, “Maabot an aldaw na gagadanon ako ni Saul. An pinakamarahay na magigibo ko iyo an magdulag pasiring sa daga kan mga Filisteo; dai na ako pagpaparahanapon ni Saul sa daga nin Israel, asin magigin ligtas ako.”

² Kaya kaiba an anom na gatos niyang mga tawohan, nagduman si David ki Akis na aking lalaki ni Maoc, na hade nin Gat.

³ Duman nag-erok si David asin an saiyang mga tawohan, kaiba an saindang mga pamilya. Kaiba man ni David an duwa niyang agom na si Ahinoam na taga Jezreel, asin si Abigail, an balo ni Nabal na taga Carmelo.

⁴ Kan mabaretaan ni Saul na nagdulag si David pasiring sa Gat, nag-ontok na siya sa paghanap ki David.

⁵ Nagsabi si David ki Akis, “Kun nawiwilihan mo ako, tawe ako nin lugar na eerokan ko; dai ako angay na mag-erok sa pangenot na syudad sa kaibahan mo.”

⁶ Kaya itinao saiya ni Akis an banwa nin Ziklag. Iyo ini an dahelan kun tano ta sagkod ngunyan nasasadirihan kan mga hade nin Juda an Ziklag.

⁷ Nag-erok si David sa daga kan mga Filisteo sa laog nin dyes y seis na bulan.

⁸ Sa laog kan panahon na iyan, dakul na beses na sinalakay ni David asin kan saiyang mga tawohan an mga taga Gesur, Girsi, asin Amalek, na haloy nang nag-erok sa rehiyon na idto. Minasalakay duman si David sagkod sa Sur, pasiring sa Egipto.

⁹ Ginagaradan niya an gabos na lalaki asin babae saka sinasamsam an mga karnero, baka, asno, kamelyo, patin an mga gubing. Dangan minabalik siya ki Akis.

¹⁰ Kun minahapot si Akis, “Saen kamo nagsalakay ngunyan?” minasimbag si David na nagduman siya sa habagat na parte nin Juda o sa teritoryo kan tribu ni Jerameel o sa teritoryo kan mga Cineo.

¹¹ Ginagadan ni David an gabos na lalaki asin babae, tanganing mayo nin siisay man na makabalik sa Gat asin magbareta kun ano an ginibo ni David saka kan saiyang mga tawohan. Siring kaini an ginibo ni David sa bilog na panahon na nag-erok siya sa daga kan mga Filisteo.

¹² Nagtubod si Akis ki David; nagsaboot siya, “Naoongisan siya nin marahay kan saiyang banwaan na Israel, kaya danay na maglilingkod siya sako.”