1 Samuel 25 - Marahay na Bareta Biblia

An Pagkagadan ni Samuel

¹ Nagadan si Samuel asin nagtiripon an bilog na Israel; ipinagmondo ninda an saiyang pagkagadan. Dangan ilinubong siya sa saiyang harong sa Rama. Pakatapos kaini, nagpasiring si David sa kalangtadan nin Paran.

Si David asin si Abigail

^2-3 Igwa nin sarong lalaki na an ngaran Nabal; kaayon siya sa kamaganakan ni Caleb. Gikan siya sa banwa nin Maon asin igwa nin sadiring daga harani sa banwa nin Carmelo. Mayaman siyang marahay; tolong ribo an sadiri niyang mga karnero asin sangribo an saiyang kanding. Magayon asin madonong an agom niyang si Abigail, alagad maraot an ugale kan lalaking ini. Ginuguntingan ni Nabal an saiyang mga karnero sa Carmelo,

⁴ asin nabaretaan ini ni David na yaon duman sa kalangtadan.

⁵ Kaya pinagbotan niya an sampolong hoben na lalaki na magduman sa Carmelo, hanapon si Nabal, asin komustahon para saiya.

⁶ Ini an ipinasabi sainda ni David; “An katoninongan mapasaimo, sa saimong pamilya asin sa saimong pagsadiri.

⁷ Nabaretaan kong naggugunting ka kan saimong mga karnero; boot kong maaraman mo na nagin kaiba mi an saimong mga pastor asin dai mi sinda ginibohan nin maraot. Mayong nawara sa saimong pagsadiri mantang idtoon sinda sa Carmelo.

⁸ Hapoton mo sinda asin sasabihan ka ninda. Kaya itugot logod na mawilihan mo an sakong mga hoben na lalaki huli ta nag-abot sinda sa aldaw nin pyesta. Nakikimaherak akong itao mo an saimong makakaya sa samo na saimong mga sorogoon asin sa saimong katood na si David.”

⁹ An mensaheng ini itinao kan mga tawohan ni David ki Nabal sa ngaran ni David dangan naghalat sinda.

¹⁰ Nagsimbag si Nabal, “Siisay si David? Mayo akong midbid na siring an ngaran! Kadakul ngunyan an mga oripon na nagdudulag sa saindang mga kagurangnan!

¹¹ Tama daw na kuahon ko an sakong tinapay saka tubig asin karne na para sa sakong mga paragunting, dangan itao ko sana sa kun siisay na tawo na dai ko ngani aram an pinaghalean?”

¹² Kaya nagbalik ki David an mga sinugo asin ibinareta saiya an sinabi ni Nabal.

¹³ Pinagbotan ni David an saiyang mga tawohan, “Hagkosan nindo an saindong mga espada!” Nagsurunod sinda gabos. Ihinagkos man ni David an saiyang espada dangan naghale kaiba an apat na gatos kan saiyang mga tawohan; iwinalat niya an duwang gatos tanganing magbantay kan mga gamit.

¹⁴ An saro sa mga sorogoon ni Nabal an nagsabi sa agom ni Nabal na si Abigail, “Nagpadara nin mga sugo si David hale sa kalangtadan tanganing magtaong galang sa satong kagurangnan, alagad ininsulto niya sinda.

¹⁵ Nagin marahay sinda samo; dai ninda kami kinulogan, asin sa gabos na panahon na nasa kaibahan mi sinda sa kaomahan, mayo nin ano man na nawara samo.

¹⁶ Binantayan ninda kami aldaw-banggi mantang nag-aataman kami kan mga karnero.

¹⁷ Kaya dapat maisihan mo ini tanganing maaraman mo an tamang gibohon, huli ta maraot an mangyayari sa satong kagurangnan asin sa bilog niyang pamilya. Dai niya dinadangog an siisay man huli kan maraot niyang ugale!”

¹⁸ Hidaling nagkua si Abigail nin duwang gatos na tinapay, duwang laogan na anit na pano nin arak, limang linitson na karnero, dyes y syete kilos na pinaalang na trigo, sanggatos na pungot nin pasas, asin duwang gatos na bibingkang alang na higera; ikinarga niya ini gabos sa mga asno.

¹⁹ Dangan sinabihan niya an mga sorogoon, “Mag-enot na kamo asin masunod ako.” Alagad dai niya sinabihan an saiyang agom na si Nabal.

²⁰ Nakalunad si Abigail sa saiyang asno kan masabat niya si David asin an saiyang mga tawohan sa sarong likoan sa bulod.

²¹ Nagsasaboot kaidto si David, “Tano ta binantayan ko pa an pagsadiri kan tawong idto digdi sa kalangtadan? Mayong nawara sa pagsadiri niya, asin ngunyan binabayadan niya nin karatan an ginibo kong karahayan!

²² Gadanon logod ako nin Dios kun dai ko gadanon an lambang saro kan mga lalaking idto bago mag-aga!”

²³ Kan mahiling ni Abigail si David, hidali siyang naglusad sa saiyang asno asin nagdapa sa daga,

²⁴ sa pamitisan ni David. Nagsabi siya ki David, “Mapasako an kasalan, kagurangnan, alagad dangoga man ako.

²⁵ Hare pagtawe nin halaga si Nabal, an mayong halagang tawong idto! Arog man nanggad siya kan kahulogan kan saiyang ngaran—sarong lolong! Mayo ako duman kan mag-abot an saimong mga sorogoon.

²⁶ An Kagurangnan an nagpugol saimo tanganing dai mo mabalos asin magadan an saimong mga kaiwal. Minasumpa ako saimo sa ngaran kan buhay na Kagurangnan na papadusahan an saimong mga kaiwal asin an gabos na nagmamawot na darahan ka nin karatan arog ki Nabal.

²⁷ Ngunyan, akoa ining regalo na dinara ko saimo; tawan ini sa saimong mga tawohan.

²⁸ Patawadon mo ako kan ano man na kasalan na naginibo ko. Gigibohon kang hade nin Kagurangnan, asin an saimong mga kapagarakian, huli ta nakikilaban ka kan saiyang mga gera; mayong makukuang karatan saimo mantang buhay ka.

²⁹ Kun igwang magsalakay saimo asin magmawot na gadanon ka, an Kagurangnan na saimong Dios an maataman saimo, arog kan pag-ataman nin sarong tawo sa sarong mahalagang bagay. Alagad saiyang itatapok an saimong mga kaiwal, siring sa mga gapo na ilinalagpitaw nin sarong tawo.

³⁰ Kun gibohon na an mga bagay na ini nin Kagurangnan na ipinanuga niya saimo, asin kun gibohon ka na niyang hade nin Israel,

³¹ dai ka na magkakaigwa nin dahelan tanganing magmondo o magbasol, huli ta nakagadan ka na mayong dahelan o huli ta nagbalos ka. Asin kun bendisyonan ka na nin Kagurangnan, giromdoma man ako.”

³² Sinabihan siya ni David, “Pag-omawon an Kagurangnan, an Dios nin Israel, na nagsugo saimo ngunyan na aldaw tanganing sabaton ako!

³³ Salamat sa Dios huli kan marahay mong kaisipan asin huli kan paglikayan mo sako sa paggadan asin sa pagbalos ngunyan na aldaw.

³⁴ Dai itinugot nin Kagurangnan na makulogan taka. Alagad isinusumpa ko sa ngaran kan buhay na Dios nin Israel na kun dai ka naghidali sa pagsabat sako, gadan kutana an gabos na tawohan ni Nabal bago mag-aga!”

³⁵ Dangan inako ni David an mga dara ni Abigail asin sinabihan, “Magpuli ka na. Dai ka maghandal huli ta gigibohon ko an boot mo.”

³⁶ Nagbalik si Abigail ki Nabal, na nagbabangkete sa saiyang harong, sarong bangkete na maninigo sa sarong hade. Burat na si Nabal asin maogma nin marahay, kaya dai siya inosipan ni Abigail sagkod kan sunod na aldaw.

³⁷ Pagkaaga, kan bako nang burat si Nabal, isinabi ni Abigail an gabos. Inatake sa puso si Nabal asin naparalisar siya.

³⁸ Pakalihis nin sampolong aldaw, hinampak nin Kagurangnan si Nabal asin nagadan siya.

³⁹ Kan mabaretaan ni David na gadan na si Nabal, nagsabi siya, “Pag-omawon an Kagurangnan! Siya an nagbalos ki Nabal huli kan pag-insulto niya sako asin ilinikay ako nin Kagurangnan sa pagkasala. Pinadusahan nin Kagurangnan si Nabal huli kan karatan na ginibo niya.” Dangan nagpatogon si David ki Abigail na boot niya ining magin agom.

⁴⁰ Nagduman an mga sorogoon ni David ki Abigail sa Carmelo asin nagsabi, “Pinadigdi kami ni David tanganing ipag-iba mi ika saiya tanganing magin saiyang agom.”

⁴¹ Nagdapa sa daga si Abigail dangan nagsabi, “Sorogoon niya ako, asin andam ako sa paghanaw kan mga bitis kan saiyang mga sorogoon.”

⁴² Nagtindog tolos si Abigail asin naglunad sa saiyang asno; nag-iba siya sa mga sorogoon ni David kaiba an lima niyang sorogoon, dangan nagin agom siya ni David.

⁴³ Agom na ni David si Ahinoam na taga Jezreel, asin ngunyan nagin agom man niya si Abigail.

⁴⁴ An aki ni Saul na si Mical, na dating agom ni David, itinao ni Saul ki Palti na aking lalaki ni Lais, na taga Gallim.