1 Samuel 23 - Marahay na Bareta Biblia

Ilinigtas ni David an banwa nin Keila

¹ Nabaretaan ni David na sinalakay kan mga Filisteo an banwa nin Keila asin hinahabon an bagong inaning trigo.

² Kaya hinapot ni David an Kagurangnan, “Dapat daw na magduman ako asin salakayon an mga Filisteo?” “Lakaw,” an simbag nin Kagurangnan. “Salakayon mo sinda asin ligtasan an Keila.”

³ Alagad sinabihan si David kan saiyang mga tawohan, “Tarakot na ngani kita digdi sa Juda, gurano pa daw kun magduman kita sa Keila tanganing salakayon an mga hukbo kan mga Filisteo?”

⁴ Kaya hinapot giraray ni David an Kagurangnan. Nagsimbag an Kagurangnan, “Lakaw, asin magduman ka sa Keila, huli ta papangganahon taka laban sa mga Filisteo.”

⁵ Kaya nagduman sa Keila si David asin an saiyang mga tawohan dangan sinalakay an mga Filisteo; ginaradan ninda an kadaklan sainda asin sinamsam an saindang mga hayop. Siring kaiyan an ginibong pagligtas ni David sa mga nag-eerok sa Keila.

⁶ Kan magdulag pasiring ki David si Abiatar na aking lalaki ni Ahimelec, dara niya an efod.

⁷ Naosipan si Saul na yaon duman si David sa Keila, asin nagsabi siya, “Itinao na sako nin Dios si David; kinulong niya an saiyang sadiri kan maglaog siya sa banwang nakukudal asin masasarig an trangkahan.”

⁸ Kaya inapod ni Saul an saiyang mga tawohan tanganing makigera laban sa Keila, asin tanganing palibotan si David saka an mga kairiba niya.

⁹ Kan maaraman ni David na nagpaplanong salakayon siya ni Saul, sinabihan niya an pading si Abiatar, “Daraha digdi an efod.”

¹⁰ Dangan nagsabi si David, “Kagurangnan, Dios nin Israel, naaraman kong nag-iisip si Saul na magdigdi sa Keila tanganing raoton ini huli sako, na saimong sorogoon.

¹¹ Itatao daw ako kan mga taga Keila sa kamot ni Saul? Totoo daw na madigdi si Saul, siring sa sakong nabaretaan? O Kagurangnan, Dios nin Israel, nakikimaherak akong simbagon mo ako!” Nagsimbag an Kagurangnan, “Madigdi si Saul.”

¹² Naghapot giraray si David, “Itatao daw ako asin an sakong mga kairiba kan mga taga Keila sa kamot ni Saul?” “Itatao ka ninda,” an simbag nin Kagurangnan.

¹³ Kaya hidaling naghale sa Keila si David asin an saiyang mga tawohan—mga anom na gatos gabos—asin dai na sinda nag-ontok sa paglakaw. Kan maaraman ni Saul na nakadulag si David hale sa Keila, dai na niya ipinadagos an pagsalakay.

Si David sa Kabubuldan

¹⁴ Nagtago si David sa kabubuldan, sa kalangtadan nin Zif. Padagos man si Saul sa paghingowa na makua siya, alagad dai siya itinao nin Dios ki Saul.

¹⁵ Natakot si David huli ta pinagmawot ni Saul na gadanon siya. Yaon duman si David sa Hores, sa kalangtadan nin Zif.

¹⁶ Sinungko siya duman ni Jonatan asin pinakosog an saiyang pagsarig sa Dios.

¹⁷ Nagsabi si Jonatan, “Dai ka matakot huli ta dai ka madadakop kan ama kong si Saul. Naaraman niyang ika an magigin hade nin Israel asin ako an sunod saimo.”

¹⁸ Dangan naggibo sindang duwa nin tipan sa atubangan nin Kagurangnan. Pakatapos, nagpuli sa saiyang harong si Jonatan, alagad nagpawalat si David sa Hores.

¹⁹ May nagkapirang taga Zif na nagduman ki Saul sa Gibea asin nagsumbong saiya, “Nagtatago sa samong teritoryo si David, duman sa Hores, sa Bukid nin Hakila, sa habagat na parte kan kalangtadan nin Judea.

²⁰ Naaaraman mi, Mahal na Hade, kun gurano an saimong pagmawot na madakop si David; kaya magduman ka sa samong teritoryo, asin hihingowahon ming ikatao siya saimo.”

²¹ Nagsimbag si Saul, “Bendisyonan logod kamo nin Kagurangnan huli ta naherak kamo sako!

²² Magbalik kamo asin aramon nanggad nindo kun haen siya ngunyan asin kun siisay an nakahiling saiya duman. Nadangog kong tuso siyang marahay.

²³ Aramon nindo an mga lugar na pinagtatagoan niya, asin ibareta nindo tolos sako. Dangan maiba ako saindo, asin kun yaon pa siya duman, hahanapon ko siya sagkod na sakong madakop, maski liboton ko an bilog na daga nin Juda.”

²⁴ Kaya naghale sinda asin naenot ki Saul na magbalik sa Zif. Si David asin an saiyang mga tawohan yaon duman sa kalangtadan nin Maon, sa habagat na parte kan kalangtadan nin Judea.

²⁵ Naglakaw si Saul asin an saiyang mga tawohan tanganing hanapon si David, alagad naaraman ini ni David, kaya nagduman siya sa magapong bulod sa kalangtadan nin Maon asin duman nag-ontok. Kan mabaretaan ini ni Saul, linamag niya duman si David.

²⁶ Sa ibong kan bulod nag-agi si Saul asin an saiyang mga tawohan mantang si David asin an saiyang mga kairiba sa ibong man nag-agi; nasa tahaw ninda an bulod. Naghihidale si David asin an saiyang mga kairiba na makarayo ki Saul saka sa mga tawohan niya, na naghaharani sainda. Haros madadakop na si David asin an saiyang mga kairiba.

²⁷ Dangan nag-abot an sarong sugo na nagsabi ki Saul, “Magbalik ka tolos huli ta sinalakay kan mga Filisteo an daga!”

²⁸ Kaya dai ipinadagos ni Saul an paglamag ki David asin nagbalik siya tanganing labanan an mga Filisteo. Iyo ini an dahelan kun tano ta an lugar na idto nginaranan na Gapo nin Pagdulag.

²⁹ Naghale duman si David asin nag-erok sa rehiyon nin Engedi.