1 Samuel 22 - Marahay na Bareta Biblia

An Paggadan sa mga Padi

¹ Nagdulag si David sa syudad nin Gat asin nagduman sa sarong lungib, harani sa banwa nin Adullam. Kan mabaretaan kan saiyang mga tugang na lalaki asin iba pang mga kadugo na idtoon siya duman, nagpasiring sinda saiya.

² Nagduman man ki David an mga tawong inapi, an mga may utang asin an mga bakong kontento sa buhay, haros apat na gatos gabos, asin si David an saindang nagin pamayo.

³ Hale duman, nagpasiring si David sa Mizpa nin Moab asin sinabihan an hade nin Moab, “Tugoteng magdigdi an sakong ama saka ina asin digdi ngona mag-erok sa kaibahan mo, sagkod na maaraman ko kun ano an gigibohon nin Dios para sako.”

⁴ Kaya iwinalat ni David an saiyang mga magurang sa kaibahan kan hade nin Moab; duman ngona sinda nag-erok kan panahon na nagtatago si David sa lungib.

⁵ Dangan sinabihan si David kan propetang si Gad, “Dai ka mag-ontok digdi; magduman ka tolos sa daga nin Juda.” Kaya naghale si David asin nagduman sa kadlagan nin Heret.

⁶ Sarong aldaw, yaon duman sa Gibea si Saul nagtutukaw sa lindong nin sarong kahoy na sampalok sa alitoktok nin sarong bulod; kapot niya an saiyang garod asin napapalibotan siya kan saiyang mga opisyal. Naaraman na niya kun saen nagtatago si David asin an saiyang mga tawohan.

⁷ Sinabihan ni Saul an saiyang mga opisyal, “Pagdangog kamo, mga Benjaminita! Sa paghona nindo, tatawan kamo gabos ni David nin mga oma asin mga ubasan, dangan gigibohon kamong mga opisyal sa saiyang hukbo?

⁸ Bakong iyo iyan an dahelan kun tano ta nag-iisip kamong labanan ako? Mayo nin saro man saindo na nagsumbong sako na an sadiri kong aking lalaki nakipagtipan ki David. Mayo nin saro man saindo na nagmamakulog sako o nagsasabi na sa mga oras na ini, si David na saro kan sakong mga tawohan, naghahalat kan tamang panahon tanganing gadanon ako, asin an sadiri kong aki iyo pa an nagdagka saiya!”

⁹ Nagsimbag si Doeg na Edomita, na nagtitindog kaiba kan mga opisyal ni Saul, “Nahiling ko si David kan magduman siya sa Nob, ki Ahimelec na aking lalaki ni Ahitub.

¹⁰ Hinapot pa ni Ahimelec an Kagurangnan kun ano an dapat gibohon ni David, dangan tinawan niya si David nin pagkakan. Itinao man niya ki David an espada ni Goliat na Filisteo.”

¹¹ Kaya ipinaapod ni Saul an padi na si Ahimelec asin an mga kadugo niya, na mga padi man sa Nob. Nagduman sinda ki Saul.

¹² Sinabihan ni Saul si Ahimelec, “Pagdangog, Ahimelec!” “Naghihinanyog ako, mahal na hade” an simbag niya.

¹³ Hinapot siya ni Saul, “Tano ta nag-iisip kamo ni David laban sako? Tano ta tinawan mo siya nin pagkakan asin espada, saka hinapot mo pa an Dios para saiya? Nagrerebelde siya sako asin naghahalat kan tamang panahon tanganing gadanon ako!”

¹⁴ Nagsimbag si Ahimelec, “Bakong si David an pinakamaimbod mong opisyal, an saimong manugang, pamayo kan saimong bantay, asin iginagalang kan gabos na yaon sa laog kan saimong harong?

¹⁵ Totoo, hinapot ko an Dios para saiya, alagad bako idto an enot na paggibo ko kaiyan. Manongod sa pagtumang saimo, mahal na hade, hare man pagduda sako o sa kiisay man sa sakong pamilya. Mayo akong naaraman manongod sa bagay na iyan!”

¹⁶ Nagsabi an hade, “Kaipuhan gadanon ka asin an gabos mong kadugo.”

¹⁷ Dangan sinabihan kan hade an mga bantay na nagtitindog sa palibot niya, “Gadana nindo an mga padi nin Kagurangnan; pag-iriba sinda ni David asin dai sinda nagsabi sako na nagdulag siya, maski aram na ninda iyan.” Alagad mayo nin saro sa mga bantay na naghiro tanganing gadanon an mga padi nin Kagurangnan.

¹⁸ Kaya sinabihan ni Saul si Doeg, “Gadana sinda!” Asin ginadan sinda gabos ni Doeg; kan aldaw na idto, ginadan niya an otsenta y singkong padi na anas maninigong magsulot kan efod.

¹⁹ Ipinagadan man ni Saul an iba pang mga nag-eerok sa Nob, an syudad kan mga padi: mga lalaki asin mga babae, mga aki saka mga pasuso, baka, asno sagkod karnero—gabos saiyang ipinagadan.

²⁰ Alagad nakadulag si Abiatar, an saro kan mga aking lalaki ni Ahimelec, asin nagduman ki David.

²¹ Inosip ni Abiatar ki David kun pano ginaradan ni Saul an mga padi nin Kagurangnan.

²² Nagsabi si David, “Kan mahiling ko si Doeg kan aldaw na idto duman sa Nob, aram kong masumbong siya ki Saul. Kaya ako an dahelan kan pagkagadan kan gabos mong kadugo.

²³ Umiba ka sako asin dai ka matakot; huli ta an boot maggadan sako iyo man sana an boot maggadan saimo, alagad sa kaibahan ko, magigin ligtas ka.”