1 Samuel 21 - Marahay na Bareta Biblia

Nagdulag si David ki Saul

¹ Nagduman si David sa Nob, sa pading si Ahimelec. Nagtatakig na nagluwas si Ahimelec sa pagsabat ki David asin naghapot, “Tano ta solo ka sanang nagdigdi?”

² “Nagdigdi ako huli ta sinugo ako kan hade,” an simbag ni David. “Sinabihan niya akong dai dapat ipaaram sa kiisay man an ipinapagibo niya sako. Manongod sa sakong mga tawohan, sinabihan ko sindang sabaton ako sa sarong lugar.

³ Ngunyan, ano an yaon digdi? Tawe ako nin limang pedasong tinapay o kun ano man an yaon.”

⁴ Nagsimbag an padi, “Mayo akong ordinaryong tinapay; igwa digdi nin banal na tinapay. Mapapasaindo iyan kun dai nagdorog sa babae an saimong mga tawohan.”

⁵ Nagsimbag si David, “An totoo, irinarayo samo an mga babae sa samong mga paglakaw, maski ordinaryong mga lakaw; gurano pa daw ngunyan na mahalaga an lakaw ming ini!”

⁶ Kaya itinao kan padi an banal na tinapay ki David huli ta iyo man sana idto an tinapay duman—an mga idinolot sa Dios, na hinale sa banal na lamesa asin rinibayan nin bagong tinapay. (

⁷ Kan aldaw na idto, yaon duman an pamayong pastor ni Saul na si Doeg, na taga Edom, huli ta kaipuhan otobon niya an sarong banal na panuga.)

⁸ Sinabihan ni David si Ahimelec, “Igwa ka digdi nin garod o espada na ikakatao sako? Mayo na akong panahon tanganing kuahon an sakong espada o ibang armas huli ta hidali an pagboot na itinao sako kan hade.”

⁹ Nagsimbag si Ahimelec, “Uya digdi an espada ni Goliat na Filisteo, na saimong ginadan sa Kapantayan nin Ela; yaon sa likod kan efod, napapatos nin yamit. Kun boot mo, daraha; huli ta iyo sana iyan an armas digdi.” “Tawan sako,” an simbag ni David. “Mayo nang maorog pang espada saen man na lugar, ki sa espadang iyan.”

¹⁰ Kaya naghale si David sa pagdulag ki Saul; nagduman siya ki Akis na hade nin Gat.

¹¹ Sinabihan si Akis kan saiyang mga opisyal, “Bakong si David ini, an hade kan saiyang daga? Iyo ini an lalaking ipinag-aawit kan kababaehan, mantang sinda nagsasayaw, ‘Nakagadan si Saul nin rinibo, alagad nakagadan si David nin manampolong ribo.’”

¹² Rinimpos ni David sa saiyang puso an mga tataramon na ini, asin natakot siya nin marahay ki Akis, na hade nin Gat.

¹³ Kaya binago niya an saiyang hiro sa atubangan ninda; nagsagin-sagin siyang bua kun pinupugol siya ninda. Nagsusurat siya nin kun ano-ano sa trangkahan kan syudad asin pinabayaan niyang magbulos an saiyang laway sa saiyang barabas.

¹⁴ Sinabihan ni Akis an saiyang mga opisyal, “Dai nindo nahihiling na bua an tawong iyan! Tano ta dinara pa nindo siya sako?

¹⁵ Nakukulangan pa daw ako nin mga bua kaya dinara pa nindo sa atubangan ko an sarong ini? Hala, luwasan nindo siya sa sakong harong!”