1 Samuel 20 - Marahay na Bareta Biblia

Tinabangan ni Jonatan si David

¹ Dangan naghale si David sa Naiot sa Rama asin nagduman ki Jonatan. Hinapot niya si Jonatan, “Ano an ginibo ko? Ano an sakong kasalan? Anong karatan an ginibo ko sa saimong ama ta boot niya akong gadanon?”

² Nagsimbag si Jonatan, “Dai logod itugot nin Dios na magadan ka! Sinasabi sako kan sakong ama an gabos niyang ginigibo, mahalaga man o bako, kaya dai niya ini tatagoon sako. Bako iyan totoo!”

³ Alagad nagsimbag si David, “Aram kan saimong ama na nawiwilihan mo ako nin marahay, kaya naisip niyang dai ipaaram saimo an saiyang kaisipan tanganing dai ka mamondo. Alagad minasumpa ako saimo, sa ngaran kan buhay na Kagurangnan, na saro na sanang lakad an nasa pagultanan ko asin an kagadanan!”

⁴ Nagsabi si Jonatan, “Gigibohon ko an ano man na boot mo.”

⁵ Nagsimbag si David, “Pyesta kan Gimata nin Bulan sa aga asin dapat kaiba ako kan hade sa pagkakan. Alagad kun itutugot mo, malakaw ako asin matago sa kaomahan sagkod na magbanggi kan ikatolong aldaw.

⁶ Kun hanapon ako kan saimong ama, sabihan mo siyang nakimaherak ako saimong tugotan na makapuli sa Betlehem, huli ta igwa duman nin taonan na sakripisyo para sa sakong pamilya.

⁷ Kun magsabi siyang, ‘Marahay’ magigin ligtas ako; alagad kun maanggot siya, maaaraman mong maraot an nasa isip niya para sako.

⁸ Kaya nakikimaherak ako saimo, na otobon mo an banal mong panuga sako. Alagad kun igwa akong kasalan, ika na mismo an gumadan sako! Tano ta kaipuhan pang darahon mo ako sa saimong ama?”

⁹ “Dai ka mag-isip nin siring!” an simbag ni Jonatan. “Kun totoong aram kong boot kang gadanon kan sakong ama, dai ko daw iyan isabi saimo?”

¹⁰ Dangan nagsabi si David, “Siisay an mapaisi sako kun may kaanggotan an pagsimbag saimo kan saimong ama?”

¹¹ Nagsabi si Jonatan, “Madya, magduman kita sa kaomahan.” Kaya nagduman sinda,

¹² dangan nagsabi si Jonatan ki David, “An Kagurangnan, an Dios nin Israel, an satong magin saksi! Sa siring kaining oras sa aga o sa masunod na aldaw, hahapoton ko an sakong ama. Kun marahay an pagmate niya manongod saimo, mapasugo ako saimo.

¹³ Kun nag-iisip siyang kulogan ka, gadanon logod ako nin Kagurangnan kun dai taka paisihon asin padulagon. Ibahan ka logod nin Kagurangnan siring na inibahan niya an sakong ama!

¹⁴ Kun buhay pa ako, ipahiling mo sako an dayupot na pagkamoot nin Kagurangnan; alagad kun magadan ako,

¹⁵ ipahiling mo logod an saimong pagkadayupot sa sakong pamilya sagkod pa man. Sa panahon na gadanon nin Kagurangnan an gabos mong kaiwal,

¹⁶ dai mo man logod malingawan an tipan nyatong ini sa lambang saro. Kun mangyari iyan, padusahan ka logod nin Kagurangnan.”

¹⁷ Pinasumpa giraray ni Jonatan si David na mamotan siya, huli ta namotan niya si David siring kan pagkamoot niya sa saiyang sadiri.

¹⁸ Dangan sinabihan niya si David, “Pyesta kan Gimata nin Bulan sa aga; hahanapon ka huli ta mayo ka sa tukawan mo.

¹⁹ Sa ikatolong aldaw, orog na hahanapon ka; kaya magduman ka sa lugar na pinagtagoan mo kaidto asin magtago ka sa likod kan tambak nin mga gapo.

²⁰ Tolong beses akong mapana sa may pinagtatagoan mo, na garo iyo idto an pinapatamaan ko.

²¹ Dangan ipapahanap ko an mga bosog sa sakong sorogoon. Kun sabihan ko siyang, ‘Hilinga, yaon diyan sa harani mo an mga bosog; kuaha na,’ nangangahulogan iyan na ligtas ka asin pwede nang lumuwas. Isinusumpa ko sa ngaran kan buhay na Kagurangnan na dai ka mamumugtak sa ano man na pag-alaman.

²² Alagad kun sabihan ko siyang, ‘Harayo saimo an mga bosog,’ maghale ka na, huli ta pinapahale ka na nin Kagurangnan.

²³ Manongod sa satong panuga sa lambang saro, an Kagurangnan an nasa pagultanan nyato sagkod lamang.”

²⁴ Kaya nagtago si David sa kaomahan; pag-abot kan Pyesta kan Gimata nin Bulan, nag-abot si Hadeng Saul tanganing magkakan

²⁵ asin nagtukaw siya sa dati niyang tukawan sa may lanob. Tuminukaw sa kataed niya si Abner, asin nagtukaw sa atubang niya si Jonatan. Mayong nakatukaw sa lugar ni David,

²⁶ alagad dai naggirong si Saul kan aldaw na idto huli ta nagsaboot siya, “Igwang nangyari saiya, asin bako siyang malinig.”

²⁷ Sunod na aldaw pakatapos kan Pyesta kan Gimata nin Bulan, bakante man giraray an tukawan ni David, kaya hinapot ni Saul si Jonatan, “Tadaw ta magpoon kasuhapon dai nagdolok sa pagkakan si David?”

²⁸ Nagsimbag si Jonatan, “Nakimaherak siyang tugotan kong makaduman sa Betlehem.

²⁹ Nagsabi siyang ‘Tugote akong magduman huli ta madolot nin sakripisyo sa banwa an sakong pamilya, kaya pinagbotan ako kan sakong tugang na lalaki na magduman. Kaya kun katood taka, tutugotan mo akong makaduman asin mahiling an sakong mga kadugo.’ Iyan an dahelan kun tano ta mayo siya digdi sa saimong lamesa.”

³⁰ Naanggot nin marahay si Saul ki Jonatan asin sinabihan, “Aki nin maraot na babae! Aram kong pinili mo an aki ni Jesse sa kasosopgan mo asin nin saimong ina!

³¹ Dai mo aram na mantang buhay si David, dai ka nanggad magigin hade sa dagang ini? Kaya lakaw asin darahon mo siya sako, huli ta kaipuhan magadan siya!”

³² “Tano ta kaipuhan siyang magadan?” an simbag ni Jonatan. “Ano an ginibo niya?”

³³ Alagad ginarod ni Saul si Jonatan tanganing gadanon; kaya naaraman ni Jonatan na talagang gagadanon si David kan saiyang ama.

³⁴ Naghale si Jonatan sa dakulang kaanggotan; dai siya nagkakan nin ano man kan ikaduwang aldaw kan Pyesta kan Gimata nin Bulan; namondo siya nin marahay para ki David, huli ta sinopog siya kan saiyang ama.

³⁵ Sunod na aldaw, nagduman si Jonatan sa kaomahan kaiba an sarong hoben, siring sa napagkaoyonan ninda ni David.

³⁶ Sinabihan niya an hoben, “Magdalagan ka asin hanapon mo an mga bosog na sakong ipapana.” Nagdalagan an hoben, asin nagpana si Jonatan nin sarong bosog lampas saiya.

³⁷ Pag-abot kan hoben sa lugar na hinugpaan kan bosog, kinurahawan siya ni Jonatan. “Harayo saimo an bosog!

³⁸ Maghidali ka! Dai ka mag-ontok diyan!” Kinua kan hoben an bosog dangan nagbalik sa saiyang kagurangnan;

³⁹ dai niya naaaraman an kahulogan kan gabos na nangyari. Si Jonatan sana asin si David an nakakaaram.

⁴⁰ Itinao ni Jonatan sa hoben an saiyang mga armas dangan ipinabalik sa banwa.

⁴¹ Pakahale kan hoben, nagluwas si David hale sa likodan kan tambak nin mga gapo dangan makatolong beses siyang nagdapa sa daga. Parehong naghihibi na naghadokan si David saka si Jonatan; orog an kamondoan ni David ki sa ki Jonatan.

⁴² Dangan sinabihan ni Jonatan si David, “Lakaw sa katoninongan, nin huli ta nanuga an lambang saro sato sa ngaran nin Kagurangnan, na an satong mga panuga ootobon ta asin nin satong mga kapagarakian sagkod lamang.” Dangan naghale si David asin nagbalik si Jonatan sa banwa.