1 Samuel 2 - Marahay na Bareta Biblia

An Pamibi ni Hanna

¹ Namibi si Hanna: “An sakong puso nag-oogma sa Kagurangnan; maogma ako huli kan saiyang ginibohan! Mga kaiwal sakong ngingisihan; maogma akong marahay huli kan saiyang tabang!

² “Mayong arog kabanal ki sa Kagurangnan; mayo nin siisay man, kundi siya sana, mayong parasurog na arog sa satong Dios.

³ Ontoka an saindong kapaabaw-abawan; ontoka an saindong kahambogan. Huli ta an Kagurangnan sarong Dios na nakakaaram, gabos na gibo nin tawo saiyang hinuhukoman.

⁴ An pana kan mga mapangyari nagkakabarari, alagad nagkokosog an mga maluya.

⁵ An mga tawong dating barasog nagpapatandan ngunyan, tanganing makakua sana nin pagkakan, alagad an mga dating nagugutom, basog na ngunyan. An babaeng baog nangaki nin pito, alagad an ina nin dakul dai natadaan maski saro.

⁶ An Kagurangnan an minagadan asin minabuhay liwat; isinosobol niya an mga tawo sa Sheol asin binubuhay giraray.

⁷ An iba saiyang pinapangagin dukha, an iba mayaman; an iba saiyang ibinababa, an iba ilinalangkaw.

⁸ Binubuhat niya an mga dukha hale sa alpog asin an mga nangangaipo hale sa tambak nin abo. Pinapatukaw niya sinda sa kaibahan nin mga prinsipe, asin ibinubugtak sa mga lugar na iginagalang. Huli ta an mga harigi kan kinaban sadiri nin Kagurangnan; asin sa ibabaw kaiyan itinugdok niya an kinaban.

⁹ “Binabantayan niya an mga maimbod saiya, alagad an mga maraot nawawara sa kadikloman; huli ta bakong sa sadiring kosog nanggagana an sarong linalang.

¹⁰ Magkakaturunaw an mga kaiwal nin Kagurangnan; laban sainda, madaguldol siya sa kalangitan. An Kagurangnan an mahukom sa bilog na kinaban; tatawan niya nin kosog an saiyang hade, ilalangkaw niya an kapangyarihan kan saiyang pinili.”

¹¹ Dangan nagpuli si Elkana sa saiyang harong sa Rama, alagad nawalat an aking si Samuel sa Shilo asin naglingkod sa Kagurangnan sa pamamahala kan pading si Eli.

An mga Aking Lalaki ni Eli

¹² An mga aking lalaki ni Eli mga mayong ugale; dai ninda iginagalang an Kagurangnan

¹³ o an mga pagsusundon manongod sa pwedeng hagadon kan mga padi sa tawo. Kun igwang minadolot nin atang, minadolok an sorogoon kan mga pading ini na may darang tinidor na tolo an tarom asin mantang linuluto an karne,

¹⁴ itinutusok kan sorogoon an tinidor sa laog kan kawa o kaldero dangan kinukua para sa mga padi an ano man na matusok kan tinidor. Siring kaini an saindang ginibo sa gabos na Israelita na nagduman sa Shilo.

¹⁵ Laen pa kaini, maski dai pa natututong an taba, minadolok na an sorogoon kan padi asin sinasabihan an nagdolot, “Tawe ako nin karne na dadarangon kan padi; huli ta dai niya aakoon an linabonan na karne hale saimo, kundi an hilaw.”

¹⁶ Kun an kagdolot magsimbag, “Gibohon ta an tama; tutongon ta ngona an taba dangan ka na kumua kan boot mo,” masabi an sorogoon kan padi “Dai! Itao mo na ngunyan an karne! Kun dai, kukuahon ko iyan sa paagi nin kosog!”

¹⁷ Siring kadakula an kasalan kan mga aking lalaki ni Eli sa atubang nin Kagurangnan, huli ta dai ninda iginalang an mga dolot para sa Kagurangnan.

Si Samuel sa Shilo

¹⁸ Padagos man na naglilingkod kaidto si Samuel sa Kagurangnan, sulot an sarong linong efod.

¹⁹ Taon-taon, iginigibo siya kan saiyang ina nin sarong sadit na abito na dinadara saiya kun nag-iiba si Hanna sa saiyang agom tanganing magdolot kan taon-taon na atang.

²⁰ Dangan benebendisyonan ni Eli si Elkana saka an saiyang agom asin sinasabihan, “Huli sa babaeng ini, tawan ka pa logod nin Kagurangnan nin ibang mga aki na magigin kasalihid kan aking linaen nindo para saiya.” Pakatapos kaini, minapuli na sinda.

²¹ Benendisyonan mananggad nin Kagurangnan si Hanna; nangaki pa siya nin tolong lalaki asin duwang babae. Nagdakula si Samuel na naglilingkod sa Kagurangnan.

Si Eli asin an Saiyang mga Aking Lalaki

²² Gurang nang marahay si Eli. Naisihan niya an gabos na ginigibo sa mga Israelita kan saiyang mga aking lalaki. Nabaretaan man niya na dinodorogan pa ninda an mga babaeng naglilingkod sa pintoan kan Tabernakulo nin Kagurangnan.

²³ Kaya sinabihan niya sinda, “Tadaw ta ginigibo nindo an mga bagay na ini? An gabos nagsusumbong sako manongod kan mga karatan na saindong ginigibo.

²⁴ Ontok kamo kaiyan! Maraot na bareta iyan na pinag-oorolayan kan banwaan nin Kagurangnan!

²⁵ Kun magkasala an sarong tawo sa saiyang kapwa, pwede pa siyang surogon nin Dios; alagad siisay an makakasurog sa sarong tawong nagkasala sa Kagurangnan?” Alagad dai ninda dinangog an saindang ama; huli ta kabotan nin Kagurangnan na gadanon sinda.

²⁶ Padagos na nagdakula si Samuel na nawiwilihan nin Kagurangnan asin kan mga tawo.

An Propesiya laban sa Pamilya ni Eli

²⁷ Nagduman ki Eli an sarong propeta na may darang mensahe hale sa Kagurangnan asin nagsabi, “Kan an saimong ginikanan na si Aaron asin an saiyang pamilya mga oripon pa kan hade nin Egipto, nagpamidbid ako ki Aaron.

²⁸ Pinili ko an saiyang pamilya hale sa gabos na tribu nin Israel tanganing magin sakong mga padi, maglingkod sa altar, magtutong nin insenso, asin magsulot kan efod sa pag-aram kan sakong kabotan. Itinao ko sainda an deretso na magkua nin sarong kabtang kan mga atang na tinututong sa altar.

²⁹ Kun siring, tadaw ta hinihiling mo na may kapasloan an mga atang asin dolot na hinahagad ko sa sakong banwaan? Tadaw ta pinapaorog mo an saimong mga aki ki sa sako, huli sa pagtugot sainda na magpataba kan saindang sadiri sa pinakamarahay na mga parte kan gabos na dolot kan sakong banwaan?

³⁰ Ako, an Kagurangnan Dios nin Israel, nanuga kaidto na an saimong pamilya asin an saimong kamaganakan iyo an maglilingkod sako bilang padi sagkod lamang. Alagad dai na pwede iyan! Oomawon ko an mga tawong nag-oomaw sako, asin ikakaongis ko an mga naoongis sako.

³¹ Uya, maabot an aldaw na gagadanon ko an gabos na lalaking hoben sa saimong pamilya asin kamaganakan, tanganing mayo nang magigin gurang maski saro sa saimong pamilya.

³² Dangan sa kasakitan, may pagkaara mong hihilingon an gabos na bendisyon na itatao ko sa ibang mga tawo nin Israel, alagad sagkod lamang mayong magigin gurang maski saro sa saimong pamilya.

³³ Igwa akong itatadang saro sa saimong kapagarakian na maglilingkod sako bilang padi, alagad mabubuta siya asin mawawaraan nin paglaom: an iba mo pang kapagarakian magagadan sa mangirhat na paagi.

³⁴ Sa oras na magadan sa parehong aldaw an mga aki mong lalaki na si Hofni saka si Finehas, iyan an tanda para saimo na magkakatotoo an gabos na itinaram ko.

³⁵ Mapili ako nin sarong padi na magigin maimbod sako asin magibo kan gabos na ipagboboot ko. Tatawan ko siya nin dakul na aki asin makoapo, na danay na maglilingkod sa atubangan kan pinili kong hade.

³⁶ An siisay man sa saimong kapagarakian na dai magadan, madolok sa pading iyan asin mahagad nin kwarta saka pagkakan, patin makikimaherak na tugotan na makatabang sa mga padi, tanganing igwa sanang makakan.”