1 Samuel 19 - Marahay na Bareta Biblia

Boot gadanon ni Saul si David

¹ Sinabihan ni Saul an aki niyang lalaki na si Jonatan asin an gabos niyang opisyal na gadanon si David. Alagad nawilihan ni Jonatan si David,

² kaya sinabihan niya ini, “Boot kang gadanon kan sakong ama, kaya maglikay ka sa aga; magduman ka sa sarong tagong lugar.

³ Maduman ako asin matindog sa kataed kan sakong ama duman sa oma na pagtatagoan mo dangan kakaolayon ko siya manongod saimo. Kun may maaraman ako, isasabi ko saimo.”

⁴ Kaya inomaw ni Jonatan si David ki Saul asin nagsabi, “Dai ka man logod magkasala sa sorogoon mong si David. Mayo siyang naginibong maraot saimo; an totoo, an gabos na ginibo niya anas nakatabang saimo.

⁵ Ibinugtak niya sa pag-alaman an saiyang buhay kan gadanon niya si Goliat, asin sarong dakulang panggana an ginibo nin Kagurangnan para sa Israel. Kan mahiling mo iyan, naogma ka. Tadaw ta ngunyan boot mong magkasala laban sa sarong tawong mayo nin sala arog ki David, sa paagi nin paggadan saiya na mayo nin ano man na dahelan?”

⁶ Nag-oyon si Saul sa isinabi ni Jonatan asin nanumpa sa ngaran nin Kagurangnan na dai niya gagadanon si David.

⁷ Kaya inapod ni Jonatan si David asin sinabihan kan gabos na nangyari; dangan dinara niya ki Saul si David asin nagpadagos si David sa paglingkod sa hade siring kan dati.

⁸ Nagkaigwa giraray nin gera laban sa mga Filisteo. Sinalakay ni David an mga Filisteo asin dinaog; dakul an saiyang nagadan, kaya nagdulag an iba.

⁹ Sarong aldaw, linaog si Saul nin sarong marompot na espiritu na hale sa Kagurangnan mantang nagtutukaw siya sa laog kan saiyang harong na kapot an garod; idtoon man duman si David na nagtutugtog kan saiyang arpa.

¹⁰ Hiningowa ni Saul na itadok si David sa lanob sa paagi kan saiyang garod, alagad nakalikay si David asin tuminusok an garod sa lanob. Nagdalagan si David asin nagdulag.

¹¹ Kan banggi man sanang idto, pinabantayan ni Saul sa nagkapirang lalaki an harong ni David tanganing magadan niya pagkaaga. Alagad, pinatanidan si David ni Mical na saiyang agom, “Kun dai ka magdulag ngunyan na banggi, magagadan ka sa aga.”

¹² Kaya pinaagi ni Mical si David sa bintana; nagdalagan si David asin nagdulag.

¹³ Pakatapos, kinua ni Mical an sarong ladawan, pinahigda sa katre, pinaulon sa sarong ulonan na gibo sa balukag nin mga kanding dangan tinamongan.

¹⁴ Kan magduman an mga tawohan ni Saul tanganing kuahon si David, sinabihan sinda ni Mical na may helang si David.

¹⁵ Alagad pinabalik sinda ni Saul tanganing sinda mismo an humiling ki David. Pinagbotan sinda kan hade, “Daraha nindo siya sako sa saiyang nahihigdaan tanganing gadanon ko.”

¹⁶ Nagralaog sa harong an mga sinugo asin nakua ninda an ladawan na nakahigda sa katre asin may ulonan na gibo sa balukag nin mga kanding.

¹⁷ Hinapot ni Saul si Mical, “Tadaw ta dinaya mo ako sa paaging ini, asin pinabayaan na makadulag an sakong kaiwal?” Nagsimbag si Mical, “Nagsabi siya na gagadanon niya ako kun dai ko siya tabangan na makadulag.”

¹⁸ Nakadulag si David asin nagduman ki Samuel sa Rama. Inistorya niya ki Samuel an gabos na ginibo saiya ni Saul. Dangan nagduman si David asin si Samuel sa Naiot asin duman nag-erok.

¹⁹ Naosipan si Saul na idtoon si David sa Naiot sa Rama,

²⁰ kaya nagsugo siya nin nagkapirang lalaki tanganing dakopon si David. Kan mahiling kan mga sinugo an grupo nin mga propeta na nagsasarayaw asin nagkukurahaw sa kaibahan ni Samuel, nag-abot sainda an espiritu nin Dios, asin nagpoon man sindang magsarayaw saka magkurahaw.

²¹ Kan mabaretaan ini ni Saul, nagsugo siya nin ibang mga lalaki, alagad nagpoon man sindang magsayaw saka magkurahaw. Sa ikatolong beses nagsugo nin mga lalaki si Saul, alagad pareho man an ginibo ninda.

²² Dangan si Saul na mismo an nagduman sa Rama. Pag-abot niya sa dakulang bubon sa Secu, naghapot siya kun saen si Samuel asin si David; sinabihan siyang idtoon sinda sa Naiot.

²³ Kan nagpapasiring na si Saul duman, nag-abot man saiya an espiritu nin Dios asin nagsayaw saka nagkurahaw siya sa dalan sagkod sa Naiot.

²⁴ Hinuba niya an saiyang gubing asin nagsayaw saka nagkurahaw sa atubangan ni Samuel, dangan naghigda na huba sa bilog na aldaw asin banggi. (Iyo ini an kapinonan kan kasabihan, “Ano si Saul, saro na man na propeta?”)