1 Samuel 16 - Marahay na Bareta Biblia

Linahidan si David bilang Hade

¹ Tinaraman nin Kagurangnan si Samuel, “Sagkod nuarin ka magmomondo para ki Saul? Isinikwal ko na siya bilang hade nin Israel. Panoa nin lana an saimong laogan asin magduman ka sa Betlehem, sa sarong lalaki na an ngaran Jesse, huli ta pinili kong magin hade an saro kan saiyang mga aking lalaki.”

² “Paano ko magigibo iyan?” an hapot ni Samuel. “Kun mabaretaan iyan ni Saul, gagadanon niya ako!” Nagsimbag an Kagurangnan, “Magdara ka nin ogbon na baka asin sabihon mong yaon ka duman tanganing magdolot nin sakripisyo sa Kagurangnan.

³ Alokon mo si Jesse sa pagsakripisyo, asin tataraman taka kan gigibohon mo. Lalahidan mo bilang hade an lalaking ngangaranan ko.”

⁴ Kinuyog ni Samuel an ipinagboot saiya nin Kagurangnan; nagduman siya sa Betlehem. Nagtatarakig na nagsabat saiya an kamagurangan kan syudad, asin nagharapot, “Nagdigdi ka daw sa katoninongan?”

⁵ “Iyo,” an simbag ni Samuel. “Nagdigdi ako tanganing magdolot nin sakripisyo sa Kagurangnan. Maglinig kamo kan saindong sadiri asin mag-iba sako.” Sinabihan man niya si Jesse asin an mga aking lalaki kaini na maglinig kan saindang sadiri saka inalok niya sinda sa pagsakripisyo.

⁶ Pag-abot ninda, nahiling ni Samuel si Eliab na aking lalaki ni Jesse asin nagsaboot siya, “Mayong duda na an lalaking ini na nagtitindog sa atubangan nin Kagurangnan iyo na an saiyang pinili.”

⁷ Alagad tinaraman siya nin Kagurangnan, “Dai ka maghiling sa saiyang pagkanigwapo o pagkanihalangkaw, huli ta hinaboan ko siya. Dai ako naghuhukom siring sa paghukom nin tawo. Hinihiling nin tawo an panluwas na porma, alagad an hinihiling ko iyo an puso.”

⁸ Dangan inapod ni Jesse an aki niyang si Abinadab asin dinara niya ki Samuel. Alagad nagsabi si Samuel, “Bako man siya an napili nin Kagurangnan.”

⁹ Sunod na dinara ni Jesse si Sama. Alagad nagsabi si Samuel, “Bako man siya an napili nin Kagurangnan.”

¹⁰ Saro-sarong dinara ni Jesse ki Samuel an pito niyang aking lalaki alagad sinabihan ni Samuel si Jesse, “Bako sinda an napili nin Kagurangnan.”

¹¹ Dangan naghapot si Samuel ki Jesse, “Iyo sana ini an mga aki mo?” Nagsimbag si Jesse, “Igwa pa nin saro; an ngohod, alagad nag-aataman siya kan mga karnero.” “Ipaapod mo siya,” an sabi ni Samuel. “Dai kita madolot kan sakripisyo sagkod na dai siya mag-abot.”

¹² Kaya ipinaapod siya ni Jesse. Gwapo siyang lalaki, hoben, mabaskog asin magayon an mga mata. Tinaraman nin Kagurangnan si Samuel, “Tindog, lahidan mo siya, huli ta iyo na siya.”

¹³ Kinua ni Samuel an lana nin oliba asin linahidan si David sa atubangan kan saiyang mga tugang na lalaki. Nag-abot tolos ki David an espiritu nin Kagurangnan asin nagdanay saiya magpoon kan aldaw na idto. Dangan nagbalik si Samuel sa Rama.

Naglingkod si David ki Saul

¹⁴ Binayaan si Saul kan espiritu nin Kagurangnan asin pinasakitan siya nin sarong marompot na espiritu na ipinadara saiya nin Kagurangnan.

¹⁵ Sinabihan siya kan saiyang mga sorogoon, “Pinapasakitan ka kan marompot na espiritu na ipinadara nin Dios.

¹⁶ Tugote kami na maghanap nin sarong lalaking tataong magtugtog sa arpa. Sa oras na mag-abot saimo an marompot na espiritu, matugtog an lalaki sa saiyang arpa, asin mararahay ka.”

¹⁷ Kaya pinagbotan sinda ni Saul, “Ihanap nindo ako nin lalaking marahay magtugtog, dangan darahon nindo siya sako.”

¹⁸ Nagsabi an saro kan saiyang mga katabang, “Nahiling kong marahay magtugtog an sarong aking lalaki ni Jesse na taga Betlehem. Saro man siyang maisog asin gwapong lalaki, sarong marahay na soldados, asin marahay magtaram. Yaon saiya an Kagurangnan.”

¹⁹ Kaya nagpadara si Saul nin mga sugo ki Jesse tanganing sabihan, “Padigdihon mo an aki mong si David na paraataman kan mga karnero.”

²⁰ Pinaduman ni Jesse ki Saul si David; pinapagdara niya ini nin sarong asno na may kargang tinapay, sarong laogan na anit na pano nin arak asin sarong ogbon na kanding.

²¹ Nag-abot si David ki Saul asin nagpoon maglingkod sa hade. Nawilihan siya nin marahay ni Saul kaya siya an nagin paradara kan armas niya.

²² Dangan nagpadara nin mensahe si Saul ki Jesse: “Nawiwilihan ko si David. Tugote siyang padagos na maglingkod sako.”

²³ Poon kaidto, kun minaabot ki Saul an marompot na espiritu na ipinadara nin Dios, kinukua ni David an saiyang arpa asin minatugtog siya. Minahale an espiritu, asin nararahay si Saul saka nahihingaloan.