1 Samuel 13 - Marahay na Bareta Biblia

An Gera Laban sa mga Filisteo

¹ Nagpoon paghade si Saul sa edad na…asin pinaghadean niya an Israel sa laog nin duwang taon.

² Nagpili si Saul nin tolong ribong kalalakihan sa Israel; kaiba niya sa Micmas an duwang ribo, asin an sangribo pinaiba niya sa aki niyang si Jonatan duman sa Gibea, sa teritoryo kan tribu ni Benjamin. An ibang mga lalaki pinapuruli ni Saul sa saindang mga harong.

³ Ginadan ni Jonatan an pamayo kan mga Filisteo sa Geba, asin nabaretaan ini kan gabos na Filisteo. Dangan nagpadara si Saul nin mga sugo sa bilog na daga tanganing apodon an mga Hebreyo sa pakigera huli sa pagpatanog kan trompeta sa bilog na daga.

⁴ Naaraman kan gabos na Israelita na ginadan ni Saul an pamayo kan mga Filisteo asin naanggot an mga ini sainda. Kaya nagduruman an mga tawo sa Gilgal asin nakisumaro ki Saul.

⁵ Nagtiripon an mga Filisteo tanganing labanan an mga Israelita; igwa sindang treynta mil na karwaheng panggera, anom na ribo na parakabayo, asin mga soldados na siring kadakul kan mga baybay sa tampi kan dagat. Nagduruman sinda sa Micmas, sa sirangan kan Bet-aven, asin duman nagkampo.

⁶ Dangan sarong makosog na salakay an saindang ginibo laban sa mga Israelita. Naparaot an kamugtakan kan mga Israelita sa ralaban na idto, kaya an iba sainda nagtarago sa mga lungib asin mga kalot, sa kagapoan, sa mga lulubngan asin mga bubon;

⁷ an iba nagbaralyo sa Salog nin Jordan pasiring sa teritoryo nin Gad asin nin Gilead. Idtoon pa si Saul sa Gilgal, asin an mga tawong kairiba niya pinagtatarakigan sa takot.

⁸ Naghalat siya ki Samuel sa laog nin pitong aldaw, siring sa sinabi ni Samuel, alagad dai siya nag-abot. Saro-sarong nagbaya ki Saul an mga tawo,

⁹ kaya nagsabi siya, “Daraha digdi sako an tututongon na atang asin an atang para sa katoninongan.” Dangan idinolot niya an tinutong na atang.

¹⁰ Pakatapos niyang magdolot, nag-abot si Samuel. Sinabat siya ni Saul asin kinomusta,

¹¹ alagad naghapot si Samuel, “Ano an ginibo mo?” Nagsimbag si Saul, “Kan mahiling kong binabayaan ako kan mga tawo asin dai ka pa nag-abot sa talaan na panahon na itinao mo, dangan nagtiripon an mga Filisteo sa Micmas,

¹² nagsaboot akong, ‘Sasalakayon ako kan mga Filisteo digdi sa Gilgal asin dai ko pa nakukua an pagkaherak nin Kagurangnan.’ Kaya napiritan akong magdolot nin tinutong na atang.”

¹³ Sinimbag ni Samuel si Saul, “Sala an ginibo mo; dai mo kinuyog an togon na itinao saimo nin Kagurangnan na saimong Dios. Kun nagkuyog ka, kutana tinugotan ka asin an saimong kapagarakian na maghade sa Israel sagkod lamang.

¹⁴ Alagad dai na madanay an saimong kahadean; sinuhay mo an Kagurangnan, kaya mahanap siya nin lalaking naooyonan niya na gigibohon niyang hade kan saiyang banwaan.”

¹⁵ Naghale si Samuel sa Gilgal asin nagduman sinda sa Gibea sa teritoryo ni Benjamin. Binilang ni Saul an gabos niyang soldados; haros seis syentos gabos.

¹⁶ Nagkampo sa Geba sa teritoryo ni Benjamin si Saul asin an aki niyang lalaki na si Jonatan, kaiba an saindang mga tawohan; mantang an mga Filisteo nagkampo duman sa Micmas.

¹⁷ Nagruluwas sa saindang kampo an mga Filisteo sa tolong grupo tanganing magsalakay: an sarong grupo nagpasiring sa Ofra sa teritoryo nin Sual;

¹⁸ an saro nagpasiring sa Bet-horon, asin an saro nagpasiring sa pagdolonan na minadungaw sa kapantayan nin Zeboiim asin sa kalangtadan.

¹⁹ Mayo maski sarong panday sa Israel, huli ta habo an mga Filisteo na maggiribo nin mga espada asin garod an mga Hebreyo. (

²⁰ Kaipuhan magduman pa an mga Israelita sa mga Filisteo tanganing magpatais kan saindang mga arado, asadol, patok, saka asyab;

²¹ an bayad sa pagpatais kan patok asin kan pang-alaw nin hayop sarong sentabo; duwang sentabo sa pagpatais kan arado saka asadol.)

²² Kaya kan aldaw na magkagera, mayo nin saro man sa mga soldados na Israelita an igwang espada o garod; si Saul asin si Jonatan sana an igwa.

²³ Nagpadara nin sarong grupo nin mga soldados an mga Filisteo sa dalan nin Micmas tanganing bantayan idto.