1 Mga Hade 9 - Marahay na Bareta Biblia

An Dios Nagpahiling Giraray ki Solomon

¹ Kan ikatugdok na ni Solomon an Templo, an palasyo, asin an gabos na binoot niyang ipatugdok,

² nagpahiling giraray saiya an Kagurangnan, siring kan pagpahiling niya saiya duman sa Gibeon.

³ Nagtaram saiya an Kagurangnan, “Nadangog ko an saimong pamibi asin pakimaherak na ginibo mo sa sakong atubang. Kinokonsagra ko an Templong ini na itinugdok mo, bilang lugar na pagsasambahan sako sagkod lamang; babantayan asin aatamanon ko an Templo sa gabos na panahon.

⁴ Kun paglilingkodan mo ako sa kaimbodan saka sa katanosan, siring kan ginibo kan saimong ama, dangan kun kukuyogon mo an sakong mga togon sagkod mga pagboot,

⁵ papatindogon ko sagkod pa man sa Israel an saimong kahadean, siring kan sakong panuga sa saimong ama kan taraman ko siyang, ‘Dai ka mahahalean nin kapagarakian na matukaw sa trono nin Israel.’

⁶ Alagad kun ika o an saimong mga aki magtalikod sako asin dai magkuyog kan sakong mga togon saka mga pagboot; kun kamo magsunod, maglingkod, asin magsamba sa ibang mga dios,

⁷ hahaleon ko an banwaan nin Israel sa dagang itinao ko sainda. Pababayaan ko man an Templong ini na kinonsagra ko para sa sakong ngaran. An Israel magigin ngingisihan asin pagtutuyatuyaon kan gabos na banwaan.

⁸ An Templo na ini magigin sarong tambak nin mga raot, asin an lambang mag-agi digdi matitikbahan saka mangalas. Mahapot sinda, ‘Tano ta siring an ginibo nin Kagurangnan sa dagang ini asin sa Templong ini?’

⁹ Masimbag an mga tawo, ‘Huli ta binayaan ninda an Kagurangnan na saindang Dios na nagluwas kan saindang mga ginikanan sa Egipto. Nagsunod sinda, naglingkod, asin nagsamba sa mga dios-dios, kaya dinara sainda nin Kagurangnan an karatan na ini.’”

An Pinagkaoyonan ni Solomon saka ni Hiram

¹⁰ Inabot nin beynteng taon si Solomon sa pagpatugdok kan Templo asin kan saiyang palasyo.

¹¹ Si Hiram na hade nin Tiro an nagpadara kan mga kahoy na sedro saka aguho, asin kan gabos na bulawan na kaipuhan ni Solomon para sa trabaho. Kan matapos an mga ini, tinawan ni Hadeng Solomon si Hiram nin beynteng banwa sa rehiyon nin Galilea.

¹² Alagad kan magduman si Hiram tanganing hilingon an mga banwa, dai niya iyan nagustohan.

¹³ Nagsabi siya, “Tugang ko, tano ta siring kaini an mga banwang itinao mo sa sako?” Huli kaini an lugar inapod Cabul.

¹⁴ Sobra sa apat na ribong kilo nin bulawan an ipinadara ni Hiram ki Solomon.

An Iba pang mga Ginibo ni Solomon

¹⁵ Ipinagboot ni Hadeng Solomon an pirit na pagpatrabaho tanganing ikatugdok an Templo asin an palasyo, tanganing patambakan nin daga an sirangan na parte kan syudad, saka ikatugdok an kudal kan syudad. Ipinagboot man niya an pirit na pagpatrabaho tanganing mapakarahay an mga syudad nin Hazor, Megido, sagkod an Gezer. (

¹⁶ An Gezer sinalakay kaidto kan hade nin Egipto, sinakop, ginadan an mga tawo asin sinulo an syudad. Dangan itinao kan hade nin Egipto an Gezer bilang regalo sa saiyang aking babae kan ikasal ini ki Solomon.

¹⁷ Pinakarahay ni Solomon an Gezer.) Pinakarahay man niya an Ibabang Bet-horon,

¹⁸ an Baalat, an Tamar sa kalangtadan nin Juda,

¹⁹ an mga syudad na sarayan kan saiyang mga kagamitan, an mga syudad para sa saiyang mga kabayo saka mga karwahe, sagkod an gabos na binoot niyang itugdok sa Jerusalem, sa Lebanon, patin sa gabos na dagang sakop niya.

^20-21 Para sa saiyang pirit na pagpatrabaho, ginamit ni Solomon an mga tawong nagkatarada sa Canaan, na dai ginaradan kan mga Israelita kan sakopon ninda an saindang daga. An mga tawong ini iyo an mga Amoreo, Heteo, Perezeo, Hebeo, asin Jebuseo, na an kapagarakian padagos sa pagigin mga oripon sagkod ngunyan.

²² An mga Israelita dai inoripon ni Solomon; naglingkod sinda saiya bilang mga soldados, mga opisyal, mga pamayo kan mga hukbo, mga kapitan nin mga karwahe, asin mga soldados na nakakabayo.

²³ An bilang kan mga opisyal na namahala sa mga tawong pirit na pinapagtrabaho sa manlaen-laen na ipinatugdok ni Solomon nag-abot sa kinyentos singkwenta katawo.

²⁴ Pinatambakan ni Solomon nin daga an sirangan na parte kan syudad, pakatapos na an saiyang agom, an aking babae kan Hade nin Egipto, maghale sa Syudad ni David tanganing mag-erok sa palasyo na ipinatugdok para saiya ni Solomon.

²⁵ Tolong beses sa taon na nagdolot si Solomon nin mga tinutong na atang saka mga dolot para sa katoninongan sa altar na ginibo niya para sa Kagurangnan. Nagtutong man siya nin insenso para sa Kagurangnan. Kaya tinapos niya an pagpatugdok kan Templo.

²⁶ Nagpagibo man si Solomon nin dakul na barko duman sa Ezion-geber, na harani sa Elat na nasa baybayon kan Dagat na Pula, sa daga nin Edom.

²⁷ Nagpadara si Hadeng Hiram nin mga tawong tood sa dagat hale sa saiyang mga barko tanganing maglingkod kaiba kan mga tawohan ni Solomon.

²⁸ Nagduruman sinda sa daga nin Ofir, dangan nagbaralik na igwa nin darang sobra sa katorse mil kilos na bulawan; dinara ninda ini ki Solomon.