1 Mga Hade 5 - Marahay na Bareta Biblia

Nag-andam si Solomon sa Pagpatugdok kan Templo

¹ Kan madangog ni Hadeng Hiram nin Tiro na linahidan si Solomon bilang hade na kasalihid kan saiyang ama, nagpadara siya nin mga sugo ki Solomon, huli ta katood siya ni David.

² Nagpadara nin mensahe si Solomon ki Hiram,

³ “Aram mong huli kan danay na pakigera kan sakong ama laban sa saiyang mga kaiwal sa palibot niya, dai siya nakapatugdok nin templo para sa Kagurangnan na saiyang Dios sagkod na paganahon siya nin Kagurangnan laban sa gabos niyang kaiwal.

⁴ Alagad ngunyan tinawan ako nin Kagurangnan na sakong Dios nin katoninongan sa gabos kong pagdolonan. Mayo na ako nin kaiwal asin mayo nang paghandal na tibaad salakayon.

⁵ An Kagurangnan nanuga sa ama kong si David, ‘An saimong aki na gigibohon kong hade bilang kasalihid mo iyo an mapatugdok nin templo para sako.’ Kaya nagdesider akong magpatindog nin templo para sa ngaran nin Kagurangnan na sakong Dios.

⁶ Kaya magpadara ka sa Lebanon nin mga lalaki tanganing magpulak nin mga sedro para sako. Babayadan ko an saimong mga tawohan kan kantidad na sabihon mo. Matabang sana sainda an sakong mga tawohan huli ta aram mong mayo kaming mga marahay na parapulak nin kahoy arog kan mga taga Sidon.”

⁷ Naogma nin marahay si Hiram kan makaabot saiya an mensahe ni Solomon, kaya nagsabi siya, “Omawon an Kagurangnan ngunyan na aldaw huli ta tinawan niya si David nin sarong madonong na aki tanganing magin hade kan dakulang nasyon na idto!”

⁸ Nagpadara siya kan simbag na ini ki Solomon: “Nakaabot sakuya an saimong mensahe. Andam akong itao an saimong kahagadan manongod sa mga kahoy na sedro saka sipres.

⁹ Dadarahon kan sakong mga tawohan an mga troso hale sa Lebanon sagkod sa dagat. An mga trosong ini gigibohon kong mga balsa tanganing mag-anod sa dagat sagkod sa lugar na saimong mapili. Pag-abot duman, huhubadon kan sakong mga tawohan an gakot kan mga troso dangan bahala na an saimong mga tawohan. An hagad ko sana saimo iyo na magpadara ka nin pagkakan para sa sakong mga tawohan.”

¹⁰ Kaya pinadarahan ni Hiram si Solomon kan gabos na kahoy na sedro asin sipres na kaipuhan niya.

¹¹ Taon-taon pinapadarahan man ni Solomon si Hiram nin dos mil metriko toneladang trigo asin kwatro syentos mil na litro nin purong lana nin oliba para sa saiyang mga tawohan.

¹² Inotob nin Kagurangnan an saiyang panuga asin tinawan niya nin kadonongan si Solomon. Matoninong an pag-ibahan ni Hiram saka ni Solomon, asin naggibo sindang duwa nin tipan.

¹³ Nagpaluwas si Hadeng Solomon nin sarong pagboot dapit sa pirit na pagpatrabaho sa bilog na Israel; an bilang kan gabos na matrabaho uminabot sa treynta mil katawo.

¹⁴ Ipinadara niya sinda sa Lebanon. Binanga niya sinda sa tolong grupo, dyes mil katawo sa lambang grupo. Sarong bulan sinda sa Lebanon asin duwang bulan sa saindang mga harong. Si Adoniram an namahala kan mga tawong pirit na pinapagtrabaho.

¹⁵ Igwa man si Solomon nin otsenta mil katawong paratabas nin gapo sa kabubuldan, saka setenta mil katawong parapasan kan mga gapo.

¹⁶ An mga kapatas na ibinugtak niya tanganing mamahala kan mga trabaho uminabot sa bilang na tres mil tres syentos.

¹⁷ Sa pagboot kan hade, nagtarabas sinda nin mga darakula asin mararahay na gapo para sa pundasyon kan Templo.

¹⁸ An mga tawohan ni Solomon saka ni Hiram, asin an kalalakihan sa syudad nin Gebal iyo an mga nag-andam kan mga gapo asin mga kahoy na gagamiton sa pagtugdok kan Templo.