1 Mga Hade 3 - Marahay na Bareta Biblia

Naghagad si Solomon nin Kadonongan

¹ Nakipag-alyansa si Solomon sa hade nin Egipto kan agomon niya an aki kaini. Dinara niya an prinsesa sa syudad ni David tanganing duman mag-erok sagkod na matapos an pagpatugdok niya kan palasyo, kan Templo, asin kan kudal sa palibot nin Jerusalem.

² Mayo pa nin itinugdok na templo para sa Kagurangnan, kaya an mga tawo nagdodolot nin mga sakripisyo sa manlaen-laen na altar.

³ Namotan ni Solomon an Kagurangnan asin nagkuyog siya sa mga togon kan saiyang ama na si David, alagad nagdolot man siya nin mga sakripisyo asin nagtutong nin insenso sa manlaen-laen na altar.

⁴ Sarong beses nagduman siya sa Gibeon tanganing magdolot nin sakripisyo, huli ta yaon duman an pinakabantog na altar. Kaidto nagdolot na siya duman nin ginatos na tinutong na atang.

⁵ Pagkabanggi, nagpahiling saiya sa pangatorogan an Kagurangnan; asin naghapot an Dios, “Ano an boot mong itao ko saimo?”

⁶ Nagsimbag si Solomon, “Pinahilingan mo nin dakula asin danay na pagkamoot an sakong ama na si David na saimong sorogoon huli ta naglakaw siya na maimbod, matanos asin marahay sa atubangan mo. Ipinadagos mo an pagpahiling kan dakula asin danay na pagkamoot saiya kan tawan mo siya nin sarong aking lalaki tanganing magtukaw ngunyan sa saiyang trono.

⁷ O Kagurangnan Dios, ginibo mo akong hade na kasalihid kan sakong ama maski aki pa ako nin marahay asin dai pa tataong mamayo.

⁸ Uya ako sa tahaw kan banwaan na pinili mo bilang sadiri, banwaan na dai mabilang sa kadakulaan.

⁹ Kaya tawan mo ako kan kadonongan na kaipuhan ko tanganing pamayohan ko na may katanosan an saimong banwaan asin tanganing maaraman ko an kalaenan kan marahay asin maraot, huli ta siisay an pwedeng maghade sa banwaan mong ini na orog kadakula?”

¹⁰ Naogma an Kagurangnan sa hinagad na ini ni Solomon,

¹¹ kaya nagsabi an Dios saiya, “Huli ta naghagad ka nin kadonongan tanganing maghade nin matanos, embes na halawig na buhay, o kayamanan, o kagadanan kan saimong mga kaiwal,

¹² itatao ko an saimong hinagad. Tatawan taka nin kadonongan asin pakasabot na orog ki sa mga naenot na saimo o sa mga masurunod pa saimo.

¹³ Itatao ko man saimo an dai mo hinahagad; kayamanan saka kabantogan, tanganing mayo nin hade na makaarog saimo sa bilog mong buhay.

¹⁴ Asin kun maglalakaw ka sa sakong dalan huli sa pagkuyog kan sakong mga togon saka pagboot siring kan ginibo kan saimong ama na si David, tatawan taka nin halawig na buhay.”

¹⁵ Nagmata si Solomon asin naaraman niya na an Kagurangnan nagtaram saiya sa pangatorogan. Dangan nagduman siya sa Jerusalem asin nagtindog sa atubangan kan Kaban nin Tipan nin Kagurangnan; nagdolot siya duman nin mga tinutong na atang asin mga dolot para sa katoninongan. Pakatapos, nagbangkete siya para sa gabos niyang mga opisyal.

Hinukoman ni Solomon an Sarong Magabat na Kaso

¹⁶ Sarong aldaw, duwang maraot na babae an nag-abot asin nag-atubang ki Hadeng Solomon.

¹⁷ Nagsabi an saro sainda, “Mahal na hade, nag-eerok ako saka an babaeng ini sa sarong harong asin nag-aki ako nin sarong aking lalaki mantang yaon siya sa harong.

¹⁸ Pakalihis nin duwang aldaw nag-aki man siya nin lalaki. Mayo kami nin ibang kaibahan sa harong; kami sanang duwa.

¹⁹ Sarong banggi nadatogan niya an saiyang aki kaya nagadan.

²⁰ Nagbangon siya sa kamatangaan nin banggi, kinua an sakong aki sa kataed ko mantang torog ako, asin dinara sa saiyang higdaan; ibinugtak niya sa kataed ko an gadan na niyang aki.

²¹ Pagkaaga, kan magmata ako tanganing pasusohon an sakong aki, nahiling ko na gadan na an aki. Minaanan ko nin marahay an aki dangan namidbid ko na bako idto an sakong aki.”

²² Alagad nagsabi an ikaduwang babae, “Bakong totoo iyan! Sakuya an buhay na aki, asin saimo an gadan!” Nagsimbag an enot na babae, “Saimo an gadan na aki asin sako an buhay!” Kaya padagos sindang nagpasimbagan sa atubangan kan hade.

²³ Dangan nagsabi si Hadeng Solomon, “An lambang saro saindo nagsasabi, ‘Sako an buhay na aki asin saimo an gadan.’”

²⁴ Nagpakua siya nin espada. Kan darahon ini saiya,

²⁵ nagsabi siya, “Baaka an buhay na aki asin tawan an kabanga sa saro, asin sa ikaduwa man an kabanga.”

²⁶ An tunay na ina, an saiyang puso pano nin pagkamoot sa saiyang aking lalaki, nagsabi sa hade, “Mahal na Hade, nakikimaherak ako na dai mo paggadanon an aki! Itao mo na sana saiya!” Alagad nagsabi an ikaduwang babae, “Hare pagtawan sa kiisay man samo an aki; baakon an aki.”

²⁷ Dangan nagsabi si Solomon, “Dai paggadanon an aki! Tawan sa enot na babae; siya an tunay na ina!”

²⁸ Kan madangog kan banwaan nin Israel an desisyon kan hade, nagkaigwa sinda nin dakulang paggalang saiya. Nahiling ninda na igwa siya kan kadonongan nin Dios tanganing magtao nin tamang hustisya.