1 Mga Hade 22 - Marahay na Bareta Biblia

Pinatanidan ni Propeta Micaias si Ahab

¹ An Israel saka an Siria dai nag-iwal sa laog nin tolong taon.

² Alagad kan ikatolong taon nagduman si Hadeng Jehosafat nin Juda ki Hadeng Ahab nin Israel.

³ Naghapot si Ahab sa mga opisyal niya, “Tadaw ta mayo kita nin ginigibong anoman tanganing mabawi an Ramot-gilead sa hade nin Siria? Sadiri ta iyan!”

⁴ Naghapot man si Ahab ki Jehosafat, “Iibahan mo daw ako tanganing salakayon an Ramot-gilead?” Nagsimbag si Jehosafat, “Andam ako kun andam ka na; siring man an sakong mga soldados saka an sakong mga nangangabayong soldados.

⁵ Alagad hapoton ta ngona an Kagurangnan.”

⁶ Kaya inapod ni Ahab an mga propeta, mga apat na gatos sinda gabos, saka hinapot, “Dapat daw na magduman ako asin salakayon an Ramot-gilead o dai?” Nagsimbag sinda, “Salakayon mo an Ramot-gilead. Itatao saimo nin Kagurangnan an kapangganahan.”

⁷ Alagad naghapot si Jehosafat, “Mayo na daw nin ibang propeta na pwedeng makihumapot sa Kagurangnan para sato?”

⁸ Nagsimbag si Ahab, “Igwa pa nin saro, si Micaias na aking lalaki ni Imla. Alagad kinakaongisan ko siya, huli ta mayo lamang siya nin marahay na propesiya manongod sako; danay na maraot na bagay an saiyang propesiya.” “Dai ka magsabi kaiyan!” an simbag ni Jehosafat.

⁹ Dangan ipinaapod ni Ahab an sarong opisyal saka sinabihan, “Magduman ka asin darahon mo tolos digdi si Micaias na aking lalaki ni Imla.”

¹⁰ An duwang hade, na nakagubing nin sa hade, yaon kaidto sa lugar na pinaggiginikan sa luwas kan trangkahan nin Samaria. Nakatukaw sinda sa saindang trono asin nagpopropesiya sa atubang ninda an gabos na propeta.

¹¹ An saro sainda, si Zedekias na aking lalaki ni Kenaana, naggibo nin lansang na mga sungay asin nagsabi ki Ahab, “Uya an itinataram nin Kagurangnan: ‘Sa paagi kaini lalabanan asin dadaogon mo an mga taga Siria.’”

¹² Siring man kaiyan an sinabi kan ibang propeta. Nagsabi pa sinda, “Salakayon mo an Ramot-gilead asin manggagana ka; itatao saimo nin Kagurangnan an kapangganahan.”

¹³ Mantang nangyayari ini, sinabihan si Micaias kan opisyal na nagkua saiya, “An gabos na propeta nagpropesiya nin kapangganahan para sa hade; marahay na iyan man an gibohon mo.”

¹⁴ Alagad nagsimbag si Micaias, “Sa ngaran kan buhay na Kagurangnan nasumpa ako na kun ano an itataram niya sako iyo sana an sakong itataram!”

¹⁵ Kan mag-atubang si Micaias ki Hadeng Ahab, hinapot siya kan hade, “Micaias, dapat daw na salakayon mi ni Hadeng Jehosafat an Ramot-gilead o dai?” Nagsimbag si Micaias, “Salakayon nindo asin manggagana kamo. Itatao saindo nin Kagurangnan an kapangganahan.”

¹⁶ Alagad sinabihan siya kan hade, “Pirang beses takang pasusumpaon na mayo ka nin itataram sako kundi an katotoohan sa ngaran nin Kagurangnan?”

¹⁷ Nagsimbag si Micaias, “Nahiling ko an bilog na Israel na nawarak sa kabukidan, arog sa mga karnero na mayo nin pastor, asin nagtaram an Kagurangnan, ‘Mayo sinda nin pamayo, papulia sinda sa katoninongan.’”

¹⁸ Sinabihan ni Ahab si Jehosafat, “Bakong sinabi ko na saimo na dai pa lamang siya nagpropesiya nin marahay manongod sako? An saiyang propesiya danay na maraot!”

¹⁹ Nagpadagos si Micaias, “Hinanyoga ngunyan an tataramon nin Kagurangnan! Nahiling ko an Kagurangnan na nagtutukaw sa saiyang trono kaiba an saiyang mga anghel na nagtitindog sa too niya asin sa wala.

²⁰ Naghapot an Kagurangnan, ‘Siisay an madagka ki Ahab tanganing sumalakay siya asin magadan sa Ramot-gilead?’ Nagsabi nin sarong bagay an nagkapirang anghel, mantang laen man an sinabi kan iba.

²¹ Dangan nagpaenotan an sarong espiritu asin nagtindog sa atubangan nin Kagurangnan. ‘Dadagkahon ko siya,’ an sabi niya.

²² Hinapot nin Kagurangnan an espiritu, ‘Sa anong paagi?’ Asin nagsimbag siya, ‘Maduman ako asin magigin espiritung nagpuputik sa ngoso kan gabos niyang propeta.’ Nagtaram an Kagurangnan, ‘Dagkahon mo siya ta manggagana ka; lakaw saka giboha iyan.’”

²³ Nagpadagos si Micaias, “Iyo ini an nangyari. Ibinugtak nin Kagurangnan an espiritung nagpuputik sa ngoso kan saimong mga propeta. Alagad siya mismo an nagtalaan kan saimong kagadanan!”

²⁴ Dangan nagdolok an propetang si Zedekias asin sinampaling si Micaias. An sabi niya, “Kasuarin pa ako binayaan kan espiritu nin Kagurangnan asin nagtaram saimo?”

²⁵ “Maaaraman mo iyan pag-abot kan aldaw na magtatago ka sa sarong kwarto,” an simbag ni Micaias.

²⁶ Nagboot an hade, “Dakopa nindo si Micaias saka daraha ki Amon, an gobernador kan syudad, asin ki Prinsipe Joas.

²⁷ Sabihan nindo sinda na ibilanggo an tawong ini asin dikit sanang tinapay saka tubig an itao saiya sagkod na magbalik akong ligtas sa pag-alaman.”

²⁸ Nagsabi si Micaias, “Kun makabalik kang ligtas sa pag-alaman, an Kagurangnan dai mananggad nagtaram sa paagi ko!” Asin nagsabi pa siya, “Pagdangog kamo gabos!”

An Pagkagadan ni Ahab

²⁹ Dangan nagduman sa Ramot-gilead si Hadeng Ahab nin Israel asin si Hadeng Jehosafat nin Juda.

³⁰ Nagsabi si Ahab ki Jehosafat, “Paglaog ta sa ralaban, masagin-sagin ako, alagad isulot mo an saimong gubing na sa hade.” Kaya nagsagin-sagin an hade nin Israel kan magduman sa ralaban.

³¹ Igwa kaidto nin pagboot an hade nin Siria sa saiyang treynta y dos na kapitan kan mga karwahe na mayo sindang ibang salakayon kundi an hade nin Israel sana.

³² Kaya kan mahiling ninda si Jehosafat, gabos sinda nagsaboot na si Jehosafat an hade nin Israel kaya nagbirik sinda tanganing salakayon siya. Alagad kan pagkurahaw ni Jehosafat,

³³ nahiling kan mga kapitan na bako siya an hade nin Israel. Nag-ontok sinda sa paglamag saiya,

³⁴ alagad sarong soldados an nagpana, asin dai tuyong tinamaan si Hadeng Ahab sa lugar na pinagsugponan kan saiyang gubing na panggera. Kaya nagkurahaw siya sa nagpapadalagan kan saiyang karwahe, “Umatras ka asin humale sa ralaban, huli ta nalugadan ako!”

³⁵ Mantang nagpapadagos an ralaban, nagdanay si Ahab na nakahurandig sa saiyang karwahe; nakaatubang siya sa mga taga Siria. An dugo kan saiyang lugad nagparadalihig sa salog kan karwahe, sagkod na magadan siya pagkabanggi.

³⁶ Kan masolnop na an aldaw uminabot an pagboot sa mga soldados nin Israel: “An lambang saro bumalik na sa sadiri niyang banwaan asin syudad!”

³⁷ Kaya nagadan si Hadeng Ahab. Dinara sa Samaria an saiyang bangkay saka ilinubong.

³⁸ An saiyang karwahe hinugasan sa tangke nin tubig sa Samaria, saen dinila kan mga ayam an saiyang dugo asin nagkarigos an mga maraot na babae, sosog sa itinaram nin Kagurangnan.

³⁹ An iba pang ginibo ni Ahab, asin an itinugdok niyang marpil na harong saka an pinatindog niyang mga syudad, gabos nasusurat sa An Kasaysayan kan mga Hade nin Israel.

⁴⁰ Kan magadan siya, nagsalihid saiya bilang hade an aki niyang lalaki na si Ahazias.

Si Hadeng Jehosafat nin Juda

⁴¹ Kan ikaapat na taon kan paghahade ni Ahab sa Israel, nagin hade sa Juda si Jehosafat na aking lalaki ni Asa

⁴² sa edad na treynta y singkong taon, asin naghade siya sa Jerusalem sa laog nin beynte y singkong taon. An saiyang ina iyo si Azuba na aki ni Silhi.

⁴³ Arog kan saiyang ama na si Asa, ginibo ni Jehosafat an matanos sa atubang nin Kagurangnan; alagad dai niya ginaba an paganong mga lugar na pagsasambahan asin ipinadagos duman kan mga tawo an pagdolot nin mga sakripisyo saka an pagtutong nin insenso.

⁴⁴ Nakipagtoninong si Jehosafat sa hade nin Israel.

⁴⁵ An iba pang ginibo ni Jehosafat, an saiyang kaisogan asin mga pakilaban, gabos nasusurat sa An Kasaysayan kan mga Hade nin Juda.

⁴⁶ Hinale niya an gabos na marigsok na lalaki saka babae na nagkatarada sa panahon kan saiyang ama na si Asa.

⁴⁷ Mayo nin hade an daga nin Edom; an namahala kaini iyo an tawong ibinugtak kan hade nin Juda.

⁴⁸ Nagpagibo si Hadeng Jehosafat nin mga barko sa Tarsis tanganing maglayag pasiring sa daga nin Ofir sa pagkua nin mga bulawan. Alagad dai nakahale an mga barko huli ta nagkararaot an mga ini duman sa Ezion-geber.

⁴⁹ Dangan sinabihan ni Hadeng Ahazias nin Israel si Hadeng Jehosafat, “Tugoteng maglayag an sakong mga tawohan kaiba kan saimong mga tawohan.” Alagad dai nagtugot si Jehosafat.

⁵⁰ Nagadan si Jehosafat asin ilinubong sa lulubngan kan mga hade duman sa Syudad ni David. Nagsalihid saiya bilang hade an aki niyang lalaki na si Jehoram.

Si Hadeng Ahazias nin Israel

⁵¹ Kan ikadyes y syeteng taon kan paghahade ni Hadeng Jehosafat nin Juda, nagin hade nin Israel si Ahazias na aking lalaki ni Ahab, asin naghade siya sa Samaria sa laog nin duwang taon.

⁵² Nagkasala siya tumang sa Kagurangnan. Sinunod niya an maraot na gibo kan saiyang ama na si Ahab, kan saiyang ina na si Jezebel, asin kan maraot na an gibo ni Hadeng Jeroboam na nagpakasala sa Israel.

⁵³ Nagsamba siya asin naglingkod ki Baal. Arog kan saiyang ama, pinaanggot niya an Kagurangnan, an Dios nin Israel.