1 Mga Hade 21 - Marahay na Bareta Biblia

An Ubasan ni Nabot

¹ Harani sa palasyo ni Hadeng Ahab sa Jezreel igwa nin sarong ubasan na sadiri nin sarong lalaki na an ngaran Nabot.

² Sarong aldaw, nagsabi si Ahab ki Nabot, “Tawan sako an saimong ubasan; harani ini sa sakong palasyo, asin boot kong gibohon na tatamnan nin mga gulayon. Riribayan taka nin mas marahay na ubasan, o kun boot mo, babayadan taka kan tamang halaga kaiyan.”

³ Alagad nagsabi si Nabot ki Ahab, “Dai logod itugot nin Kagurangnan na itao ko saimo an pamana kan sakong mga ginikanan.”

⁴ Nagpuli si Ahab na mamondo saka anggot huli kan sinabi saiya ni Nabot. Naghigda siyang nakaatubang sa lanob asin habong magkakan.

⁵ Nagdolok an saiyang agom na si Jezebel saka naghapot, “Tadaw ta mamondo ka? Tadaw ta habo kang magkakan?”

⁶ Nagsimbag siya, “Huli kan sinabi sako ni Nabot. Inalok ko siya na babakalon ko an saiyang ubasan o kun boot niya riribayan ko saiya nin ibang ubasan. Alagad sinabihan niya ako na dai niya pwedeng itao sako an saiyang ubasan!”

⁷ “Bakong ika an hade nin Israel?” an simbag saiya ni Jezebel. “Magbangon ka, mag-ogma saka magkakan. Kukuahon ko para saimo an ubasan ni Nabot!”

⁸ Dangan nagsurat si Jezebel nin nagkapirang surat, sinelyohan kan selyo ni Ahab, dangan ipinadara sa mga opisyal saka sa mga ginagalangan na tawo sa Jezreel.

⁹ Siring kaini an sabi niya sa surat: “Ipagboot nindo an sarong aldaw nin pag-ayuno. Tiponon nindo an mga tawo asin itao nindo ki Nabot an pangenot na tukawan.

¹⁰ Patukawon nindo sa atubangan niya an duwang mayong halagang mga tawo na masumbong nin siring laban saiya: ‘Minaldisyon ni Nabot an Dios saka an hade.’ Dangan iluwas nindo siya saka gapoon sagkod na magadan.”

¹¹ Kinuyog kan mga opisyal asin kan mga ginagalangan na tawo sa Jezreel an pagboot ni Jezebel.

¹² Ipinagboot ninda an sarong aldaw nin pag-ayuno, tinipon an mga tawo dangan itinao ki Nabot an pangenot na tukawan.

¹³ Naglaog an duwang mayong halagang tawo, nagtukaw sa atubangan ni Nabot asin nagsumbong nin siring kaini laban saiya: “Minaldisyon ni Nabot an Dios saka an hade.” Kaya dinara ninda siya sa luwas kan syudad asin ginapo sagkod na nagadan.

¹⁴ Nagpadara sinda nin mensahe ki Jezebel: “Gadan na si Nabot.”

¹⁵ Pakadangog ni Jezebel kan mensaheng ini, sinabihan niya si Ahab, “Gadan na si Nabot. Magduman ka na asin sadiriha an ubasan na habo niyang ipabakal saimo.”

¹⁶ Nagduman tolos si Ahab sa ubasan tanganing sadirihon idto.

¹⁷ Dangan tinaraman nin Kagurangnan si Elias, an propetang taga Tisbe,

¹⁸ “Magduman ka ki Ahab na hade nin Samaria. Mahihiling mo siya sa ubasan ni Nabot; yaon siya duman tanganing sadirihon an ubasan.

¹⁹ Sabihan mo siya na ako, an Kagurangnan, nagtataram saiya, ‘Pakatapos mong gadanon an tawo, sasadirihon mo pa an saiyang rogaring?’ Dangan sabihan mo siya na ini an sakong itinataram: ‘Sa lugar saen dinila kan mga ayam an dugo ni Nabot, duman man didilaon kan mga ayam an saimong dugo!’”

²⁰ Kan mahiling ni Ahab si Elias, nagsabi siya, “Nanumpongan mo na naman ako, sakong kaiwal?” Nagsimbag si Elias, “Iyo, huli ta ipinabakal mo na an saimong sadiri sa paggibo nin karatan sa atubang nin Kagurangnan.

²¹ Kaya nagtataram saimo an Kagurangnan, ‘Papadarahan taka nin karatan. Sisighidon taka asin pupuhoon ko an lambang lalaki sa saimong pamilya, hoben man o gurang.

²² An saimong pamilya magigin arog sa pamilya ni Jeroboam na aking lalaki ni Nebat, asin arog sa pamilya ni Baasa na aking lalaki ni Ahias, huli ta pinaanggot mo ako saka pinapagkasala mo an Israel!’

²³ Asin manongod ki Jezebel, an Kagurangnan nagtataram na kakakanon si Jezebel kan mga ayam sa laog kan syudad nin Jezreel.

²⁴ An siisay man sa saimong mga kadugo na magadan sa syudad kakakanon kan mga ayam, asin an magadan sa kalangtadan kakakanon kan mga bwitre.” (

²⁵ Mayo na nin arog ki Ahab na nagdusay kan saiyang sadiri sa paggibo nin karatan, huli sa mga sotsot kan saiyang agom na si Jezebel.

²⁶ Ginibo niya an makauuyam na mga kasalan huli sa pagsamba sa mga dios-dios arog kan ginibo kan mga Amoreo, na pinahale nin Kagurangnan mantang nagdadangadang an banwaan nin Israel sa dagang idto.)

²⁷ Kan madangog ni Ahab an mga sinabi ni Elias, ginisi niya an saiyang gubing saka nagsulot nin sako. Nag-ayuno siya, nagkatorog na sulot an sako asin naglakaw na mamondo nin makuri.

²⁸ Tinaraman nin Kagurangnan an propetang si Elias,

²⁹ “Nahiling mo kun paano nagpakumbaba sa atubang ko si Ahab? Huli ta nagpakumbaba siya sa atubang ko, dai ko siya papadarahan nin karatan mantang nabubuhay siya; ipapadara ko an karatan sa panahon kan saiyang aking lalaki.