1 Mga Hade 18 - Marahay na Bareta Biblia

Si Elias asin an mga Propeta ni Baal

¹ Pakalihis nin dakul na aldaw, kan ikatolo nang taon na mayo nin uran, tinaraman nin Kagurangnan si Elias, “Lakaw, magpahiling ka ki Ahab ta mapadara na ako nin uran.”

² Kaya naglakaw si Elias tanganing magpahiling ki Ahab. Makuring gayo an gutom sa Samaria,

³ kaya ipinaapod ni Ahab si Obadias, na namamahala kan palasyo. (Igwa nin pagkatakot si Obadias sa Kagurangnan,

⁴ asin kan ginagadan ni Jezebel an mga propeta kan Kagurangnan, ilinigtas ni Obadias an sanggatos kan mga propetang ini. Binanga niya an mga propeta sa duwang grupo na tigsingkwenta, dangan tinago sa mga lungib; tinawan niya sinda nin kakanon saka inomon.)

⁵ Nagsabi si Ahab ki Obadias, “Liboton ta an daga asin hilingon ta an lambang burabod saka kapantayan; tibaad makakua kita nin mga doot tanganing dai magadan sa gutom an mga kabayo saka mula, asin tanganing dai mainaan an bilang kan satong mga hayop.”

⁶ Nagkaoyon sinda kun arin na parte kan daga an sisiyasaton kan lambang saro sainda; dangan naglakaw sinda sa magkaibang direksyon.

⁷ Mantang naglalakaw si Obadias, sinabat siya ni Elias. Namidbid siya ni Obadias, nagdapa, dangan naghapot, “Ika mananggad an kagurangnan kong si Elias?”

⁸ “Iyo,” an simbag ni Elias, “Dumuman ka sa saimong hade dangan sabihan mo siya na uya ako.”

⁹ Nagsimbag si Obadias, “Ano an sakong kasalan ta boot mo akong ibugtak sa pag-alaman nin kagadanan huli ki Hadeng Ahab? Gagadanon niya ako.

¹⁰ Sa ngaran kan buhay na Kagurangnan na saimong Dios, minasumpa ako na ipinahanap ka kan hade sa lambang daga sa kinaban. Kun an pamayo kan daga minapahayag na mayo ka na sa saiyang daga, pinapasumpa ni Ahab an pamayong idto na dai ka mananggad manumpongan.

¹¹ Alagad ngunyan boot mong magduman ako tanganing sabihan siya na uya ka.

¹² Paano kun pakahale ko, darahon ka tolos kan espiritu nin Kagurangnan sa sarong lugar na dai ko aram? Dangan kun sabihan ko si Ahab na uya ka saka dai ka makua, gagadanon niya ako maski igwa ako nin pagkatakot sa Kagurangnan poon kan ako aki pa.

¹³ Dai mo nadangog na kan ginagadan ni Jezebel an mga propeta nin Kagurangnan itinago ko sa mga lungib an sanggatos sa sainda, sa duwang grupo na tigsingkwenta, dangan tinawan ko sinda nin pagkakan saka inomon?

¹⁴ Kaya tadaw ta sinusugo mo ako na sabihan an hade na uya ka? Gagadanon niya ako!”

¹⁵ Nagsimbag si Elias, “Sa ngaran kan buhay na Kagurangnan nin mga hukbo, na sakong pinaglilingkodan, nanunuga ako na mapahiling ako saiya ngunyan na aldaw.”

¹⁶ Kaya nagduman si Obadias ki Hadeng Ahab, dangan nag-osip saiya, asin naglakaw si Ahab tanganing sabaton si Elias.

¹⁷ Pakahiling ni Ahab ki Elias, nagsabi siya, “Uya ka palan—an pinakamaraot na paraparibok sa Israel?”

¹⁸ “Bako ako an nagpaparibok sa Israel,” an simbag ni Elias, “kundi ika asin an saimong ama. Huli ta linalapas mo an mga pagboot nin Kagurangnan asin sinasamba mo si Baal.

¹⁹ Ngunyan pagbotan mo an bilog na Israel na tagboon ako sa Bukid nin Carmelo. Padumanon mo man an kwatro syentos singkwentang propeta ni Baal, saka an kwatro syentos na propeta kan diosang si Asera na pinapakakan ni Jezebel.”

²⁰ Kaya an bilog na Israel asin an mga propeta ni Baal tinipon ni Ahab sa Bukid nin Carmelo.

²¹ Nagpaenotan si Elias asin nagsabi sa mga tawo, “Sagkod nuarin kamo magkakaigwa nin duwang pag-isip? Kun an Kagurangnan iyo an Dios, siya an sambahon nindo; alagad kun si Baal an Dios, siya an sambahon nindo!” Dai nagsimbag saiya an mga tawo.

²² Nagpadagos sa pagtaram si Elias, “Ako na sana an natatadang propeta kan Kagurangnan, alagad igwa nin kwatro syentos singkwentang propeta si Baal.

²³ Darahi nindo kami nin duwang torong baka. Papilion nindo nin saro an mga propeta ni Baal, dangan bubunoon ninda an toro, pepedasohon saka ibubugtak sa mga kahoy na igatong, alagad dai ninda pagkalayohan. Siring man kaiyan an gigibohon ko sa sarong toro.

²⁴ Pakatapos, mamimibi kamo sa saindong dios asin mamimibi man ako sa Kagurangnan. An magsimbag sa paagi nin kalayo, iyo an Dios.” Nagkurahaw kan saindang pag-oyon an mga tawo.

²⁵ Dangan sinabihan ni Elias an mga propeta ni Baal, “Huli ta dakul kamo, pilion na nindo an sarong toro asin kamo an enot na mag-andam kaiyan. Mamibi kamo sa saindong dios, alagad dai nindo pagkalayohan an igatong.”

²⁶ Kinua ninda an saro kan mga torong baka na dinara sainda, inandam idto, dangan namibi ki Baal magpoon aga sagkod odto. “Baal, simbaga kami,” an kurahaw ninda, mantang nagsasayaw sa palibot kan altar na ginibo ninda. Alagad mayo nin simbag na nag-abot.

²⁷ Kan odto na, pinonan sindang tuyatuyaon ni Elias. An sabi niya, “Kosogon nindo an pagpamibi! Saro siyang dios! Tibaad may iniisip siya o may ibang ginigibo. Tibaad nasa paglakaw siya o kaya natotorog, asin kaipuhan pukawon!”

²⁸ Kaya orog na namibi nin makosog an mga propeta. Linugad ninda an saindang sadiri sa paagi nin mga kutsilyo asin mga punyal, sosog sa saindang kaugalean, sagkod na nagburulos an saindang dugo.

²⁹ Nagpadagos sinda kan makosog na pag-apod ki Baal sagkod alas tres nin hapon; alagad mayo nin nagsimbag asin mayo nin nagdangog.

³⁰ Dangan sinabihan ni Elias an mga tawo, “Rumani kamo sakuya.” Nagrani saiya an gabos. Hinirahay niya an naraot na altar nin Kagurangnan.

³¹ Nagkua siya nin doseng gapo, sosog sa bilang kan mga tribu kan doseng aking lalaki ni Jacob na tinawan nin Kagurangnan kan ngaran na Israel.

³² An mga gapo ginibo niyang altar para sa Kagurangnan. Kinalihan niya an palibot kan altar, na an rarom pwedeng malaogan nin apat na galon nin tubig.

³³ Pakatapos, ibinugtak niya an igatong sa altar, pinedaso an toro, asin ibinugtak sa ibabaw kan igatong. Nagsabi siya, “Panoa nindo nin tubig an apat na tapayan dangan iula nindo an tubig sa atang saka sa kahoy.” Ginibo ninda ini,

³⁴ asin nagsabi siya, “Ulaan nindo giraray nin tubig.” Asin inulaan ninda. “Ulaan pa nindo,” an sabi niya, asin inulaan pa ninda.

³⁵ An tubig nagbulos sa palibot kan altar sagkod na napano an kali.

³⁶ Kan oras na tanganing idolot an panghapon na sakripisyo, nagdolok si Elias sa altar saka namibi, “Kagurangnan, Dios ni Abraham, ni Isaac, asin ni Jacob, patotoohan mo ngunyan na ika an Dios nin Israel, na ako an saimong sorogoon, asin na ginibo ko ini huli sa saimong pagboot.

³⁷ Simbaga ako, O Kagurangnan, simbaga ako, tanganing maaraman kan mga tawong ini na ika, Kagurangnan, iyo sana an Dios asin pinapabalik mo sinda sa saimo.”

³⁸ Dangan naghulog an kalayo nin Kagurangnan; tinutong kaini an atang, an igatong asin an mga gapo saka an daga. Nagmara an tubig sa kali.

³⁹ Kan mahiling ini kan mga tawo, nagdarapa sinda saka nagsarabi, “An Kagurangnan iyo an Dios; an Kagurangnan sana an Dios!”

⁴⁰ Nagboot si Elias, “Dakopa nindo an mga propeta ni Baal; hare nindo pagpadulaga maski saro sainda.” Dinakop sinda kan mga tawo asin dinara sinda ni Elias sa Sapa nin Kison dangan ginadan niya sinda duman.

An Kataposan kan Gutom

⁴¹ Sinabihan ni Elias si Ahab, “Lakaw na asin magkakan ka. Nadadangog ko an ragubrob kan nagdadangadang na uran.”

⁴² Kaya naghale si Ahab tanganing magkakan. Dangan nagtukad si Elias sa alitoktok kan Bukid nin Carmelo, saen nagluhod siya sa daga, an saiyang payo nasa tahaw kan saiyang mga tuhod.

⁴³ Nagsabi si Elias sa saiyang sorogoon, “Tumukad ka asin tumanaw sa dagat.” Nagtukad an sorogoon saka nagtanaw sa dagat. Dangan nagsabi, “Mayo ako nin nahihiling na anoman.” Pitong beses siyang sinabihan ni Elias na tumukad saka magtanaw sa dagat.

⁴⁴ Sa ikapitong pagtanaw, nagsabi an sorogoon, “Nakahiling ako nin panganoron na siring kasadit kan palad nin sarong lalaki, na nag-iitaas hale sa dagat.” Pinagbotan ni Elias an saiyang sorogoon, “Dumuman ka ki Hadeng Ahab. Sabihan mo siya na maglunad na sa saiyang karwahe dangan magpuli bago siya abotan kan uran.”

⁴⁵ Dai nahaloy nagdiklom an langit huli sa panganoron; naghuyop an doros asin naghulog an makosog na uran. Naglunad si Ahab sa saiyang karwahe asin nagbalik sa Jezreel.

⁴⁶ An kapangyarihan kan Kagurangnan duminatong ki Elias; kinaluskos niya an saiyang gubing, ibinugkos sa saiyang habayan dangan nagdalagan; naenotan niya si Ahab sa pag-abot sa palaog kan Jezreel.