1 Mga Hade 15 - Marahay na Bareta Biblia

Si Hadeng Abias nin Juda

¹ Kan ikadyes y otsong taon kan paghahade ni Jeroboam sa Israel, nagin hade kan Juda si Abias,

² asin tolong taon siyang naghade sa Jerusalem. An saiyang ina iyo si Maaca na aking babae ni Absalom.

³ An gabos na kasalan na ginibo kan saiyang ama ginibo man niya, asin dai siya nagin maimbod sa Kagurangnan na saiyang Dios, bakong arog kan saiyang ginikanan na si David.

⁴ Alagad huli ki David, tinawan siya nin Kagurangnan, na saiyang Dios, nin aking lalaki na masalihid saiya sa paghade sa Jerusalem asin tanganing danay na mapapusog an Jerusalem.

⁵ Ginibo ini nin Kagurangnan huli ta ginibo ni David an nakawili saiya asin dai nanggad si David naglapas kan arin man kan mga kabotan niya, pwera kan manongod sa kaso ni Urias na Heteo.

⁶ Si Abias saka si Jeroboam danay na nag-iwal sa bilog na panahon kan paghahade ni Abias.

⁷ An iba pang ginibo ni Abias gabos nasusurat sa An Kasaysayan kan mga Hade nin Juda.

⁸ Nagadan si Abias asin ilinubong sa Syudad ni David. Si Asa na aki niyang lalaki iyo an nagsalihid saiya bilang hade.

Si Hadeng Asa nin Juda

⁹ Kan ikabeynteng taon kan paghahade ni Jeroboam sa Israel, nagin hade kan Juda si Asa,

¹⁰ asin kwarenta y unong taon siyang naghade sa Jerusalem. An saiyang lola iyo si Maaca, na aking babae ni Absalom.

¹¹ Ginibo ni Asa an matanos sa atubang nin Kagurangnan, siring kan ginibo ni David na saiyang ginikanan.

¹² Pinalayas niya sa daga an mga lalaki saka mga babaeng naggigibo nin karigsokan sa mga altar, asin hinale niya an gabos na mga ladawan na ginibo kan mga hadeng naenot saiya.

¹³ Hinale man niya an lola niyang si Maaca bilang inang-reyna huli ta naggibo ini nin makauuyam na ladawan kan diosang si Asera. Pinalod niya an ladawan asin sinulo sa Kapantayan nin Kidron.

¹⁴ Maski dai niya ginaba an gabos na altar na pagsasambahan, nagdanay siyang maimbod sa Kagurangnan sa bilog niyang buhay.

¹⁵ Ilinaog niya sa Templo an gabos na bagay na idinolot kan saiyang ama, siring man an bulawan saka plata na siya mismo an nagdolot.

¹⁶ Danay na nag-iwal si Hadeng Asa nin Juda asin si Hadeng Baasa nin Israel sa bilog na panahon kan saindang paghahade.

¹⁷ Sinalakay ni Baasa an Juda, asin pinoonan an pagpapusog kan Rama tanganing maontok an gabos na paglaog asin pagluwas sa Juda.

¹⁸ Kaya kinua ni Asa an gabos na plata saka bulawan na natada sa Templo asin sa palasyo, dangan ipinadara niya sa Damasco. An saiyang mga opisyal iyo an nagdara kan mga bagay na ini ki Hadeng Ben-hadad nin Siria, na aking lalaki ni Tabrimon asin makoapo ni Hezion. Siring kaini an ipinasabi ni Asa:

¹⁹ “Magin magkaalyansa kita, siring na magkaalyansa an satong mga ama. An plata saka bulawan na ini sarong regalo para saimo. Putola ngunyan an saimong pakipag-alyansa ki Hadeng Baasa nin Israel tanganing haleon niya an saiyang hukbo sa sakong teritoryo.”

²⁰ Nag-oyon si Hadeng Ben-hadad sa alok ni Asa asin ipinadara niya an saiyang mga opisyal saka an saindang mga hukbo tanganing salakayon an mga syudad nin Israel. Nasakop ninda an Ijon, Dan, Abel-bet-maaca, an lugar na harani sa Danaw nin Galilea, asin an bilog na teritoryo nin Neftali.

²¹ Kan madangog ini ni Hadeng Baasa, inontok niya an pagpapusog kan Rama asin nagduman siya sa Tirza.

²² Dangan nagboot si Hadeng Asa sa gabos na taga Juda na kuahon an mga gapo saka mga kahoy na ginamit ni Baasa sa pagpapusog kan Rama asin ginamit niya idto sa pagpapusog kan Geba asin kan Mizpa sa teritoryo nin Benjamin.

²³ An iba pang ginibo ni Asa, an saiyang kaisogan asin an mga banwang pinapusog niya, nasusurat gabos sa An Kasaysayan kan mga Hade nin Juda. Alagad kan gurang na si Asa napilay siya huli kan helang sa bitis.

²⁴ Nagadan siya asin ilinubong sa lulubngan kan mga hade sa Syudad ni David. An aki niyang lalaki na si Jehosafat iyo an nagsalihid saiya bilang hade.

Si Hadeng Nadab nin Israel

²⁵ Kan ikaduwang taon nin paghahade ni Hadeng Asa nin Juda, nagin hade nin Israel si Nadab na aking lalaki ni Hadeng Jeroboam, asin duwang taon siyang naghade sa Israel.

²⁶ Siring kan ama niyang naenot saiya, nagkasala man siya tumang sa Kagurangnan asin pinapagkasala niya an Israel.

²⁷ Nagplano laban ki Nadab si Baasa na aking lalaki ni Ahias, na gikan sa tribu ni Issakar, asin mantang sinasalakay ni Nadab asin kan saiyang hukbo an Gibbeton sa Filistia, ginadan siya ni Baasa.

²⁸ Nangyari ini kan ikatolong taon nin paghahade ni Hadeng Asa nin Juda, kaya si Baasa an nagsalihid ki Nadab bilang hade nin Israel.

²⁹ Tolos na ginaradan ni Baasa an gabos na kaayon sa pamilya ni Jeroboam. Sosog sa itinaram nin Kagurangnan sa paagi kan sorogoon niyang si Ahias na taga Shilo, ginadan niya an gabos na pamilya ni Jeroboam; mayo nin natadang buhay.

³⁰ Nangyari ini huli ta pinaanggot ni Jeroboam an Kagurangnan, an Dios nin Israel, huli sa mga kasalan niya asin kan kasalan na ipinagibo niya sa Israel.

³¹ An iba pang ginibo ni Nadab nasusurat sa An Kasaysayan kan mga Hade nin Israel.

³² Si Hadeng Asa nin Juda asin si Hadeng Baasa nin Israel danay na nag-iwal sa bilog na panahon nin saindang paghahade.

Si Hadeng Baasa nin Israel

³³ Kan ikatolong taon kan paghahade ni Asa sa Juda, nagin hade kan bilog na Israel si Baasa na aking lalaki ni Ahias, asin naghade siya sa Tirza sa laog nin beynte y kwatrong taon.

³⁴ Siring ki Hadeng Jeroboam na naenot saiya, nagkasala siya tumang sa Kagurangnan asin pinapagkasala niya an Israel.